NG'ANG'UTYET 11 - BUKUIT NE TILIL

Baorinik aeng’

¹ Ak kigigona tegat ne u kirokto: ak kilenja age, Ng’eet, ak ikwa hekalutab Jehovah, ak kapkorosut, koboto icheget che saei eng’ oloto.

² Ago bagakte, amat ikwa seremut ne mitei hekalut sang’; amu kigigochi Bororiosiek: ak kotiechei eng’ kelyekwak nganaset ne tilil eng’ arawek artam ak aeng’.

³ Ak agochini baorinikyuk aeng’ komaoten betusiek elfut agenge bogol aeng’ ak tamanwogik lo, kolaachi kuniok.

⁴ Choto ko ketik aeng’ che bo emitik, ak kelyek aeng’ che bo taisiek, kotonondos eng’ taitab Kiptaiyat ne bo ng’ony.

⁵ Ak ngot komachei chi konyalil ichek, komong’une mat kutuswekwak, ak kobar bunikwak: ak ngot komachei chi konyalil ichek, kebarei ko u nito matiny.

⁶ Tinyei chuto kimnatet koger kipsengwet, si marobon eng’ betusiekab maoinatenywa: ak kotinyei kimnatet kowal beek koek korotik, ak kobir ng’ony eng’ koroita age tugul, kotugul ko u ye machei.

⁷ Ak ye tun kagoges baornatenywa, koyai luget tiondo ne mong’une keringet ne maigoksei, ak koterter ichek, ak kobar ichek.

⁸ Ak tebyei muswekwak eng’ oretab nganaset ne o, ne kiguure eng’ tamirmiriet Sodom ak Misri, ole kiga kigartate Kiptaiyandenywa agine.

⁹ Ak keerei muswekwak alak eng’ bik ak ortinwek ak kutuswek ak bororiosiek eng’ betusiek somok ak kebebertab betut, ama chamdoi ketub muswekwak eng’ kererit.

¹⁰ Ak boiboitu ichek che menyei ng’ony agobo icheget, ak kogasegei; ak koyokyingei konunoik, amu kiinyalili maotichuto aeng’ ichek che menyei ng’ony.

¹¹ Ak ye kingobata betusiechoto somogu ak kebeberta kochut ichek kabusetab sobondo ne bunu Jehovah, ak kotononio eng’ kelyekwak; ak konam kaiyweisiet ne o ichek che kigeer.

¹² Ak kigas kutit ne o ne bunu kipsengwet kolenji ichek, Otogosu oli. Ak kitogosta koba kipsengwet eng’ boldet; ak kogeerot ichek bunikwak.

¹³ Ak kibiit eng’ sainato botanet ne o ne bo emet, ak kilul kebeberta agenge eng’ taman ne bo nganaset; ak kigibar eng’ botanonato bik elfusiek tisab; ak kiarogenso che kiga ng’et, ak kiigochi torornatet Jehovah ne bo kipsengwet.

¹⁴ Kagosiirto Nyalilda ne bo aeng’: ogeero, nyonei Nyalilda ne bo somok kochogu.

Iriaget ne bo tisab

¹⁵ Ak kiguut malaikaiyatab tisab; ak kibiit kutuswek che eechen eng’ kipsengwet, ak kimwa kole, Kagobunji bounatetab ng’ony Kiptaiyandennyo, ak Kristo nenyi: ak kobou koigeny ak koigeny.

¹⁶ Ak kiibutyi ng’ony boisiek tiptemu ak ang’wan, che tebe taitab Jehovah eng’ ng’echerokwak che bo torornatet, ak kolos Jehovah,

¹⁷ kole, Kimwaun kongoi, ee Kiptaiyat Jehovah, Kamuktaindet, ne imi ak kiimi; amu kainam kamuktaeng’ung’ ne o, ak ibou.

¹⁸ Ak kinerekso bororiosiek, ak kinyo nereknateng’ung’, ak betut ne kiruokyine bik che kigobek, ak betut ne kigochine otwogiguk maotik melekwekwak, ak bik che tililen, ak ichek che iywei kaineng’ung’, che mengechen ak che eechen; ak keng’em ichek che ng’emei ng’ony.

¹⁹ Ak kigiyat hekalutab Jehovah eng’ kipsengwet; ak kitook eng’ hekalunnyi moingetab arorutiennyi; ak kibiit kalyelosiek, ak kutuswek, ak tulosiek, ak botanetab ng’ony, ak koik che eechen che bo ropta.