NG'ATUTIK 12 - BUKUIT NE TILIL

Ng’atutiet agobo komosato Tilil ne inegei

¹ Chu konetisiosiek ak kiruogutik che tun oribe oyae eng’ emet ne kigonok Jehovah Kamuktaindetab kwanisieguk, kobunjin kote osoptosi eng’ ng’ony.

² Ong’em anyun iman oldinwek tugul, ole kioote kanamonikwak bororiosiek che oluule, che mi tulonok che koen, ak che mi legemosiek, ak che mi ketik che tuonen kel:

³ ak obut kapkorosusiekwak ak otonaton tolochikwak, ak obeel Aserik; ak oluul kanamonikwak che kigiwai, ak ong’em kainenywa eng’ oloto.

⁴ Amoyachi Jehovah Kamuktaindeng’wong’ ko u noto.

⁵ Ago ole leweni Jehovah Kamuktaindeng’wong’ eng’ ortinwekwok tugul kole konde kainennyi oloto, ocheng’ anyun ole menyei inendet, ak iwe oloto:

⁶ oib kagochinoikwok che kibeelei, ak tiseiywekwok, ak kebeberwekwok, ak kagochinetab eunekwok ne kinamjin barak, ak kaarortaosiekwok, ak kagochinoikab chamnyet, ak che twatei tukwok ak kechirekwok:

⁷ oamisie eng’ oloto eng’ taitab Jehovah Kamuktaindeng’wong’, ak oboiboitu eng’ tugul che oyae eunekwok, okwek ak bikwok, eng’ che kaiberurun Jehovah Kamuktaindeng’ung’.

⁸ Amat oyai tuguk ko u ye kiyae rani, ko u ye keerei chi age tugul kochamei:

⁹ amu tom oit kamuung’et ak borotet ne konin Jehovah Kamuktaindeng’ung’.

¹⁰ Ago ye kaolande eng’ Jordan, obe omeny emet ne konok Jehovah Kamuktaindeng’wong’ onyaban, ak kogonok kamuung’et eng’ bunikwok tugul, che mi komoswek tugul, si omeng’isiei eng’ kalyet;

¹¹ egu anyun ole leweni Jehovah Kamuktaindeng’wong’ konde kainennyi kotebe, oibe koba oloto tugul che ang’atok; kagochinoikwok che kibeelei, tiseiywekwok, kebeberwekwok, kagochinetab eunekwok ne kinamjin barak, ak kaarortaosiekwok tugul che oarorjini Jehovah:

¹² si oboiboitu eng’ taitab Jehovah Kamuktaindeng’wong’, okwek, koboto werikwok, ak tibikwok, ak otwogikwok che murenik koboto otwogikwok che tibik, ak Lawindet ne mi kurgotikwok, amu matinyei inendet kebeberta anan borotet kobotok.

¹³ Ripgei si megoite kagochinoiguk che kibeelei eng’ oldo tugul ole igeere:

¹⁴ ago eng’ ole leweni Jehovah, eng’ age ne bo ortinweguk, igoite eng’ oloto kagochinoiguk che kibeelei, ak iyai eng’ oloto tugul che ang’atin.

¹⁵ Ago imuchi ieny ak iam banyek eng’ kurgotiguk tugul, ko u ye machei muguleldang’ung’, ko u kaberuretab Jehovah Kamuktaindeng’ung’ ne kigogonin: amei ne ng’wan ak ne ma ng’wan, ko u cheptirgichet, ak ko u teweretiot.

¹⁶ Ago amat oam korotik; otumji ng’ony ko u beek.

¹⁷ Amat iam eng’ kurgotiguk kebebertab beguk, anan ne bo divaiguk, anan ne bo mwaniguk, anan che twatei tuguk anan che bo kechireguk, anan kaarortaosieguk alak tugul che iarortoi, anan kagochinoiguk che bo chamnyet, anan kagochinetab eunekwok ne kinamjin barak:

¹⁸ ago iame tukchoto eng’ taitab Jehovah Kamuktaindeng’ung’, inye, ak wering’ung’, ak cheptang’ung’, ak otwogeng’ung’ ne muren, ak otwogeng’ung’ ne tie, ak Lawindet ne mi kurgotiguk: ak ibaibaitu eng’ taitab Jehovah Kamuktaindeng’ung’ eng’ kiy age tugul ne iyae euneguk.

¹⁹ Ripgei amebagakte Lawindet ko te isobe eng’ emeng’ung’.

²⁰ Ye katesun Jehovah Kamuktaindeng’ung’ kiwotet, ko u ye kiiarorun, ak ile, Amache aam banyek, amu machei sobondang’ung’ banyek; imuchi iam banyek, ko u ye machei sobondang’ung’.

²¹ Ak ngot ko loo eng’ inye ole leweni Jehovah Kamuktaindeng’ung’ konde kainennyi, ieny anyun che bo akweng’ung’ ak che bo kechireguk, che kigogonin Jehovah, ko u ye kiang’atin, ak iam eng’ kurgotiguk, ko u ye machei sobondang’ung’.

²² Ko u ye kiamei cheptirgichet ak teweretiot, iam anyun ko u noto: amei che ng’wonen ak che ma ng’wonen.

²³ Kobate amat iam korotik: amu sobondo korotik; amat iam sobondo koboto banyek.

²⁴ Amat iam; tumji ng’ony ko u beek.

²⁵ Amat iam; si komieit eng’ inye, ak eng’ lagoguk che biitu let, ye iyae noto mie eng’ taitab Jehovah.

²⁶ Koek kityo iibe tuguguk che tililen che itinye, ak kaarortaosieguk, ak iwe ole leweni Jehovah:

²⁷ ak igoite kagochinoiguk che kibeelei, banyek koboto korotik, eng’ kaptisisietab Jehovah Kamuktaindeng’ung’: ak kirong’jin korotikab tiseiyweguk kaptisisietab Jehovah Kamuktaindeng’ung’, ak iam banyek.

²⁸ Rib ak iepchi it ng’alechu tugul che kang’atin, si komieit eng’ inye ak eng’ lagoguk che biitu let agoi koigeny, ye iyae ne mie ak ne bo iman eng’ taitab Jehovah Kamuktaindeng’ung’.

²⁹ Ye tun ing’eto Jehovah Kamuktaindeng’ung’ bororiosiek eng’ taing’ung’, eng’ ole iwendi iname ak kobunjin choto, ak imeny emenywa;

³⁰ ripgei anyun, si mariichin kot isub ichek, ye kageng’em bichoto eng’ taing’ung’; ak iteeb agobo kanamonikwak, ile Ootitoi ano bororiosiechu kanamonikwak? Si ayai agane ko u noto.

³¹ Ameyachi ko u noto Jehovah Kamuktaindeng’ung’: amu kiy age tugul ne wegot eng’ Jehovah, ne wechei inendet, ko kiyachi ko u noto ichek kanamonikwak; amu beelei agot werikwak ak tibikwak kobeeljin kanamonikwak.

³² Orib kiy age tugul ne ang’atok oyai: amat ites, anan ichuchuch.