NG'ATUTIK 1 - BUKUIT NE TILIL

Ng’alek che kindoune

¹ Chu Ng’alek che kimwachi Musa Israelik tugul eng’ Jordan bitonin eng’ ong’atet, eng’ Araba ne tokyingei Sup, kwenutab Paran, ak Topel, ak Laban, ak Haserot, ak Di-sahab.

² Bandab betusiek taman ak agenge kong’eete Horeb eng’ oret ne bunei tulwetab Seir agoi Kades-Barnea.

³ Ak kimwachi Musa lagokab Israel eng’ kenyitab artam, eng’ arawetab taman ak agenge, eng’ betut ne bo tai ne bo arawet; ko u tugul che kiga kogochi Jehovah inendet eng’ ng’atutik, si kogochi ichek;

⁴ ye kingo kagobar Sihon laitoriatab Amorik, ne kimenyei Hesbon, ak Og laitoriatab Basan, ne kimenyei Astarot, eng’ Edrei.

Tetu Musa bandab Israelik kong’eete Horeb agoi Kades

⁵ Eng’ Jordan bitonin eng’ emetab Moab, kotoi anyun Musa kobor ng’atutioni, kole,

⁶ Kimwawech Jehovah Kamuktaindennyo eng’ Horeb, kole, Kogoyam betusiek che kiomeny tulwoni:

⁷ oweege, onam bandang’wong’, ak obe emet ne bo tulonok ne bo Amorik, ak oldinwek tugul che negite oloto, eng’ Araba, eng’ emetab tulonok, ak eng’ warenget, ak eng’ komostab Murot ne bo Tai, ak eng’ ole negite ngegut, emetab Kananik, ak Lebanon, agoi ainet ne o, ainonoto ko Euprate.

⁸ Ogeero, kande emet taing’wong’: omong’ji anyun kobunjok emet ne kiiyosiechi Jehovah kwanisiekwok, Abraham, Isak, ak Jakobo, kole igochin ak iyotenywa ne biitu let.

⁹ Ak kiamwawok eng’ betunoto alenjok, Mamuchi agesenak anege:

¹⁰ kigotesaak Jehovah Kamuktaindeng’wong’, ak ogeero, o chang’ rani ko u kecheikab kipsengwet.

¹¹ Ingotesaak Jehovah Kamuktaindetab kwanisiekwok, konyil elfut kosiir koiteng’wong’ ne bo nguno, ak ingoberurok, ko u ye kigoaroruok!

¹² Amuktoi ano anege agesen kaiimeng’wong’, ak lautieng’wong’, ak borieng’wong’?

¹³ Olewenjigei bik che ng’omen, che tinyei naet, che toogunotin, ko u ortinwekwok, si agochi kondoiywok.

¹⁴ Ak kiolenja, Mie kioto kemwawech keyai.

¹⁵ Kianam anyun kandoikab ortinwekwok, bik che ng’omen, ak ko toogunotin, ak kiagochi kondoikwok, koek kiptainikab elfusiek, ak kiptainikab bogolusiek, ak kiptainikab konomusiek, ak kiptainikab tamanusiek, ak bounik ko u ortinwekwok.

¹⁶ Ak kiang’at kiruogikwok betunoto alenji, Ogasyi ng’alek tupchosiekwok, oruokyi eng’ imanda chi ak ne tupcho, ak toondet ne mi koboto inendet.

¹⁷ Amotiytii bik eng’ kiruoget; ogasyi ne ming’in ak ne o kogergeit; amoiywei togoch ne bo chi; amu bo kiruoget Kamuktaindet: ak ng’olyot ne katemenak, oibwa, si agas.

¹⁸ Ak kiang’atak eng’ betunoto agobo tuguk tugul che kanyol oyai.

¹⁹ Ak kigibe eng’ Horeb, ak kigibun ong’atet tugul, noto o ak komuisei ne kiogeer; kigibunu oret ne bo emetab tulonok ne bo Amorik, ko u ye king’atech Jehovah Kamuktaindennyo; ak kigibwa agoi Kades-barnea.

²⁰ Ak kialenjok, Kaoitu emetab tulonok ne bo Amorik, ne konech Jehovah Kamuktaindennyo.

²¹ Ogeero, kagonde Jehovah Kamuktaindeng’ung’ emet taing’ung’: togoste anyun, nam kobunjin, ko u ye kimwaun Jehovah Kamuktaindetab kwanisieguk; ameiywei, anan iarogen.

