NG'ANG'UTYET 4 - BUKUIT NE TILIL

Ng’ang’utiet agobo kipsengwet

¹ Kingobata tuguchu, ageer, ogeero, kiyatak kurget eng’ kipsengwet, ak kutit ne bo tai ne kiagas ko ki u ne bo iriaget, ne king’alalwa kole, Togosu oli, si aborun tuguk che tun biitu eng’ let matiny.

² Ak kiami anyun eng’ Tamirmiriet eng’ yoto: ak ogeero, kiginde kipsengwet ng’echeretab laitornatet, ak kimi chito ne kitebe ng’echeranato;

³ ak inendet ne kitebyei ko kingegeerei, ko u koitab jasipi ak sardio: ak kimi chemng’isiriet ne kiyiem ng’echeretab laitornatet, ne kingegeerei, ko u sumaragdo.

⁴ Ak kiyiem ng’echeranato bo laitornatet, ng’echerok tiptemu ak ang’wan che bo laitornatet: ak kitebe boisiek tiptemu ak ang’wan ng’echerochoto, kolaachi ngoroik che leelachen; ak kotinyei eng’ metowekwak kutonok che bo tahabu.

⁵ Ak mong’une ng’echeranato kalyelet ak kutuswek ak tulosiek. Ak kilaldos taisiek tisabu che bo mastinwek eng’ taitab ng’echeranato bo laitornatet, choto ko Tamirmirik tisab che bo Jehovah;

⁶ ak ki u taitab ng’echeranato bo laitornatet, nyanjet ne bo glasit, ne u krustalo; ak kimi kwenutab ng’echeranato bo laitornatet, ak kiyiem komoswek tugul che bo ng’echeranato komuut, tuguk ang’wanu che soptos che nyiitotin konyek tai ak let.

⁷ Ak ki kergei tiondo ne bo tai ak ng’etundo, ak ki kergei ne bo aeng’ ak moita, ak kitinyei ne bo somok toget ne u ne bo chito, ak ki u ne bo ang’wan kipsichit ne tirireni.

⁸ Ak nyiitotin tiong’ichoto ang’wan soptos konyek, komoswek tugul ak orit, kotinyei age tugul kebebaik lo: ama imuunyi ichek bet ak kemoi, komwaei kolen, Tilil, tilil, tilil, Kiptaiyat Jehovah, Kamuktaindet, ne kimi ak komi ak kotun nyonei.

⁹ Ak ye igochi tuguchoto soptos torornatet ak teegisto ak kongoi inendet ne tebe ng’echeranato bo laitornatet, inendet ne sobei koigeny ak koigeny,

¹⁰ kobutyi anyun boisiechoto tiptemu ak ang’wan taitab inendet ne tebe ng’echeranato bo laitornatet, ak kogutung’ji inendet ne sobei koigeny ak koigeny, ak kowirji ng’ony kutonokwak che bo tahabu eng’ taitab ng’echeret, kolen,

¹¹ Nyoljinin, Kiptaiyandennyo ak ko Jehovah nenyo, itaach torornatet ak teegisto ak kamuktaet: amu kiitau iyae tuguk tugul, ak kibiit amu mageng’ung’, ak kigiyai.