NG'ANG'UTYET 15 - BUKUIT NE TILIL

Ng’ang’utiet agobo korotwek ak tobok tisab

¹ Ak kiageer kaborunet age eng’ kipsengwet, ne o ak ko bo kwong’et, malaikaisiek tisab che tinyei korotwek tisab che bo let, amu kigesune choto neregekab Jehovah.

² Ak kiageer kit ne u nyanjetab glasit ne burugot ak mat; ak icheget che kigoterter tionyoto ak kanamwennyi, ak koitetab kainennyi, kotonondos eng’ ye negite nyanjetab glasit, che tinyei ketubosiekab Jehovah.

³ Ak kotieni ichek tiendab Musa otwogindetab Jehovah, ak tiendab Aruet, kolen, Eechen boisioniguk ak ko bo kwong’et, ee, Kiptaiyat Jehovah, Kamuktaindet; bo imanda ak ko bo iman ortinweguk, inye Laitoriatab bororiosiek.

⁴ Ng’o ne maiywei kaineng’ung’, ak kotorori, ee Kiptaiyat? Amu i tilil inyege; amu bwanei bororiosiek tugul kogutung’so eng’ taing’ung’; amu kagong’ang’ak boisioniguk che bo imanda.

⁵ Ak kingobata tuguchu, ageer, ak kigiyat hekalut ne bo emaitab baornatet eng’ kipsengwet:

⁶ ak kimong’une hekalunato malaikaisiek tisabu che tinyei korotwechoto tisab, kolaachi ngoroik che tililen, ak kolile bich, ak koratatagei birenoikab tahabu eng’ tegetikwak.

⁷ Ak kiigochi age eng’ tiong’ik ang’wan che soptos malaikaisiek tisab tabok tisab che bo tahabu che nyiitotin neregekab Jehovah, inendet ne sobei koigeny ak koigeny.

⁸ Ak kinyi hekalut iyeto ne kibunu torornatetab Jehovah, ak kamuktaennyi; ak kima imuch chi kwo hekalut orit, agoi kogesgei korotwek tisabu che bo malaikaisiek tisab.