NG'ATUTIK 10 - BUKUIT NE TILIL

Rirenetab Jehovah ko kit ne igochin bik kogas it

¹ Kilenja anyun Jehovah eng’ betunoto, Wai koik aeng’ che lebelen che u chu ki bo tai, ak itogosu oli ami eng’ tulwet, ak iyai moinget eng’ ketik.

² Si asirji koichato ng’alek chu kimi koik che bo tai che kiitue, si inde moinget.

³ Ayai anyun moinget eng’ ketikab shita, ak awai koik aeng’ che lebelen che u chu ki bo tai, atogoste tulwet, aibe koichato aeng’ eng’ eunnyu.

⁴ Ak kisir anyun koichato, ko u siret ne bo tai, ng’atutik taman, che kimwawok Jehovah eng’ tulwet komong’une mat eng’ betutab tuiyet: yeityo kogona Jehovah.

⁵ Aweege anyun, achoruge eng’ tulwet, ande koichato moinget ne kiga ayai; ak mi oloto, ko u ye king’ata Jehovah.

⁶ (Ak kiba lagokab Israel eng’ Berot Bene-jaakan agoi koit Mosera: kimechi Aron oloto, ak kigitupchi oloto; ak kiyai Eleasar werinnyi boisietab tiseinatet kogeer inendet.

⁷ Kiba eng’ oloto agoi Gudgoda; ak kiba eng’ Gudgoda agoi Jotbata, emet ne mi kererusiek.

⁸ Kiitaban Jehovah eng’ betusiechoto oretab Lawi, koib moingetab arorutietab Jehovah, kotononso eng’ taitab Jehovah koboisiechi, koberur bik eng’ kainennyi, agoi ra.

⁹ Manyoru Lawik anyun, amu noto, kebeberta anan borotet koboto tupchosiekyik; Jehovah borotennyi, ko u ye kimwachi Jehovah Kamuktaindeng’ung’.)

¹⁰ Kiatebi eng’ tulwet anyun ko u tai, betusiek artam ak kemousiek artam: ak kigasa Jehovah betunoto agine; ak mata komach Jehovah kowong’un.

¹¹ Ak kilenja Jehovah, Ng’eet, indochi bik; si koba konam emet ne kiayosiechi kwanisiekwak ale agochini.

¹² Ara anyun Israel, nee ne magenen Jehovah Kamuktaindeng’ung’, kobate iywei Jehovah Kamuktaindeng’ung’, iwendote ortinwekyik tugul, ak icham inendet, ak iot Jehovah Kamuktaindeng’ung’ eng’ muguleldang’ung’ tugul ak eng’ sobondang’ung’ tugul,

¹³ irib ng’atutikab Jehovah, ak konetisiosiekyik, che kaang’atin rani si komieit eng’ inye?

¹⁴ Keero, bo Jehovah Kamuktaindeng’ung’ kipsengwet, ak kipsengwet ne bo kipsengwetisiek, ng’ony ak tugul che mitei.

¹⁵ Ago kibaibait Jehovah eng’ kwanisieguk kocham ichek, ak kilewen iyotenywa ne biitu let, okwek choto, eng’ bik tugul, ko u rani.

¹⁶ Omuratan mugulelwekwok anyun, amoegu bik che uuen metowek.

¹⁷ Amu Jehovah Kamuktaindeng’wong’ ko Kamuktaindet ne siirei cheptalelisiek, ak Kiptaiyatab kiptainik, Kamuktaindet ne o, ne bo kamuktaet, ne bo kamuiset, ne matiytii bik, ne mataachei che bo kagaigaet.

¹⁸ Inendet ne yachin imanda ne matinyei kwanda, ak ne mosok, ak kochamei toondet, igochin amitwogik ak ngoroik.

¹⁹ Ocham anyun toek: amu ki o toek eng’ emetab Misri.

²⁰ Iywei anyun Jehovah Kamuktaindeng’ung’; boisiechi inendet; onamgei ak inendet, ak iyosie eng’ kainennyi.

²¹ Inendet kalosuneng’ung’, ak ko Kamuktaindeng’ung’, ne kiyaun tuguchu eechen che bo kamuiset, che kiigeer.

²² Ki bik tamanwogik tisab kwanisieguk ye kichorjingei Misri; ago kagoyain Jehovah Kamuktaindeng’ung’ itenitu kecheikab kipsengwet eng’ chang’indo.