NG'ANG'UTYET 17 - BUKUIT NE TILIL

Ng’ang’utiet agobo chepkugoniot ak tiondo

¹ Ak kinyo age eng’ malaikaisiechato tisab che kitinyei tabok tisab, ak konyo kong’alalwa, kole, Nyo yu, si aborun kiruogetab chepkugoniot ne o ne tebe beek che chang’;

² ne kiyai sokset laitorinikab ng’ony ak inendet, ak kibogityo ichek che menyei ng’ony, eng’ divaikab soksennyi.

³ Ak kiimuta eng’ Tamirmiriet agoi surkwen: ak kiageer kobogoriot kotebe tiondo ne birir, ne nyiitat kainaikab chubisiet, ne tinyei metowek tisab ak kuinoik taman.

⁴ Ak kiilaachi kobogoriot ngoroik che arusen ne birir ak che biriren, ak kigilelesonjine tahabu ak koik che bo kamanutiet ne o mising’ ak sonoek che kororon, ak kotinyei eng’ eunnyi kikombet ne bo tahabu ne nyiitat tuguk che kiwechei, tugukab simdo che bo soksennyi,

⁵ ak kigisirji togennyi kainet kele, UNG’OTIET, BABULON NE O, KAMETAB CHEPKUGONIK AK NE BO TUGUK CHE KIWECHEI CHE BO NG’ONY.

⁶ Ak kiageer kwonyoto ko kagobogit eng’ korotikab bik che tililen, ak eng’ korotikab baorinikab Jesu. Ak ye kingageer inendet, akwong’ eng’ kwong’et ne o.

⁷ Ak kilenja malaikaiyat, Kekwong’ amu nee? Amache amwaun ung’otietab kwonyito ak ne bo tiondo ne keseni inendet, ne tinyei metowek tisab ak kuinoik taman.

⁸ Tionyi kegeere komi, ama komi; ak ko negit komong’ eng’ keringet ne maigoksei, ak kwo luset. Ak kwong’dos ichek che menyei ng’ony, che kima kisirji kainaikwak bukuitab sobondo koboch ngab kelumda ng’ony, ye keer tiondo, amu kimi, ama komi, ak kota konyonei.

⁹ Mi yu kaguiyet ne bo ng’omnatet. Metowechoto tisab ko tulonok tisab, che tebe kwonyoto:

¹⁰ ak choto ko laitorinik tisab; kogobutyo mutu, mitei agenge, tomo konyo age; ak ye nyo, konyoljin koteb ne matia.

¹¹ Ak tionyoto kimi, ama komi, inendet ko ne bo sisiit, ak ta ko agenge eng’ chun tisab; ak kowendi luset.

¹² Ak kuinoichoto taman che kegeer ko laitorinik taman che tom konam bounatet; ak konyoru kimnatet ko u laitorinik, koboto tiondo, eng’ boroindab sait agenge.

¹³ Tinyei chuto kabwatet agenge, ak kogochin ichek kamugenywa tiondo ak kimnatenywa.

¹⁴ Baregei chuto ak Aruet ak koterter Aruet ichek, amu inendet ko Kiptaiyatab kiptainik, ak ko Laitoriatab laitorinik; ak icheget che mi koboto inendet, che kigiguur ak che kigilewen ak che kiyani.

¹⁵ Ak kilenja, Beechu kegeere, che katebe chepkugoniot, ko bik, ak tuiyosiek, ak bororiosiek, ak kutuswek.

¹⁶ Ak kuinoichu kegeere taman, ak tiondo, ko tun wechei chepkugoniot, ak kometo kotebi inegei, komi ach ngor, ak koam banyekyik, ak kobeel inendet eng’ mat kogesgei.

¹⁷ Amu kiinde Jehovah mugulelwekwak koyai ko u ye ibwati, ak kosich tugul kabwatet agenge, ak kogochi tiondo bounatenywa, agoi kosulda ng’alekab Jehovah.

¹⁸ Ak kwonyi kegeere ko nganaset ne o, ne bou laitorinikab ng’ony.