NG'ANG'UTYET 13 - BUKUIT NE TILIL

Ng’ang’utiet agobo tiondo

¹ Ak kiageer tiondo kotogosu eng’ nyanjet, ne tinyei kuinoik taman ak metowek tisab, ak nariosiek taman eng’ kuinoikyik, ak kimi metowekyik kainaikab chubisiet.

² Ak ki u tiondo ne kiageer cheblanget, ak ki u kelyekyik kelyekab tiondo ne u keerit, ak ki u kutinnyi kutitab ng’etundo: ak kiigochi maswetit inendet kamugennyi, ak ng’echerennyi ne bo laitornatet, ak kimnatet ne o.

³ Ak kiageer age eng’ metowekyik ko u ne kagikwer kebar; ak kigisoob ole kiga kikwer kome: ak kikwong’ ng’ony komugul agobo tionyoto;

⁴ ak kiilos ichek maswetit, amu kiigochi kimnatennyi tiondo, ak kiilos ichek tiondo, komwa kole, Ng’o ne kergei ak tionyito; ak ng’o ne imuchi kobargei ak inendet?

⁵ Ak kigigochi inendet kutit kong’alal tuguk che eechen ak chubisiosiek; ak kigigochi inendet kimnatet koboisie arawek artam ak aeng’.

⁶ Ak kiyat kutinnyi kochub Jehovah, ak kochub kainennyi, ak gonnyi, ak ichek che menyei kipsengwet.

⁷ Ak kigigochi inendet kobargei ak bik che tililen, ak koterter ichek; ak kigigochi inendet kimnatet koboi oret age tugul ak bik alak tugul, ak kutit age tugul ak bororiet age tugul.

⁸ Ak kolos inendet tugul che menyei ng’ony, che ma kisirji kainaikwak bukuitab sobondo ne bo Aruet ne kigibar koboch taunetab ng’ony.

⁹ Ngo tinyei chi itit, kogas.

¹⁰ Ngo luulis chi, keluulei inendet: ngo baris chi eng’ rotwetab chok, kobare inendet rotwetab chok matiny. Mi yu muitaet ak kayanetab bik che tililen.

¹¹ Ak kiageer tiondo age kotogosu eng’ ng’ony; ak kitinyei kuinoik aeng’ che u che bo aruet, ak king’alal ko u maswetit.

¹² Ak koboisie kimnatet tugul ne bo tiondo ne bo tai eng’ tainnyi. Ak kogochi ng’ony ak che menyei ng’ony kolos tiondo ni ka bo tai, ne kigisoob ole kiga kikwer kome.

¹³ Ak koyaei inendet kaborunoik che eechen, kot koyaei mat kochorgei eng’ kipsengwet kobutyi ng’ony eng’ taitab bik.

¹⁴ Ak kiiberber ichek che menyei ng’ony eng’ kaborunoik che kigigochi inendet koyai eng’ taitab tiondo; kolenjin ichek che menyei ng’ony koyachi kanamwet tiondo, ne tinyei berutietab rotwetab chok, ak kisob tionyoto.

¹⁵ Ak kigigochi inendet kogochi kabuset kanamwetab tiondo, si kobiit kong’alal kanamwetab tiondo, ak kong’at kebar tugul che mailosu kanamwetab tiondo.

¹⁶ Ak ng’atei tugul, che mengechen ak che eechen, ak magorek ak kibananok, ak che itiagotin ak che ratotin, kinde berutiet eng’ eunekwak che bo tai, anan ko eng’ togochjikwak;

¹⁷ ak kole maimuchi chi koalis anan koaldais, kobate inendet ne tinyei berutiet, noto ko kainetab tiondo anan ko koitetab kainennyi.

¹⁸ Mi yu ng’omnatet. Inendet ne tinyei kaguiyet, koiit koitetab tiondo; amu noto koitetab chi: ak koitennyi ko Bogol lo ak tamanwogik lo ak lo.