NG'ANG'UTYET 9 - BUKUIT NE TILIL

¹ Ak kiguut malaikaiyatab mut, ak kiageer kecheiyat kobunu kipsengwet kobutyi ng’ony: ak kigigochi inendet yateiywot ne bo keringet ne maigoksei.

² Ak kiyat keringonoto; ak kitogosta iyeto komong’une keringonoto, ne u iyeto ne bo mat ne o mising’; ak koimenit asista ak soet amu iyetab keringonoto.

³ Ak kimong’une chereng’enyinik iyeto kobwa ng’ony; ak kigigochi ichek kimnatet, ko u ye tinyei kimnatet melmelwekab ng’ony.

⁴ Ak kigimwachi ichek kelenji amat kong’em suswekab ng’ony, anan kiy age tugul ne tuon, anan ko ketit age tugul, ago bichoto ichegei che matinyei ng’oksetab Jehovah eng’ togochikwak.

⁵ Ak kiging’at ichek kelenji amat kobar bichoto, ago si kobiit kinyalil ichek arawek mut: ak ki u kanyalilenywa kanyaliletab melmeldo, ye kauut chito.

⁶ Ak tun cheng’ei bik meet eng’ betusiechoto, ak magoi nyor; ak machei kole kobek, ak komweei meet eng’ ichek.

⁷ Ak ki u itonwekab chereng’enyinichoto mbartanyisiek che chobotin koba luget; ak ki u yo mi metowekwak kutonok che kergei ak tahabu, ak ki u togochikwak togochikab bik.

⁸ Ak kitinyei sumeek che u sumeekab kwonyik ak ki u kelekwak kelekab ng’etunyik.

⁹ Ak kitinyei tuguk che kiilaakyi teget ko u che bo karik; ak ki u cheetab kebebaikwak cheetab karisiek, che bo mbartanyisiek che chang’ che ruaei kobendi luget.

¹⁰ Ak kotinyei katutaik che u che bo melmelwek, ak utet; ak mi kimnatenywa katutaikwak ne inyalile bik eng’ arawek mut.

¹¹ Ak kitinyei ichek laitoriat ne bou, noto ko malaikaiyatab keringet ne maigoksei: ne kainennyi eng’ kutitab Hebranik ko Abaddon, ak eng’ Yunanik ko Apollyon.

¹² Kagosiirto Nyalilda ne bo tai: ogeero, ta kobwanei Nyalilwogik alage aeng’u.

¹³ Ak kiguut malaikaiyatab lo, ak kiagas kutit ne mong’une kuinoikab kapkorosutab tahabu ne mi taitab Jehovah,

¹⁴ komwachin age malaikaiyandanato bo lo, ne kitinyei iriaget, kolenji, Itiach malaikaisiek ang’wan che ratotin eng’ ainet ne bo Euprate.

¹⁵ Ak kigitiach malaikaisiechoto ang’wan, che kiga kechob agobo sait ak betut ak arawet ak kenyit, si kobar kebeberta agenge eng’ somok ne bo bik.

¹⁶ Ak kiek koitetab lugosiek che bo bik che lanyei mbartanyisiek elfusiek taman konyil elfusiek taman konyil aeng’: kiagas koitenywa.

¹⁷ Ak kiageer ko u noto mbartanyisiek eng’ ng’ang’utiet, ak icheget che kilanyei, kotinyei tuguk che kilaakyin tegetik che u mat ak che u huakinto ak che u koik che laldos: ak ki u metowekab mbartanyisiek metowekab ng’etunyik; ak komong’une kutuswekwak mat ak iyeto ak koik che laldos.

¹⁸ Ak kigibar korotwechoto somok kebeberta agenge eng’ somok ne bo bik, eng’ mat ak eng’ iyeto ak eng’ koik che laldos, che kimong’une kutuswekwak.

¹⁹ Amu mi kimnatetab mbartanyisiek kutuswekwak, ak katutaikwak, amu kergei katutaikwak ak erenok, ak kotinyei metowek; ak konyalilsie tuguchoto.

²⁰ Ak ma sik bik che kiga ng’et, che kima kibar eng’ korotwechoto, eng’ boisionikab eunekwak si mata kosa oik, ak kanamonikab tahabu, ak che bo feda, ak che bo sugunonik, ak che bo koik, ak che bo ketik; ak maimuchi kogeerto, anan kogasta anan kobendat:

²¹ ama sik eng’ rumisiosiekwak, anan eng’ banisiosiekwak, anan eng’ soksenywa, anan eng’ chorsosiekwak.