NG'ATUTIK 15 - BUKUIT NE TILIL

Kenyitab Sabato

¹ Ye igesgei kenyit age tugul ne bo tisab ichob katiaget.

² Ak u ni katiagonato: ingobagakta age tugul ne yaaksei tugul che kigobesendochi chitab kokwennyi; amat koyaach chitab kokwennyi anan ne tupcho; amu kagemwaita katiagetab Jehovah.

³ Imuchi iyaach bunotyot: ago itiach kiy age tugul ne neng’ung’ ne tinyei ne otupche.

⁴ Ago mabiitunenen kibananok; (amu iberurin iman Jehovah eng’ emet ne konin Jehovah Kamuktaindeng’ung’, imeny koek boroteng’ung’;)

⁵ ngigiilgei igas kutitab Jehovah Kamuktaindeng’ung’, irib iyai ng’atutichuto tugul kang’atin rani.

⁶ Amu iberurin Jehovah Kamuktaindeng’ung’, ko u ye kiiarorun: ak ibesendochi bororiosiek che chang’, ago mebeseni; ak ibou bororiosiek che chang’, ama boun.

⁷ Ngo mi kibanania kwenung’wong’ ne bo tupchosieguk, eng’ nganaset age ne mi age eng’ kurgotiguk ne mi emeng’ung’, ne konin Jehovah Kamuktaindeng’ung’, ko mat iuuiit muguleldang’ung’, anan imumut eung’ung’ eng’ ne otupche ne kibanania:

⁸ ago ng’ang’ji eung’ung’ iman, igochi kobesen che yamei rerunaikyik che te che machei.

⁹ Ripgei si mabiitune muguleldang’ung’ kabwatutiet ne ya, ile, Kagonegitit kenyitab tisab, kenyinoto bo katiaget; ak koyait kondang’ung’ eng’ ne otupche ne banan, kot ko megochi kiy; ak korirji Jehovah agobo inye, ak koek noto tengekto eng’ inye.

¹⁰ Igochi inendet anyun iman, amat koyait muguleldang’ung’ ye igochini: amu iberurin Jehovah Kamuktaindeng’ung’ eng’ ng’olyondoni eng’ boisioniguk tugul, ak eng’ tuguk tugul che iyae euneguk.

¹¹ Amu mabetos kibananok eng’ emet agoi: kaang’atin anyun ale, Kanyol ing’ang’ji eung’ung’ iman tupcheng’ung’, ak cheguk che tinyei nyalilda, ak kibananoguk, eng’ emeng’ung’.

¹² Ngealdaun tupcheng’ung’, Hebranindet ne muren anan ne kwondo, ak koboisieun kenyisiek lo; unde anyun kwo eng’ oldang’ung’ eng’ kenyitab tisab.

¹³ Ak ye kaitiach, ko mat ingwo buch:

¹⁴ igochi eng’ aiyebindo che bo kechireguk, ak che bo ruanyung’ung’, ak che bo ole kitue sabibuguk: igochi anyun ko u ye kigoberurin Jehovah Kamuktaindeng’ung’.

¹⁵ Ak ibwat ile ki i otwogin eng’ emetab Misri, ak kiitiachin Jehovah Kamuktaindeng’ung’: kang’atin anyun agobo ng’olyondoni rani amu noto.

¹⁶ Ak ngo lenjin, Mawendi eng’ oldang’ung’; amu chamin koboto gong’ung’, amu baibai ye mi koboten;

¹⁷ inam katet anyun, irute itinnyi itisyi kurget, ak koek otwogindeng’ung’ koigeny. Yachi ko u noto agine otwogindeng’ung’ ne tie.

¹⁸ Amat kouuiit eng’ inye noto, ye keunde kwo eng’ oldang’ung’; amu u boisiennyi, ne kiboisieun eng’ kenyisiek lo, boisietab otwogik aeng’ che nyoru melekto: ak koberurin Jehovah Kamuktaindeng’ung’ eng’ tugul che iyae.

¹⁹ Itabanji Jehovah Kamuktaindeng’ung’ eik tugul che twatei tuga ak mengichik ak kwesik che twatei nego: ameboisie eitang’ung’ ne kitwatei, anan itil korotikab mengit ne kitwatei.

²⁰ Iame choto eng’ taitab Jehovah Kamuktaindeng’ung’ eng’ kenyit age tugul eng’ ole leweni Jehovah, inye ak bikab gong’ung’.

²¹ Ak ngo ma libwob, ngong’wali anan ngo korat, anan ngo tinyei berut age tugul ne ya, ko mat ieng’ji noto Jehovah Kamuktaindeng’ung’.

²² Iame eng’ kurgotiguk: amei che ng’wonen ak che ma ng’wonen kogergeit, ko u cheptirgichet ak ko u teweretiot.

²³ Kobate amat iam korotikyik; tumji choto ng’ony ko u beek.