NG'ANG'UTYET 22 - BUKUIT NE TILIL

¹ Ak kiiborua ainetab beekab sobon, ne tilil ko u krustalo, kobunu ng’echeretab laitornatet ne bo Jehovah ak ne bo Aruet,

² eng’ kwenutab orinnyi. Ak kimi ketitab sobon ainonoto, komosi ak komosi, ne yiei logoek taman ak aeng’ che terjin, ak koyiei logoekyik eng’ arawet age tugul: ak kisoobi bororiosiek eng’ sogekab ketoto.

³ Ama komi chubisiet kogeny: ak tun mi orinnyi ng’echeretab laitornatet ne bo Jehovah ak ne bo Aruet: ak yachin boisiet inendet otwogikyik;

⁴ ak keerei togennyi; ak mi kainennyi togochikwak.

⁵ Ama komi kemout kogeny; ama machei lapkeiyetab tait, anan ko lapkeiyetab asista; amu igochin ichek lapkeiyet Kiptaiyat Jehovah: ak laitorani ichek koigeny ak koigeny.

Ng’alek che bo let

⁶ Ak kilenja, Ng’alechu ko che kiyani ak ko bo iman: ak kiiyok Kiptaiyat, ne Jehovah ne bo tamirmirikab maotik, malaikaiyandennyi koborji otwogikyik tuguk che sib kobiitu matiny.

⁷ Ak ogeero, anyone achogu. Baibai ne ribei ng’alekab maoinatetab bukuini.

⁸ Ane Johana ne kiagas tuguchu ak ageer. Ak ye kingagas ak ageer, abutyi ng’ony alosu eng’ kelyekab malaikaiyat ne kiiborua tuguchuto.

⁹ Ak kolenja, Amat iyai ko u noto: amu ki otwogik koboto tupchosieguk maotik, ak koboto ichek che ribei ng’alekab bukuini; ilosu Jehovah.

¹⁰ Ak kilenja, Amat ing’och ng’alek che bo maoinatetab bukuini; amu kagorik betusiek.

¹¹ Inendet ne ma bo imanda, koyai che ma bo imanda kosiir: ak inendet ne bo simdo, ingoek ne bo simdo kosiir: ak inendet ne bo imanda, koyai che bo imanda kosiir: ak inendet ne tilil, ingotililit kosiir.

¹² Ogeero, anyone achogu; ak aibu melektanyu si agochi chi age tugul ko u boisionikyik.

¹³ A Alpha ak ko a Omega, ne bo tai ak ne bo let, taunet, ak kagesunet.

¹⁴ Boiboen ichek che mwetei ngoroikwak, si kobiit kosich chamjinet koit ole mi ketitab sobondo, ak kobun kurgotik kobendi nganaset orit.

¹⁵ Mi sang’ sesenik, ak bonik, ak che soksei, ak rumik, ak che saei kanamonik, ak age tugul ne chamei lembeita ak koyaei.

¹⁶ Ane Jesu ne kaayogu malaikaiyandennyu si kobaorianwok tuguchu eng’ kanisosiek. A tigitiot ak keswotab Daudi, taboiyot ne bo karon ne ikwenyi.

¹⁷ Ak mwaei Tamirmiriet ak mureret kole, Nyo. Ak inendet ne kasei, komwa kole, Nyo. Ak inendet ne amei melelda, konyo; ak inendet ne machei, koib beekab sobon buch.

¹⁸ Abaorianjini chi age tugul ne kasei ng’alek che bo maoinatetab bukuini, ale, Ngo tesyi chi age tugul ng’alechu ng’alek alak, kotesyin Jehovah korotwek che kigisirji bukuini:

¹⁹ ak ngonem chi age tugul ng’alek eng’ bukuitab maoinatoni, konemu Jehovah kebebertanyi eng’ ketitab sobondo, ak eng’ nganaset ne tilil, che kigisirji bukuini.

²⁰ Mwaei inendet ne baorianjin tuguchu kole, Ee: anyone achogu. Amen: nyo, Kiptaiyat Jesu.

²¹ Ingoteb mieindab Kiptaiyat Jesu Kristo koboto che tililen. Amen.