NG'ATUTIK 13 - BUKUIT NE TILIL

Kiteechin bik si manamgei ak kanamonik

¹ Ngo biit maotiondo, anan karuotitoindo, ak koborun kaborunet anan kwong’utiet,

² ak koyaak kaborunonoto anan kwong’utionoto ne kimwaun, kole, Ongisub kanamonik, che kima ingen, ak ongeot choto;

³ ko meepchi it ng’alekab maotiondonoto, anan karuotitoindonoto: amu tiemok Jehovah Kamuktaindeng’wong’, si konai ngochame Jehovah Kamuktaindeng’wong’ eng’ mugulelwekwok komugul ak eng’ sobonwekwok komugul.

⁴ Obendate osub Jehovah Kamuktaindeng’wong’, oiywei inendet, ak orib ng’atutikyik, ak ogas it kutinnyi, oboisiechi ak onamge ak inendet.

⁵ Ak kibarei maotiondonoto anan karuotitoindonoto; amu kimwa kit ne ibeeti bik kobagakta Jehovah Kamuktaindeng’wong’, ne kiimutwok omong’une emetab Misri, ne kiitiachin eng’ gotab otwognatet, kole komaasin eng’ oret ne king’atin Jehovah Kamuktaindeng’wong’ iwendote. Iste anyun ko u noto yaitiet eng’ kwenung’ung’.

⁶ Ngo kaigain eng’ ung’ot ng’etab komet, anan wering’ung’, anan cheptang’ung’, anan osotiondeng’ung’ ne ichame, anan chorueng’ung’ ne ichame ko u ye ichame sobondang’ung’, kolenjin, Ngebe keot kanamonik, che kima ingen, inye, anan kwanisieguk;

⁷ kanamonikab bororiosiek che mi tabanwekwok, che negitenen anan che looenen, koboch tabanda age ne bo ng’ony agoi tabanda age;

⁸ ameyanji, anan igasyi; ama, ye igeer, irire, anan ibagakte, anan iuny:

⁹ ago bar anyun inendet iman; ngo sib kobar inendet eung’ung’, ak ye ibata kobar bik tugul.

¹⁰ Lach eng’ koik kot kome; amu kicheng’ei komaasin imete Jehovah Kamuktaindeng’ung’ ne kiimutun imong’une emetab Misri, eng’ gotab otwognatet.

¹¹ Ak kogas Israelik tugul, ak koiyweis, si mata koyai sogornatet ne u nito kogeny eng’ kwenung’ung’.

¹² Ngigas keng’alale age eng’ nganasoguk, ne konin Jehovah Kamuktaindeng’ung’ imeny, kelen,

¹³ Kamong’une kwenung’ung’ bik alak che yaach, ak koba komaas bik che menyei nganasenywa, kolenji, Ongebe keot cheptalelisiek, che mongen;

¹⁴ teeb anyun; ak icheng’, ak igin, igiiljige; ak keero, ngo imanit, ko u noto ng’olyondonoto, kele kogeyai kit ne kiwechei eng’ kwenung’ung’,

¹⁵ ibar anyun bikab nganasanato eng’ rotwetab chok, iwong’u, koboto tuguk tugul che mitei ak tuga.

¹⁶ Ak iyumji tugukyik tugul kwenutab oretab nganasanato, ak ibeel nganaset, ak tugukyik tugul kogesgei, ibeelji Jehovah Kamuktaindeng’ung’: ak koek tulwo koigeny; ma keteechei kogeny.

¹⁷ Amenam eng’ eung’ung’ kiy age tugul ne kigeisto: si koweek Jehovah kobagach neregekyik che koromen, ak korirenen, ak kochamin, ak kobarain, ko u ye kigoyosiechi kwanisieguk;

¹⁸ ye iepchi it kutitab Jehovah Kamuktaindeng’ung’, ak irib ng’atutikyik tugul che kang’atin rani, iyai noto bo iman eng’ taitab Jehovah Kamuktaindeng’ung’.