NG'ANG'UTYET 7 - BUKUIT NE TILIL

Keng’ochi bik elfusiek bogol ak artam ak ang’wan

¹ Kingobata nito ageer malaikaisiek ang’wan kotonondos eng’ luukwek ang’wan che bo ng’ony, konamei usonaik ang’wan che bo ng’ony, si mata kousyi usonet ng’ony, anan nyanjet, anan ketit age tugul.

² Ak kiageer malaikaiyat age kotogosta kobunei kong’asis, kotinyei ng’oksetab Jehovah ne sobei: ak kimwachi malaikaisiek ang’wan eng’ kutit ne o, che kigigochi kong’em ng’ony ak nyanjet,

³ kolenji, Among’em ng’ony, anan nyanjet, anan ketik, kot kinde ng’okset togochikab otwogikab Jehovah nenyo.

⁴ Ak kiagas koitetab icheget che kiging’och, ko kiek elfusiek bogol ak artam ak ang’wan, che kiging’och eng’ oret age tugul ne bo lagokab Israel.

⁵ Kiging’och elfusiek taman ak aeng’ che bo oretab Juda; Ak kiek che bo oretab Reuben elfusiek taman ak aeng’; Ak kiek che bo oretab Gad elfusiek taman ak aeng’;

⁶ Ak kiek che bo oretab Aser elfusiek taman ak aeng’; Ak kiek che bo oretab Naptali elfusiek taman ak aeng’; Ak kiek che bo oretab Manase elfusiek taman ak aeng’;

⁷ Ak kiek che bo oretab Simeon elfusiek taman ak aeng’; Ak kiek che bo oretab Lawi elfusiek taman ak aeng’; Ak kiek che bo oretab Isakar elfusiek taman ak aeng’;

⁸ Ak kiek che bo oretab Sebulun elfusiek taman ak aeng’; Ak kiek che bo oretab Josep elfusiek taman ak aeng’; Ak kiginoch che bo oretab Benjamin elfusiek taman ak aeng’.

Ng’ang’utiet agobo che kigial, che mi kipsengewet

⁹ Kingobata tuguchu, ageer, ogeero, tuiyet ne o, ne kima komuchi chi koiit, che bunu bororiet age tugul, ak oret age tugul ak bik ak kutuswek, kotonondos eng’ taitab ng’echeretab laitornatet ak eng’ taitab Aruet, kolaachi ngoroik che leelach, ak kotinyei temenikab sosik eng’ eunekwak;

¹⁰ ak komwaei eng’ kutit ne o, kole, Bo Yetunet Jehovah nenyo ne tebe ng’echeretab laitornatet, ak ko bo Aruet.

¹¹ Ak kitonondos malaikaisiek tugul ko kayiem ng’echeretab laitornatet, ak boisiek, ak tiong’ik ang’wan che soptos; ak kiibutyi ng’ony eng’ taitab ng’echeretab laitornatet, ak kolos Jehovah,

¹² kole, Amen; Bo Jehovah nenyo kaberuret, ak torornatet, ak ng’omnatet, ak kongoi, ak teegisto, ak kamuktaet, ak kimnatet, koigeny ak koigeny. Amen.

¹³ Ak kimwawa age eng’ boisiek, kolenja, Chu ilaachi ngoroik che leelachen ko ng’o, ak kobunu ano?

¹⁴ Ak kialenji inendet, Kiptaiyandennyu, ingen inye. Kolenja anyun, Chu ko ichek che bunu nyalilda ne o, ak kigomwet ngoroikwak koleelagitu eng’ korotikab Aruet.

¹⁵ Mi anyun ichek taitab ng’echeretab laitornatet ne bo Jehovah; ak koboisiechin inendet bet ak kemoi eng’ hekalunnyi: ak koiito inendet ne tebe ng’echeretab laitornatet emainnyi eng’ baragunywa.

¹⁶ Ma kogasei rubet kogeny, ama koamei melelda kogeny; ama kobirei ichek asista, ama kobeelei ichek mat age tugul:

¹⁷ amu egu Mestowondenywa Aruet ne mi kwenutab ng’echeretab laitornatet, ak kondochin ichek koba kong’ikab beek che soptos: ak kouus Jehovah beekab kong’ alak tugul eng’ konyekwak.