²² Ak kiobwa ole ami, age tugul eng’ okwek, obwa olenja, Ongiyokte bik kondoenech, koba kosegeiywech emet, si kobwa komwawech ole teptoi oret ne kebune ketogostoi, ak nganasok che kiite.

²³ Ak kiibaibaa kioto komie: ak kianam murenik taman ak aeng’ eng’ okwek, agenge eng’ oret age tugul:

²⁴ ak kiweek kotogosta tulwet, ak kiit atebwetab Eskol, ak kisegei oloto.

²⁵ Ak kibut logoekab emonoto, ak koibwech, ak kiibwech ng’alek agichek, ak kole, Mie emonoto konech Jehovah Kamuktaindennyo.

²⁶ Ago kima ocham otogoste oloto, ago kiobistoe ng’atutietab Jehovah Kamuktaindeng’wong’;

²⁷ ak kiong’unyng’ung’se eng’ emaisiekwok, ole, Kiimoong’wech Jehovah eng’ emetab Misri amu kiwechech, si kobiit kondeech eunekab Amorik kobarech.

²⁸ Kitogostoi kebendi ano, anyun? Kiigochi tupchosiekyok mugulelwekyok kochootyo, kolenjech, Eechen bik ak ko koen kosiirech; eechen nganasok, kigiteech irimosiekwak kot koit kipsengwet; ak ne siirei noto ko kigigeerji oloto werikab Anagik.

²⁹ Kialenjok anyun, Amongomuok, anan oiywei ichek.

³⁰ Yaei boriet agobo okwek Jehovah Kamuktaindeng’wong’ ne indoenok, ko u tugul che kiyaiywok eng’ Misri eng’ taing’wong’,

³¹ ak eng’ ong’atet ole kiigeer ile kigesenunenen Jehovah Kamuktaindeng’wong’, ko u ye keseni chi werinnyi, eng’ ortinwek tugul che kiobunu agoi oitu olito.

³² Ago ma oyan Jehovah Kamuktaindeng’wong’ eng’ ng’olyondoni,

³³ inendet ne kiindoenak eng’ oret, si kocheng’wok ole oteeche emaisiekwok, si koboruok eng’ mat oret ne obendi kemoi, ak eng’ boldet bet.

³⁴ Ak kigas Jehovah twegunetab ng’alekwok, ak kinerech, ak kiiyosio, kole,

³⁵ Mageerei iman agot agenge eng’ bichu bo ibini ya, emet ne kararan, ne kiayosie ale agochini kwanisiekwok,

³⁶ kobate Kaleb weritab Jepune; keerei inendet; ak agochini inendet emonoto kitiech, koboto lagokyik: amu kiisub Jehovah eng’ kagesunatetab ge.

³⁷ Ak kinerekya Jehovah amu okwek, kole, Memandoi aginye oloto:

³⁸ itei Josua weritab Nun, inendet ne tononi eng’ taing’ung’: igimit inendet; amu igochin inendet Israel konyaban emonoto.

³⁹ Ak itei oloto lagokwok che mengech che kiomwa ole egu luulenik, ak lagokwok, che nguno ko maingen ne mie anan ne ya, choto che itei oloto, ak agochini ichek emet kobunji.

⁴⁰ Ago oweege okwek, ak onam bandang’wong’ agoi omande ong’atet eng’ oret ne wendi Nyanjet ne Birir.

⁴¹ Kiowolwa anyun olenja, Kigiyachi Jehovah tengekto, kibendi keyai boriet, ko u tugul che king’atech Jehovah Kamuktaindennyo. Ak kiorat chi tugul karikyik che bo luget, ak kiosartae obe tulwet.

⁴² Ak kilenja Jehovah, Ilenji, Amat otogoste anan oyai boriet; amu mami ane kwenung’wong’; si ma kibarak eng’ taitab bunikwok.

⁴³ Kiang’alalwok anyun ko u noto, ak kima ogas; kiongelelji ng’atutietab Jehovah, ak kiomenege, ak kiotogoste tulwet.

⁴⁴ Ak kimong’jok Amorik che kimenyei tulwonoto, nyo koonak, ko u ye onei bich segemik, ak kiiterteranwak ochorjinigei Seir, agoi Horma.

⁴⁵ Ak kioweege oririe eng’ taitab Jehovah; ago ma kas Jehovah kuting’wong’, ama epchok it.

⁴⁶ Kiotebe anyun Kades betusiek che chang’, che te betusiek che kiotar eng’ yoto.