NG'ANG'UTYET 16 - BUKUIT NE TILIL

¹ Ak kiagas kutit ne o kobunu hekalut, kolenjin malaikaisiechato tisab, Oba, orong’ji emet tabok tisab che bo neregekab Jehovah.

² Ak kiwa malaikaiyat ne bo tai, korong’ji emet tabennyi; ak kiek mook che yaach ak ko ng’wonen eng’ bik che tinyei berutietab tiondo, ak che kisaei kanamwennyi.

³ Ak kirong’ji malaikaiyat ne bo aeng’ tabennyi nyanjet; ak kiek korotik, ko u che bo chi ne kagome; ak kime age tugul ne sobei, agot tugul che mi nyanjet.

⁴ Ak kirong’ji malaikaiyat ne bo somok tabennyi ainosiek ak kondametusiekab beek; ak kiek korotik.

⁵ Ak kiagas malaikaiyat ne bo beek komwa kole, I bo imanda, inye ne imi, ak ko kiimi, Inye ne Tilil, amu kiiruoch ko u noto:

⁶ amu kitumda korotikab bik che tililen ak che bo maotik, ak kaigochi ichek korotik koe: amu nyoljin ichek ko u noto.

⁷ Ak kiagas kaptisisiet komwa kole, U noto, ee, Kiptaiyat Jehovah, Kamuktaindet, bo iman ak ko bo imanda kiruogutiguk.

⁸ Ak kirong’ji malaikaiyat ne bo ang’wan tabennyi asista; ak kigigochi kobeel bik eng’ mat.

⁹ Ak kigibeel bik eng’ beelet ne o: ak kichub kainetab Jehovah ne tinyei kimnatet koboi korotwechuto; ak ma sik si kobiit kogochi torornatet.

¹⁰ Ak kirong’ji malaikaiyat ne bo mut tabennyi ng’echeretab laitornatet ne bo tiondo; ak koimenit bounatennyi; ak kinyei ng’elyebwekwak amu ng’wanindo,

¹¹ ak kichub Jehovah ne bo kipsengwet amu ng’woninwekwak ak mookwak; ama sik eng’ boisionikwak.

¹² Ak kirong’ji malaikaiyat ne bo lo tabennyi ainet ne o, noto ko Euprate; ak kiyaamnyo beekyik, si kobiit kochobok oretab laitorinik che bunu kong’asis.

¹³ Ak kiageer tamirmirik somok che muruonen che u mororochik, komong’une kutitab maswetit, ak eng’ kutitab tiondo, ak eng’ kutitab maotiot ne bo lembech:

¹⁴ amu choto ko tamirmirikab oik, che yaei kaborunoik; che bendi oldab laitorinikab ng’ony komugul, si koyum ichek koba lugetab betut ne o ne bo Jehovah, Kamuktaindet.

¹⁵ (Ogeero, anyone ko u chorin. Baibai inendet ne ripsei, ak koribei ngoroikyik, si mawendot ach ngor, ak kegeer kalilanennyi.)

¹⁶ Ak koyum ichek eng’ ole kiguure Har-Magedon eng’ kutitab Hebranik.

¹⁷ Ak kirong’ji malaikaiyat ne bo tisab tabennyi soet; ak kimong’ kutit ne o eng’ hekalut, kobun ng’echeretab laitornatet, kole, Kagosulda:

¹⁸ ak kibiit ilotik, ak kutuswek, ak tulosiek; ak kibiit botanet ne o ne bo ng’ony, ne kitomo kobiitu koboch ngobiit bik eng’ ng’ony, botanet ne o, ne kim kot.

¹⁹ Ak kipcheak nganaset ne o koek kebeberwek somok, ak kilulyo nganasokab bororiosiek: ak kigibwat Babulon ne o eng’ taitab Jehovah, si kobiit kigochi inendet kikombet ne bo divaikab koromnatetab neregekyik.

²⁰ Ak kimwei emet age tugul ne kiikwen beek, amata kegeer tulonok.

²¹ Ak kororokyi bik koik che eechen che bo ropta che rorogu eng’ kipsengwet, che te nyigisindanywa talentait: ak kichub bik Jehovah amu koroitab koichato bo ropta; amu o mising’ koroitanyi.