NG'ANG'UTYET 18 - BUKUIT NE TILIL

Luletab nganaset ne o

¹ Kingobata tuguchu, ageer malaikaiyat age kochorugei eng’ kipsengwet, ne tinyei kimnatet ne o; ak koluu ng’ony eng’ lilindanyi.

² Ak kiwaach eng’ kutit ne kim, kole, Kagolul, kagolul Babulon ne o, ak kagoek ole menyei oik, ak irimetab tamirmiriet age tugul ne muruon, ak irimetab tarit age tugul ne muruon ak ne kiwechei.

³ Kagobutyo bororiosiek tugul amu divaikab koromnatetab soksennyi; ak kisokso laitorinikab ng’ony ak inendet, ak kiek magorek chemung’arainikab ng’ony eng’ kimnatetab kaseretab tugukyik.

⁴ Ak kiagas kutit age kobunu kipsengwet, kole, Omong’une inendet, okwek bikyuk, si moyamde tengekwogikyik, si monyoru korotwekyik:

⁵ amu kigoit tengekwogikyik kipsengwet, ak kagobwat Jehovah tengekwogikyik.

⁶ Oweekyi inendet ko u ye kigoyai, ak oyaakyi inendet konyil aeng’ ko u boisionikyik; kikombet ne kiburuge, oburukyi inendet konyil aeng’.

⁷ Ko u ye kiilosgei ak koser tugukyik, ogochi inendet ng’wanindo ak arogenet ko u noto: amu mwaei inendet eng’ muguleldanyi, kole, Atebye ko a laitoriat ne kwondo, ma a mosok, ak magoi ageer rirek.

⁸ Noto anyun itu korotwekyik eng’ betunak, meet, ak rirek, ak rubet; ak kebeel inendet eng’ mat kogesgei; amu kim Kiptaiyat Jehovah ne kiiruokyi inendet.

⁹ Ak rirtos ak koteeitos agobo inendet laitorinikab ng’ony, che kisokso ak kotebyei koboto inendet eng’ kaseretab tuguk, ye keer iyetab lalennyi,

¹⁰ kotonondos eng’ ole loo amu kaiyweetab ng’wanindanyi, kolen, Bwa, bwa wee, nganaset ne o, Babulon, nganaset ne kim! Amu kait kiruogeng’ung’ eng’ sait agenge.

¹¹ Ak korirtos chemung’arainikab ng’ony ak koteeitos agobo inendet, amu ma koalei chi kogeny tugukwak che aldoi:

¹² tugukab tahabu, ak feda, ak koik che bichien eng’ alet, ak sonoek che kororon, ak katanisiek che kororon, ak ngoroik che arusen ne birir, ak aririsiek, ak ngoroik che biriren; ak ketit age tugul ne nyamdut, ak kit age tugul ne bo kelekab belek, ak kit age tugul ne kigiyae ketit ne bo kamanutiet ne o, ak che bo sugunonik, ak karik, ak koik che leelachen;

¹³ ak kinamon, ak nyamdutik, ak nyamdutik che kibeelei, ak mwanik che kiilegei, ak tuguk che nyamdut, ak divaik, ak mwanik, ak busiek che tambulul, ak nganok, ak tuga, ak kechirek; ak mbartanyisiek ak karisiek ak mutwarik; ak sobonwekab bik.

¹⁴ Ak kigobetenen logoek che kigase miat sobondang’ung’ ak kigobetenen tuguk tugul che anyiny ak che miachen, ama kenyoru kogeny agoi.

¹⁵ Tonondos eng’ ole loo chemung’arainikab tuguchuto, che kiek magorek eng’ inendet, amu kaiyweetab ng’wanindanyi, ak korirtos ak koteeitos;

¹⁶ kolen, Bwa, bwa wee, nganaset ne o, ne kiilaachi katanisiek che kororon, ak ngoroik che arusen ne birir ak che biriren, ne kigilelesonjine tahabu ak koik che bo kamanutiet ne o ak sonoek che kororon!

¹⁷ Amu kabetyo eng’ sait agenge magornatosiek che eechen che u choto. Ak kitonondos eng’ ole loo kiptaiyat age tugul ne bo melit, ak age tugul ne bunei melit kowendi oldo tugul, ak bik che boisiei eng’ melisiek, ak tugul che nyoru borotenywa eng’ nyanjet,

¹⁸ ak koririo ye kingogeer iyetab lalennyi, kole, Mi nee ne kergei ak nganasani o?

¹⁹ Ak kolakyin temburiek metowekwak, ak kowaachei, korirtos ak koteeitos, kolen, Bwa, bwa wee, nganasani o, ole kiegune magore bik tugul che kitinyei melisiekwak eng’ nyanjet amu oindab kamanutiennyi! Amu kait ng’emisiennyi eng’ sait agenge.

²⁰ Baibaitu eng’ inendet inye kipsengwet, ak okwek che o tililen, ak okwek che kiyoktoi, ak okwek maotik; amu kagoruokyi Jehovah inendet amu okwek.

²¹ Ak kisut malaikaiyat ne kim koita ne u koitab bai ne o, ak kowirji nyanjet, kole, Kiwirtoi Babulon nganaset ne o, kobut ko u noto eng’ kabutet ne o, ama kenyoru kogeny agoi.

²² Ama kegasei kogeny eng’ inye butikab ketubosiek ak che tiendos ak butikab ndurerusiek ak che kuutei iriagok; ama kenyoru musogindet ne bo musoknatet age tugul eng’ inye kogeny agoi; ama kegasei cheetab koitab bai eng’ inye kogeny agoi;

²³ ama kokweng’sei lapkeiyetab tait eng’ inye kogeny agoi; ama kegasei kutitab sandet ak mureret eng’ inye kogeny agoi: amu ki bik che eechen che bo ng’ony chemung’arainiguk; amu kigiberber bororiosiek tugul eng’ banisieng’ung’.

²⁴ Ak kiginyorji inendet korotikab maotik ak che bo bik che tililen, ak che bo tugul che kigibar eng’ ng’ony.