NG'ANG'UTYET 2 - BUKUIT NE TILIL

Baruet ne kigisirji kaniset ne mi Epeso

¹ Sirji malaikaiyat ne bo kaniset ne mi Epeso, ilenji: Mwaei tuguchu inendet ne namei kecheik tisab eng’ eunnyi ne bo tai, inendet ne wendote kwenutab kelyek tisab che bo taisiek che bo tahabu:

² Angen boisioniguk, ak boisieng’ung’ ne nyigis ak muitaeng’ung’, ak angen ale memuchi imuite agobo bik che yaachen, ak kiitiem ichek che kuuregei che kiyoktoi, ago ma choto, ak kiinai ile kiplembechonik;

³ ak itinye muitaet ak kiimuite agobo kainennyu, ameng’ete.

⁴ Ago ating’enen ng’olyot, ale kiimete chamnyeng’ung’ ne bo tai.

⁵ Ibwat anyun ole kiibute, ak isigu, ak iyai boisionik che bo tai; anan anyonjin, ak anemu keldab taing’ung’ eng’ komostanyi, ngot ko mesigu.

⁶ Ago itinye ni, ale iweche boisionikab Nikolaitik, che aweche agane.

⁷ Inendet ne tinyei itit, kogas kit ne mwachin Tamirmiriet kanisosiek. Inendet ne iterteri, agochini koam che bo ketitab sobondo ne mi Paradis ne bo Jehovah.

Baruet ne kigisirji kaniset ne mi Smurna

⁸ Ak isirji malaikaiyatab kaniset ne mi Smurna, ilenji: Mwaei tuguchu inendet ne bo tai ak ko ne bo let, ne kime, ak kosob kogeny:

⁹ Angen nyalildang’ung’, ak banandang’ung’ (ago i magoriot), ak chubisietab ichek che mwaei kole ki Yahudik, ago ma ichek, ago sunagogitab Setani.

¹⁰ Ameiywei nyalilwogik che negit inyoru: ogeero, machei oindet kotoorji korgoret alak eng’ okwek, si kobiit ketiemak; ak osich nyalilda eng’ betusiek taman. Egu ne kiyani agoi meet, si agonin kutwet ne bo sobondo.

¹¹ Inendet ne tinyei itit, kogas kit ne mwachin Tamirmiriet kanisosiek. Inendet ne iterteri ko manyoru ng’wanindo eng’ meet ne bo aeng’.

Baruet ne kigisirji kaniset ne mi Pergamo

¹² Ak isirji malaikaiyatab kaniset ne mi Pergamo, ilenji: Mwaei tuguchu inendet ne tinyei rotwetab chok ne ng’atiben komoswek tuwai:

¹³ Angen ole imenye, ole mi ng’echeretab laitornatet ne bo Setani: ak iname kainennyu mising’, ama iesie kayanennyu, agot eng’ betusiekab Antipa baoriandennyu, nenyu ne bo iman, ne kigibar eng’ kwenung’wong’, ole menyei Setani.

¹⁴ Ago ating’enen ng’alek tutigin, amu itinye alak eng’ oloto che isubi konetisietab Balaam, ne kiinet Balak konde kanagutiet taitab lagokab Israel, si koam tuguk che kigochin kanamonik, ak kosokso.

¹⁵ Itinye aginye ko u noto alak che isubi konetisietab Nikolaitik.

¹⁶ Sigu anyun; anan anyonjin achogu, ak anyo aborie ichek eng’ rotwetab chok ne bo kutinnyu.

¹⁷ Inendet ne tinyei itit, kogas kit ne mwachin Tamirmiriet kanisosiek. Inendet ne iterteri, agochini che bo mana che ung’otin, ak agochi koita ne leel, ak kigisirji koyata kainet ne leel, ne maingen chi kobate inendet ne taachei.

Baruet ne kigisirji kaniset ne mi Tuatera

¹⁸ Ak isirji malaikaiyatab kaniset ne mi Tuatera, ilenji: Mwaei tuguchu Weritab Jehovah, ne tinyei konyek che u liblibenetab mat, ak ko u kelyekyik sugunwet ne sitat:

¹⁹ Angen boisioniguk, ak chamnyeng’ung’ ak kayaneng’ung’ ak otisieng’ung’ ak muitaeng’ung’, ak angen ale chang’ boisioniguk che bo let kosiir che bo tai.

²⁰ Ago ating’enen ng’olyot, ale ichamjini kobogoriot Jesebel, ne kuuregei maotio; ak koneti otwogikyuk ak kogoigoi kosokso, ak koam tuguk che kigochin kanamonik.

²¹ Ak kiagochi boroindo ale si kosik; ago machamei kosik eng’ soksennyi.

²² Ogeero, awirjini itogut, ak ichek che ibegei koboto inendet koba nyalilda ne o, ngot ko masik eng’ boisionikyik.

²³ Ak abare lagokyik meet; ak konai kanisosiek tugul kole anendet ne isiachi kabwatutik ak mugulelwek: ak agochini age tugul eng’ okwek ko u boisionikwok.

²⁴ Ago amwawok okwek che o ng’etunotin eng’ Tuatera, tugul che matinyei konetisioni, che maingen tuguk che bo orit che bo Setani, ko u ye mwaei ichek; ale maandook milet age.

²⁵ Ago onam mising’ noto otinye kot aitu.

²⁶ Ak inendet ne iterteri, ak koribei boisionikyuk agoi kagesunet, kotun agochini kimnatet koboi bororiosiek:

²⁷ ak koboi eng’ koroktab karnet; ko u ye kituei terenikab cheptereniot komengegitu; ko u ye kiataach agane eng’ Baba:

²⁸ ak agochini inendet taboiyat ne bo karon.

²⁹ Inendet ne tinyei itit, kogas kit ne mwachin Tamirmiriet kanisosiek.