NG'ANG'UTYET 14 - BUKUIT NE TILIL

Ng’ang’utiet agobo Aruet ak che kigial

¹ Ak kiageer, ak ogeero, tononi Aruet eng’ tulwetab Sion, ak komi koboto inendet bik elfusiek bogol ak artam ak ang’wan, che tinyei kainennyi, ak kainetab Kwandanyi, che kigisirji togochikwak.

² Ak kiagas kutit kobun kipsengwet, ne u cheetab beek che chang’, ak ko u cheetab tulet ne o: ak cheonoto kigagas ko ki u ne bo butik che butei ketubosiekwak:

³ ak kotieni tiendo ne leel eng’ taitab ng’echeretab laitornatet, ak eng’ taitab tiong’ik ang’wan che soptos ak boisiek: ama mi chi ne imuchi konetgei tienoto kobate bichoto elfusiek bogol ak artam ak ang’wan, icheget che kigial eng’ ng’ony.

⁴ Chuto ko icheget che ma imuruongei eng’ kobogorisiek; amu bergeinik icheget. Chuto ko icheget che isubi Aruet eng’ oldo tugul ole wendi. Kigial chuto eng’ kwenutab bik, koek tongoanik eng’ Jehovah ak eng’ Aruet.

⁵ Ama kinyorji kutuswekwak lembeita: ama tinyei tisia.

Ng’ang’utiet agobo malaikaisiek somk

⁶ Ak kiageer malaikaiyat age kotirireni eng’ kwenutab kipsengwet, kotinyei logoiywek che miach che bo koigeny koamji ichek che menyei ng’ony, ak bororiet age tugul ak oret age tugul ak kutit age tugul ak bik alak tugul;

⁷ ak komwaei eng’ kutit ne o, kole, Oiywei Jehovah, ak ogochi torornatet; amu kagoit saitab kiruogennyi: ak olosu inendet ne kiyai kipsengwet ak ng’ony ak nyanjet ak kondametusiekab beek.

⁸ Ak kosub malaikaiyat ne bo aeng’, ne len, Kagolul, kagolul Babulon ne o, ne kiigochi bororiosiek tugul koee divaik che bo koromnatetab soksennyi.

⁹ Ak kosub ichek malaikaiyat ne bo somok, ne mwaei eng’ kutit ne o kole, Ngot kolos chi age tugul tiondo ak kanamwennyi, ak konyor berutiet eng’ togennyi, anan eng’ eunnyi,

¹⁰ koeei agine divaik che bo koromnatetab Jehovah, che kigichob ama kiburuch eng’ kikombetab nereknatennyi; ak kinyalili eng’ mat ak koik che laldos eng’ taitab malaikaisiek che tililen, ak eng’ taitab Aruet:

¹¹ ak kotogostoi iyetab ng’wanindanywa koigeny ak koigeny; ama tinyei kamuung’et bet ak kemoi, ichek che ilosu tiondo ak kanamwennyi, ak age tugul ne nyoru berutietab kainennyi.

¹² Mi yu muitaetab bik che tililen, icheget che ribei ng’atutikab Jehovah, ak kayanetab Jesu.

¹³ Ak kiagas kutit kobunu kipsengwet kole, Sir ile, Boiboen ichek che begu eng’ Kiptaiyat koboch nguno: ee, mwaei Tamirmiriet, kole si kobiit komuuny eng’ boisionikwak, amu isubi ichek boisionikwak.

Kesisiet ak sabibukab ng’ony

¹⁴ Ak kiageer, ak ogeero, boldet ne leel; ak kitebe boldanato chito ne u weritab chi, kotinyei eng’ metinnyi narietab tahabu, ak kimi eunnyi chepkeswet ne ng’atib.

¹⁵ Ak kimong’ malaikaiyat age eng’ hekalut, komwachin eng’ kutit ne o inendet ne tebe boldet, kolenjin, Iyokte chepkesweng’ung’, ak igesisie: amu kagoit saitab kesisiet; amu kigosiirto kesetab ng’ony.

¹⁶ Ak kiwirji ng’ony chepkeswennyi inendet ne kitebe boldet; ak kigiges ng’ony.

¹⁷ Ak kimong’ malaikaiyat age eng’ hekalut ne mi kipsengwet, kotinyei agine chepkeswet ne ng’atib.

¹⁸ Ak kimong’ malaikaiyat age eng’ kaptisisiet, inendet ne tinyei kimnatet ne boune mat; ak kiguur inendet eng’ kutit ne o, ne tinyei chepkeswet ne ng’atib, kolenji, Iyokte chepkesweng’ung’ ne ng’atib, ak iyum sabibukab ketit ne bo ng’ony; amu kagoruryo sabibukyik.

¹⁹ Ak kiwirji malaikaiyat chepkeswennyi ng’ony, ak kiyum sabibukab ng’ony, ak kowirji ole kitue sabibuk, kenut ne o, ne bo neregekab Jehovah.

²⁰ Ak kigitiech ole kitue sabibuk eng’ nganaset sang’, ak komong’ korotik eng’ ole kituisie, kot koit karikab kutitab mbartanyisiek, ne itei olo bo maelisiek bogol aeng’.