NG'ATUTIK 14 - BUKUIT NE TILIL

Kanyol keistoegei bitonwekab bororiosiek

¹ O lagokab Jehovah Kamuktaindeng’wong’: amowat borwekwok, amobiorgei amu ne kame.

² Amu i bororiet ne tilil eng’ Jehovah Kamuktaindeng’ung’, ak kigolewenin Jehovah iegu bororiennyi ne itabanat kosiir bororiosiek tugul che mi ng’ony.

³ Amat iam kiy age tugul ne kiwechei.

⁴ Chu tiong’ik che oame: teta, kechiriet, ng’ororiet,

⁵ ak che u teweretiot, cheptirgichet, ak chemnyogoset: ak ng’ororietab timin ak kiplelgutiet, ak kenyelet ak sitwet.

⁶ Ak tiony age tugul ne pcheotin siok, che kipcheunegei aeng’, ne itori baroi eng’ tiong’ik, oam noto.

⁷ Ago amat oam chu eng’ che itori baroi, anan che betotin siok: tambesiet, kiblengwet, keneriet, amu itori baroi ago ma pcheotin siok, ng’wonen eng’ okwek.

⁸ Ak toret, amu betotin siok ago maitori baroi, ng’wan noto eng’ okwek: amat oam banyekwak; amotwa ye kame.

⁹ Chu che oame eng’ che mi beek: oam age tugul ne tinyei kebebaik ak berik.

¹⁰ Ago mat oam age tugul ne matinyei kebebaik ak berik; ng’wan noto eng’ okwek.

¹¹ Omuchi oam taritik alak tugul che miachen.

¹² Ago amat oam chu: kipsichit, ak motonda, ak chelogomiet;

¹³ chepkupkupchiet ak chesireret, ak keeret ak tugul che kergei;

¹⁴ ak chepkuginik ak tugul che kergei;

¹⁵ ak tiondab songolik, ak keeretab kemoi, ak taritiet ne leel ne bo nyanjet, ak keeret ak che kergei;

¹⁶ ak sugurut ne ming’in, ak sugurut ne o, ak sugurut ne tinyei kuinoik;

¹⁷ ak chebokibabaa, ak chepsengwet, ak taritietab nyanjet;

¹⁸ ak kong’onyot ak chelogomiet ak che kergei, ak chesululit, ak reresiet.

¹⁹ Ng’wonen eng’ okwek tuguk tugul che ing’onioti che tinyei kebebaik: magiamei.

²⁰ Omuchi oam taritik alak tugul che miachen.

²¹ Amat oam ne kame inegei: imuchi igochi kipsagarindet ne mi kurgotiguk koam; anan ialdochi toondet: amu i bororiet ne tilil eng’ Jehovah Kamuktaindeng’ung’. Amat iyoe aruetab ng’oror chegab kamet.

Ng’atutik agobo kebeberwekab taman

²² Igoite iman kebebertab taman ne bo iyotet tugul ne bo kesweguk che biitu eng’ mbar kenyit age tugul.

²³ Iamisiei eng’ taitab Jehovah Kamuktaindeng’ung’, eng’ ole leweni konde kainennyi komeny oloto, kebebertab taman ne bo beguk, ak divaiguk, ak mwaniguk, ak che twatei akweng’ung’, ak kechireguk; si inetge iywei Jehovah Kamuktaindeng’ung’ kotugul.

²⁴ Ak ngo uuit banda eng’ inye, amu kebeberwechoto amu loo eng’ inye oloto leweni Jehovah Kamuktaindeng’ung’ konde kainennyi, ye tun iberurin Jehovah Kamuktaindeng’ung’;

²⁵ ialde anyun koek fedaisiek, ak irat si iib eng’ eung’ung’, ak iwe komosta ne leweni Jehovah Kamuktaindeng’ung’:

²⁶ ak iale fedaisiechoto kit age tugul ne machei muguleldang’ung’, ngo tuga, anan kechirek, anan divaik, anan maiyek, anan kiy age tugul ne machei sobondang’ung’: ak iam eng’ oloto eng’ taitab Jehovah Kamuktaindeng’ung’, ak ibaibaitu, inye, ak bikab gong’ung’.

²⁷ Amebagakte Lawindet ne mi kurgotiguk; amu matinyei kebeberta anan borotet koboten.

²⁸ Ye igesgei kenyit age tugul ne bo somok inemu kebeberwekab taman che bo rurateng’ung’ tugul eng’ kenyinoto, ak igonore oldang’ung’:

²⁹ si konyo Lawindet amu matinyei kebeberta anan borotet koboten, ak toondet, ak ne matinyei kwanda, ak mosok, choto mi kurgotiguk nyo koamis ak kobiyong’so; si koberurin Jehovah Kamuktaindeng’ung’ eng’ boisiet tugul ne bo euneguk.