NG'ANG'UTYET 20 - BUKUIT NE TILIL

Keratei Setani kenyisiek elfut agenge

¹ Ak kiageer malaikaiyat kochorugei eng’ kipsengwet, kotinyei yateiywotab keringet ne maigoksei ak sirimdo ne o eng’ eunnyi.

² Ak konam maswetit, erenet ne ki bo keny, ne inendet ko Oindet ak ko Setani, ak korat inendet kenyisiek elfut agenge,

³ ak kowirji inendet keringet ne maigoksei, ak koger, ak kong’och baragunnyi, si mata koberber bororiosiek kogeny, agoi kogesgei kenyisiek elfut agenge: ye ibata noto kitiach ne matia.

⁴ Ak kiageer ng’echerokab laitornatet, ak kitebe ichek, ak kigigochi ichek koruoch: ak kiageer sobonwekab ichek che kigitil metowek amu baornatetab Jesu, ak agobo ng’olyotab Jehovah, ak ichek che kima kolosu tiondo, anan kanamwennyi, ak che kimanyor berutiet eng’ togochikwak anan eng’ eunekwak; ak kisopcho ak kolaitoran koboto Kristo kenyisiek elfut.

⁵ Ma sopcho che kiga kobek agoi kogesgei kenyisiek elfut agenge. Nito ko ng’eetyet ne bo tai.

⁶ Baibai ak ko tilil ne tinyei yamdaet eng’ ng’eetyet ne bo tai: mabou ichek meet ne bo aeng’; ago egu ichek tisiikab Jehovah ak ko bo Kristo, ak kolaitoran ak inendet kenyisiek elfut agenge.

Kitiachi Setani. Luget ne bo let

⁷ Ak ye igesgei kenyisiek elfut agenge, kitiach Setani komong’ eng’ korgorennyi,

⁸ ak komong’ koberber bororiosiek che mitei luukwek ang’wan che bo ng’ony, Gog ak Magog, koyumji ichek luget: che te koitenywa ng’aniekab nyanjet.

⁹ Ak kotogosta koyom ng’ony ak koyiem oldab che tililen, ak nganaset ne chamat: ak kichorgei mat eng’ kipsengwet, ak kobeel ichek.

¹⁰ Ak kigiwirji oindet ne kiiberber ichek araraitab mat ak koik che laldos, ole mitei agichek tiondo ak maotiot ne bo lembech; ak kinyalili bet ak kemoi agoi koigeny ak koigeny.

Ng’eetyetab bik ak kiruoget ne bo let

¹¹ Ak kiageer ng’echeret ne o ak ko leel ne bo laitornatet, ak inendet ne kitebe, ne kimwee togennyi ng’ony ak kipsengwet; ama kisikyi ole tebe.

¹² Ak kiageer che kigobek, che eechen ak che mengechen, kotonondos eng’ taitab ng’echeretab laitornatet; ak kigiyat bukuisiek: ak kigiyat bukuit age, noto ko bukuitab sobondo: ak kigiruokyi che kigobek eng’ tuguk che kiga kisirji bukuisiechoto, ko u boisionikwak.

¹³ Ak kigon nyanjet che kigobek che kimi orinnyi; ak kigon meet ak oldab che kigobek, ichek che kigobek che kimi orinywa, ak kigiruokyi chi age tugul ko u boisionikyik.

¹⁴ Ak kigiwirji meet ak oldab che kigobek, araraitab mat. Nito ko meet ne bo aeng’, araraitab mat.

¹⁵ Ak ngot kenyor chi age tugul ne kima kisirji bukuitab sobondo, kewirjin araraitab mat.