NG'ANG'UTYET 10 - BUKUIT NE TILIL

Malaikaiyat ne kim ak bukuit ne ming’in

¹ Ak kiageer malaikaiyat age ne kim kochorugei eng’ kipsengwet, kolaachi boldet; ak kimi chemng’isiriet metinnyi, ak ki u togennyi asista, ak ki u kelyekyik tolochikab mat;

² ak kitinyei eng’ eunnyi bukuit ne ming’in ne yatat: ak kiinde keldanyi ne bo tai nyanjet, ak kiinde ne bo katam emet;

³ ak kitwek eng’ kutit ne o, ko u ye morori ng’etundo: ak ye kingo kagotwek, kobolyo tulosiek tisabu.

⁴ Ak ye kingo kagobolyo tulosiek tisabu, amach asir: ak kiagas kutit ne bunu kipsengwet kole, Ng’och tuguk che kamwa tulosiek tisabu, amesir.

⁵ Ak kinamji barak eunnyi ne bo tai kotokyi kipsengwet malaikaiyat ne kiageer kotonone nyanjet ak emet,

⁶ ak kiiyosio eng’ inendet ne sobei koigeny ak koigeny, ne kitau koyaei kipsengwet ak tuguk che mitei oloto, ak ng’ony ak tuguk che mi oloto, ak nyanjet ak tuguk che mi orit, kole ma komi kagaetab ge:

⁷ ago eng’ betusiekab kutitab malaikaiyatab tisab, ye tun machei koguut, kogesgei ung’otietab Jehovah ko u logoiywek che miachen che kimwachi otwogikyik maotik.

⁸ Ak kutit ne kiagas kobunu kipsengwet, ko king’alalwa kogeny, kole, Ui nam bukuit ne yatat eng’ eutab malaikaiyat ne tononi eng’ nyanjet ak eng’ ng’ony.

⁹ Awe anyun ole mi malaikaiyat, ak alenji kogona bukuinoto ming’in. Ak kolenja, Nam ak iam; si kogochi kong’wanit moeng’ung’, ago anyinyitu eng’ kuting’ung’ ko u kumiat.

¹⁰ Ak kianam bukuit ne ming’in eng’ eutab malaikaiyat, ak aam; ak ki anyiny eng’ kutinnyu ko u kumiat: ak kingo kaam, kong’wanit moennyu.

¹¹ Ak komwawa, kole, Kanyol imaoten agobo bik che chang’ ak bororiosiek ak kutuswek ak laitorinik.