NG'ATUTIK 11 - BUKUIT NE TILIL

Kigiili bik kocham Jehovah ak kogas it inendet

¹ Cham anyun Jehovah Kamuktaindeng’ung’, ak irib kotigonennyi, ak konetisiosiekyik, ak kiruogutikyik, ak ng’atutikyik kotugul.

² Onai ra: amu mang’alaljini lagokwok che tom konai, che tom kogeer kotigonetab Jehovah Kamuktaindeng’wong’, etunatennyi, ak kamuktaennyi, ak eunnyi ne chuulat,

³ ak kaborunoikyik, ak boisionikyik, che kiyachi Parao laitoriatab Misri ak emennyi komugul, eng’ kwenutab Misri;

⁴ ak kit ne kiyachi lugetab Misri, ak mbartanyisiekwak, ak karisiekwak: ko u ye kiigochi komaluuch beekab Nyanjet ne Birir ye kiisubwok, ak kiiwong’ Jehovah ichek ko u noto agoi rani;

⁵ ak kit ne kiyaiywok eng’ ong’atet, agoi oitu yuto;

⁶ ak kit ne kiyachi Datan ak Abiram, werikab Eliab, weritab Reuben; ko u ye kiyat ng’ony kutinnyi, ak kolugui, koboto bikwak, ak emaisiekwak, ak tuguk tugul che soptos che kikwerioti ichek, eng’ kwenutab Israel tugul:

⁷ ago kigogeer konyekwok boisionik tugul che eechen che kiyai Jehovah.

⁸ Orib anyun ng’atutiet komugul ne kaang’atak rani, si ogimegitu, si oit emet ne obendi oname kobunjok;

⁹ si kochang’a betusiekwok eng’ emonoto, ne kiiyosiechi Jehovah kwanisiekwok kole igochin ichek ak iyotenywa ne biitu let, emet ne nyiitat chego ak kumik.

¹⁰ Amu ma u emet ne obendi oname kobunjok emetab Misri ne kiobunu, ole kiigole kesweguk, ak kiibisisie keldang’ung’, ko u kabungui:

¹¹ ago emet ne olang’jini omenye, kotinyei tulonok ak tembwosiek, ne eei beek che bo roptab kipsengwet:

¹² ribei emonoto Jehovah Kamuktaindeng’ung’; keerei Jehovah Kamuktaindeng’ung’ emonoto koboch taunetab kenyit agoi kogesgei kenyit.

¹³ Egu anyun, ngot ogas it eng’ kagiiletab ge ng’atutikyuk che kang’atak rani, ngocham Jehovah Kamuktaindeng’wong’, oboisiechi inendet eng’ mugulelwekwok tugul ak eng’ sobonwekwok tugul,

¹⁴ agonok anyun ropta ne bo emeng’wong’ eng’ betusiekyik, roptab iwotkut ak ne igesunegei, si iges beguk, ak divaiguk, ak mwaniguk.

¹⁵ Ak agonu suswek che bo tuguk eng’ emeng’ung’, ak iamisiei ibiye.

¹⁶ Oripgei anyun, si ma kiberber mugulelwekwok, ak omaste, oot kanamonik ak ogutung’ji;

¹⁷ ak kolalyo neregekab Jehovah eng’ okwek, ak koger kipsengwet, si ma koroboni, si ma koiyei emet; ak osib obegu eng’ emet ne kararan ne konok Jehovah.

¹⁸ Ogonore anyun ng’alechuchuk mugulelwekwok ak sobonwekwok; ak oratyi eunekwok koek kaborunet, ak koek ratutik che kirate anok eng’ turietab togochikwok.

¹⁹ Ak onet lagokwok choto, ye ong’alaldosi, ye itebye eng’ gong’ung’, ak ye iwendoti ak ye irue, ak ye ing’eete.

²⁰ Ak isirji tugatugikab gong’ung’, ak ormarichoguk:

²¹ si ko u ye ta komi kipsengwet ak ng’ony, tesoksei ko u noto betusiekwok, ak betusiekab lagokwok, eng’ emet ne kiiyosiechi Jehovah kwanisiekwok kole igochin.

²² Amu ngorib eng’ kagiiletab ge ng’atutioni komugul kaang’atak rani, oyai; ocham Jehovah Kamuktaindeng’wong’, obendate ortinwekyik tugul, ak onamge ak inendet;

²³ koon anyun Jehovah bororiosiechu tugul eng’ taing’wong’, ak oluul bororiosiek che eechen che kimen kosiirok.

²⁴ Bunjinok oldo tugul ole katiech kelyekwok: koboch ong’atet, ak Lebanon, koboch ainet, ainonoto Euprate, agoi nyanjet ne tokyingei ole roroktoe asista, oloto kiwoteng’wong’.

²⁵ Mabiitu chi ne imuchi kotonon eng’ taing’wong’: igochin Jehovah Kamuktaindeng’wong’ koiyweak ak kogonyitok emet komugul ne otieche, ko u ye kimwawok.

²⁶ Ogeero, kande taing’wong’ rani kaberuret ak chubisiet:

²⁷ egu kaberuret ngogas ng’atutikab Jehovah Kamuktaindeng’wong’, che kaang’atak rani;

²⁸ ak egu chubisiet ngo mogas ng’atutikab Jehovah Kamuktaindeng’wong’, ngomaste eng’ oret ne kaang’atak rani, osub kanamonik, che tom onai.

²⁹ Ak ye tun kagoitin Jehovah Kamuktaindeng’ung’ emet ne iname kobunjin, inde kaberuret tulwetab Gerisim, ak inde chubisiet tulwetab Ebal.

³⁰ Tos mami choto Jordan bitonin, ole tokyingei ole roroktoe asista, eng’ emetab Kananik che menyei Araba, ole tokyingei Gilgal, ole negite ketikab More?

³¹ Amu olandae Jordan obendi oname emet ne konok Jehovah Kamuktaindeng’wong’, kobunjok, ak omeny oloto.

³² Ak orib oyai konetisiosiek ak kiruogutik tugul che kande taing’wong’ rani.