NG'ANG'UTYET 19 - BUKUIT NE TILIL

Katerteret eng’ kipsengwet ak katunisietab Aruet

¹ Kingobata tuguchu, agas kit ne u kutit ne o ne bo tuiyet ne o eng’ kipsengwet, kole, Haleluya. Bo Jehovah nenyo yetunet, torornatet, ak kamuktaet;

² amu bo iman ak ko bo imanda kiruogutikyik; amu kagoruokyi chepkugoniot ne o, ne kiimuruon ng’ony eng’ soksennyi, ak kagoyaakta mugetut ne bo korotikab otwogikyik eng’ eutab kwonyoto.

³ Ak kimwa kogeny ne bo aeng’ kole, Haleluya. Ak togostoi iyetanyi koigeny ak koigeny.

⁴ Ak kiibutyi ng’ony boisiek tiptemu ak ang’wan che soptos ak kolos Jehovah ne tebe ng’echeretab laitornatet, komwaei kolen, Amen; Haleluya.

⁵ Ak kimong’ kutit eng’ ng’echeretab laitornatet, kole, Olosu Jehovah nenyo, okwek tugul otwogikyik che oiywei inendet, che mengechen ak che eechen.

⁶ Ak kiagas kit ne u kutitab tuiyet ne o, ak ko u cheetab beek che chang’, ak ko u cheetab tulosiek che kimen, kole, Haleluya: amu laitorani Kiptaiyat Jehovah nenyo, Kamuktaindet.

⁷ Ongeboiboitu ak kigasge mising’, ak kigochi torornatet inendet: amu kagoit katunisietab Aruet, ak kagochopgei osotiondennyi.

⁸ Ak kigigochi inendet kolaach gei eng’ katanit ne kararan, ne leel kot ak ko tilil; amu katanit ne kararan ko boisionikab imanda che bo bik che tililen.

⁹ Ak kolenja, Sir ile, Boiboen ichek che keguurjin igortab katunisietab Aruet. Ak kilenja, Chu ko ng’alekab iman che bo Jehovah.

¹⁰ Ak kiabutyi kelyekyik alosu inendet. Ak kolenja, Ameyai ko u noto: ki otwogik tuwai koboto tupchosieguk che tinyei baornatet ne bo Jesu. Ilosu Jehovah: amu baornatetab Jesu ko tamirmirietab maoinatet.

Koterterisiei Kristo

¹¹ Ak kiageer koyatak kipsengwet, ak ogeero, mbartanyit ne leel, ak inendet ne kitebe, ko kigiguure Ne Kiyani ak ko Iman; ak koruochi ak koyaei luget eng’ imanda.

¹² Ak ki u konyekyik liblibenetab mat, ak kimi metinnyi nariosiek che chang’; ak kotinyei kainet ne kigisir, ne mami chi ne ingen kobate inendet inegei.

¹³ Ak kiilaachi ngoriet ne kigirong’ji korotik: ak kiguure kainennyi NG’OLYOTAB JEHOVAH.

¹⁴ Ak kiisubi inendet lugosiek che mi kipsengwet che lanyei mbartanyisiek che leelach, kolaachi katanisiek che kororon che leelach kot ak ko tililen.

¹⁵ Ak kimong’une kutinnyi rotwetab chok ne ng’atib, si kobiit kobire bororiosiek: ak koboi ichek eng’ kiroktab karnet: ak kotiech sabibuk eng’ ole kituisie che bo koromnatet ne bo neregekab Jehovah ne bo Kamuktaet.

¹⁶ Ak kotinyei eng’ ngoriennyi ak eng’ kubestanyi kainet ne kigisir kole, LAITORIAT NE BO LAITORINIK, AK KIPTAIYAT NE BO KIPTAINIK.

¹⁷ Ak kiageer malaikaiyat kotononi eng’ asista; ak kiwaach eng’ kutit ne o, kolenji taritik tugul che tirirendos eng’ kwenutab kipsengwet, Obwa otuiyechi igorta ne o ne bo Jehovah;

¹⁸ si kobiit oam borwekab laitorinik, ak borwekab kiptainikab luget, ak borwekab bik che kimen, ak borwekab mbartanyisiek ak che bo che lanyei ichek, ak borwekab bik tugul, che itiagotin ak che ratotin, ak che mengechen ak che eechen.

Keng’emei bunikyik

¹⁹ Ak kiageer tiondo, ak laitorinikab ng’ony, ak lugosiekwak, ko kaiyomogei koyai luget ak inendet ne kiga tebe mbartanyit, ak lugennyi.

²⁰ Ak kiginam tiondo, koboto maotiondonoto ki bo lembech ne kiyaei kaborunoik eng’ tainnyi, ne kiiberberi che kiga kinde berutietab tiondo, ak ichek che kiilosu kanamwennyi: kigiwirji choto tuwai kosoptos araraita ne bo mat ne lalei eng’ koik che laldos:

²¹ ak kigibar ichek che king’et eng’ rotwetab chok ne kimong’une kutitab inendet ne kitebe mbartanyit, ak kibiyong’so taritik tugul eng’ borwekwak.