NG'ANG'UTYET 3 - BUKUIT NE TILIL

Baruet ne kigisirji kaniset ne mi Sarde

¹ Ak isirji malaikaiyatab kaniset ne mi Sarde, ilenji: Mwaei tuguchu inendet ne tinyei Tamirmirik tisab che bo Jehovah, ak kecheik tisab: Angen boisioniguk, ale itinye kainet kele isobe, ago kaimei.

² Egu ne ripsei, ak igimit tuguk che ng’etunotin, che machei kobek: amu tom anyoru boisioniguk che kigosulda eng’ taitab Jehovah nenyu.

³ Ibwat anyun ole kiitaakte, ak ole kiigaste; ak irib, ak isigu. Ngot ko meripse anyun, anyone ko u chorindet, amenae sait ne anyonjinenen.

⁴ Ago itinye kainaik che ng’ering’ eng’ Sarde che ma imuruon ngoroikwak: ak tun bendoti ichek kobota kolaagoti ngoroik che leelach; amu nyolu ichek.

⁵ Inendet ne iterteri kotun kilaakyin ko u noto ngoroik che leelach; ak magoi abuch kainennyi eng’ bukuitab sobondo, ago ang’anye kainennyi eng’ taitab Baba, ak eng’ taitab malaikaisiekyik.

⁶ Inendet ne tinyei itit, kogas kit ne mwachin Tamirmiriet kanisosiek.

Baruet ne kigisirji kanset ne mi Piladelpia

⁷ Ak isirji malaikaiyatab kaniset ne mi eng’ Piladelpia, ilenji: Mwaei tuguchu inendet ne tilil, inendet ne bo iman, inendet ne tinyei yateiywotab Daudi, inendet ne yatei, ama kerei chi, ak ne kerei, ama yatei chi:

⁸ Angen boisioniguk (keero, kaande taing’ung’ kurget ne yatat, ne maimuchi chi koger), ale itinye kimnatet ne ming’in, ak kiirib ng’olyondennyu, ama iesie kainennyu.

⁹ Keero, agochini che bo sunagogitab Setani, icheget che mwaei kole ki Yahudik, ago ma ichek, kenu, keero, agochini ichek kobwa kogutuny eng’ kelyeguk, ak konai kole kiachamin.

¹⁰ Amu kiirib ng’olyotab muitaennyu, aribin agane eng’ saitab yomset, ne nyonjin ng’ony komugul, si kotiem ichek che menyei ng’ony.

¹¹ Anyone achogu: nam mising’ noto itinye, si marebenen chi kutweng’ung’.

¹² Inendet ne iterteri, ayae koek toloita eng’ hekalut ne bo Jehovah nenyu, ama komandoi sang’ kogeny: ak asirjini inendet kainetab Jehovah nenyu, ak kainetab nganasetab Jehovah nenyu, noto Jerusalem ne leel, ne chorugei eng’ kipsengwet kobunu Jehovah nenyu, ak kainennyu ne leel.

¹³ Inendet ne tinyei itit, kogas kit ne mwachin Tamirmiriet kanisosiek.

Baruet ne kigisirji kaniset ne mi Laodikia

¹⁴ Ak isirji malaikaiyatab kaniset ne mi Laodikia, ilenji: Mwaei tuguchu inendet ne Amen, baoriat ne kiyani ak ko bo iman, taunetab yaetab Jehovah:

¹⁵ Angen boisioniguk, ale ma i kaitit ametinye mat: kata achame nda kai kaitit anan itinye mat.

¹⁶ Noto anyun amu i lalang’, ametinye mat anan kaititindo, ang’ung’doin eng’ kutinnyu.

¹⁷ Amu imwae ile, A magorio, ak kiasich magornatet, ama abanani kiy; amengen ile i chito ne i kimnyaliliat ak itinye rirek ak ko i kibananiat ak ko i kipkoratiat ak imi ach ngor:

¹⁸ aborun ale ialena tahabu ne kigitilile mat, si iegu magoriot; ak ngoroik che leelach, si ilaaige, si matook kalilanetab ach ngoring’ung’; ak kerichekab konyek che iile konyeguk si igeerte.

¹⁹ Agere kong’ tugul che achame ak atigoni: igiilge anyun, ak isigu.

²⁰ Keero, atononi eng’ kurget ak agongonyi: ngo kas chi kutinnyu ak koyat kurget, awendi ole mi inendet, ak aamisie koboto inendet, ak koamis inendet kobota.

²¹ Inendet ne iterteri, kotun agochini kotebi kobota eng’ ng’echerennyu ne bo laitornatet, ko u ye kiaterter agane, ak ketebi ak Baba eng’ ng’echerennyi ne bo laitornatet.

²² Inendet ne tinyei itit, kogas kit ne mwachin Tamirmiriet kanisosiek.