NG'ANG'UTYET 12 - BUKUIT NE TILIL

Ng’ang’utiet agobo kwondo ak maswetit

¹ Ak kitook kaborunet ne o eng’ kipsengwet; kwondo ne kiilaachi asista, ak komi arawet keldebesaikyik ng’ony, ak kimi metinnyi kutwetab kecheik taman ak aeng’.

² Ak ki tamono: ak kowaachei, kotinyei ng’wanindab sigisiet, ak eng’ ng’wanindo komachei kosigis.

³ Ak kitook kaborunet age eng’ kipsengwet; ak ogeero, maswetit ne o ne birir, ne tinyei metowek tisab ak kuinoik taman, ak kimitei metowekyik nariosiek tisabu.

⁴ Ak ichuuti katutiennyi kebeberta agenge eng’ somok ne bo kecheikab kipsengwet, ak kowirji ng’ony: ak kitonon maswetit eng’ taitab kwonyoto ne kimachei kosigis, kole si ye sigis, koam lakwet.

⁵ Ak kisich lakwet ne werit, ne tun bou bororiosiek tugul eng’ koroktab karnet: ak kigimut lakwennyi kwo ole mi Jehovah, agoi ng’echerennyi ne bo laitornatet.

⁶ Ak kimwei kwonyoto kwo surkwen, ole kiting’e komosta ne kiga kochopchi Jehovah, si kobiit kobai inendet eng’ oloto betusiek elfut agenge bogol aeng’ ak tamanwogik lo.

⁷ Ak kibiit luget eng’ kipsengwet: kiwa Mikael koboto malaikaisiekyik kobargei ak maswetit; ak kiyai luget maswetinoto ak malaikaisiekyik;

⁸ ago ma iterteris, amata kosich oldanywa kogeny eng’ kipsengwet.

⁹ Ak kigiturur maswetinoto o konyo ng’ony, erenet ne bo keny, ne kiguure Oindet ak ko Setani, kaberberindetab ng’ony komugul; kigiturur konyo ng’ony, ak kigiturur malaikaisiekyik koboto inendet.

¹⁰ Ak kiagas kutit ne o eng’ kipsengwet, kole, Kagonyo nguno yetunet, ak kamuktaet, ak bounatetab Jehovah nenyo, ak kimnatetab Kristo nenyi: amu kagetururto kataamindetab che kitupche kwo ng’ony, ne itaami ichek eng’ taitab Jehovah nenyo bet ak kemoi.

¹¹ Ak kiiterter inendet amu korotikab Aruet, ak amu ng’olyotab baornatenywa; ama cham sobonwekwak agoi meet.

¹² Noto anyun oboiboitu, okwek kipsengwetisiek, ak okwek che omenye oloto. Bwa agobo ng’ony ak nyanjet: amu kachorgei oindet konyo ole omi, kotinyei nereknatet ne o, amu ingen kole tinyei betusiek che ng’ering’ kityo.

¹³ Ak ye kingogeer maswetit kole kageturur konyo ng’ony, kous kwonyi kasichei werit.

¹⁴ Ak kigigochi kwonyoto kebebaik aeng’ che bo kipsichit ne o, si kobiit kotirirene kwo ong’atet agoi oldanyi, ole kibae, eng’ betusiek, ak betusiek alak, ak kebebertab betusiek, koistoegei togetab erenet.

¹⁵ Ak king’ut erenet beek eng’ kutinnyi che te ainet, kosube kwonyoto, kole si kobiit koib inendet ainonoto.

¹⁶ Ak kitoret ng’ony kwonyoto, ak kiyat kutinnyi ng’ony, ak kolugui ainet ne kang’utu maswetit eng’ kutinnyi.

¹⁷ Ak kinerekyi maswetit kwonyoto, ak kwo kobargei ak keswekyik che king’et, che ribei ng’atutikab Jehovah, ak kotinyei baornatetab Jesu: ak kitonone ng’aniekab nyanjet.