NG'ANG'UTYET 6 - BUKUIT NE TILIL

Keyatei ng’oksosiek

¹ Ak kiageer ye kingoyat Aruet age eng’ ng’oksosiechoto tisab, ak kiagas age eng’ tiong’ichoto ang’wan soptos komwaei eng’ cheet ne u tulet, kole, Nyo.

² Ak kiageer, ogeero, mbartanyit ne leel, ak kitinyei kwanget inendet ne kitebe; ak kigigochi inendet kutwet: ak kiwa eng’ katerteret, ak koterteris.

³ Ak ye kingoyat ng’okset ne bo aeng’, agas tiondo ne bo aeng’ ne sobei kole, Nyo.

⁴ Ak kimong’ mbartanyit age, ne birir: ak kigigochi inendet ne kitebe, koisto kalyet kobet eng’ ng’ony, si kobiit kobargei ichegei: ak kigigochi inendet rotwetab chok ne o.

⁵ Ak ye kingoyat ng’okset ne bo somok, agas tiondo ne sobei ne bo somok kole, Nyo. Ak kiageer, ogeero, mbartanyit ne tuui; ak kitinyei ratilit eng’ eunnyi inendet ne tebe.

⁶ Ak kiagas ne u kutit eng’ kwenutab tiong’ichoto ang’wan soptos kole, Kialdae kibabetab nganok denarit agenge, ak kialdae kibabok somok che bo sairik denarit agenge; ameng’em mwaita ak divaik.

⁷ Ak ye kingoyat ng’okset ne bo ang’wan, agas kutitab tiondo ne sobei ne bo ang’wan kole, Nyo.

⁸ Ak kiageer, ogeero, mbartanyit ne talelyo: ak kainetab inendet ne kitebe ko ki Meet; ak kiisub inendet oldab che kigobek. Ak kigigochi ichek kimnatet koboi kebeberta agenge eng’ ang’wan ne bo ng’ony, kobare rotwetab chok, ak rubet, ak meet, ak tiong’ikab timin che bo ng’ony.

⁹ Ak kingoyat ng’okset ne bo mut, ageer eng’ kureretab kaptisisio sobonwekab ichek che kigibar amu ng’olyotab Jehovah, ak baornatet ne kitinyei:

¹⁰ ak kimwa eng’ kutit ne o kole, Tianitu, ee Kiptaiyat, ne tilil ak ko bo iman, si iruokyi ak iyaaktoiywech mugetut agobo korotikyok eng’ ichek che menyei ng’ony?

¹¹ Ak kigigochi age tugul eng’ ichek ngoriet ne leel; ak kelenji ko ta komuuny ne matia, kot kosulda koitetab che otwogik koboto ichek, ak tupchosiekwak, che tun kibarei ko u icheget.

¹² Ak kiageer ye kingoyat ng’okset ne bo lo, ak kibiit botanet ne o ne bo ng’ony: ak kituuiit asista ko u kuniet ne kigiyae kororik, ak kiigei arawet komugul korotik;

¹³ ak kotururjigei ng’ony kecheikab barak, ko u ye ibutos eng’ mogoiywet logoekyik, kotom korurio, ye itumdumi usonet ne o.

¹⁴ Ak kigiisto kipsengwet ko u kartasit ne kimamani; ak kigiisto eng’ komoswekwak tulwet age tugul ak emet age tugul ne kiikwen beek.

¹⁵ Ak kiung’gei eng’ kebenonik ak ruandosiek che bo tulonok, laitorinikab ng’ony, ak bounik, ak kiptainik che eechen, ak magorek, ak che kimen, ak chi age tugul ne ratat ak chi age tugul ne itiagat;

¹⁶ ak kolenji tulonok ak ruandosiek, Oluuljech, ak ounyech eng’ togetab inendet ne tebe ng’echeretab laitornatet, ak eng’ neregekab Aruet:

¹⁷ amu kagoit betut ne bo neregekwak; ak ng’o ne imuchi kotonon?