NG'ANG'UTYET 1 - BUKUIT NE TILIL

Ng’alek che kindoune koboto kagatet

¹ Ng’ang’utiet ne bo Jesu Kristo, ne kiigochi Jehovah inendet koborji otwogikyik tuguk che biitu kochogu, ne matiny: ak kiiyok ak koborji kiboitiondennyi Johana eng’ malaikaiyandennyi;

² ne kibaorian agobo ng’olyotab Jehovah, ak baornatetab Jesu Kristo, ak tuguk tugul che kigeer.

³ Baibai inendet ne somani, ak ichek che kasei ng’alekab maoinatoni, ak koribei tuguk che kigisir eng’ maoinatonito: amu kagorik betut.

⁴ Sirjin Johana kanisosiek tisab che mi Asia: Ingoteb mieindo kobotok, ak kalyet, che bunu inendet ne mi, ago kimi, ago tun nyonei; ak che bunu Tamirmirik tisab che mi taitab ng’echerennyi ne bo laitornatet;

⁵ ak che bunu Jesu Kristo ne baoriat ne bo iman, taita ne bo che kigobek, ak ko bounindetab laitorinikab ng’ony. Ingobunji inendet ne chamech, ne kiitiachech eng’ tengekwogikyok eng’ korotikyik;

⁶ ak koyaech keegu bororiet, ak keegu tisiik eng’ Jehovah nenyi, ak ko Kwanda; nenyi torornatet ak kimnatet koigeny ak koigeny. Amen.

⁷ Ogeero, nyonei koboto bolik; ak tun keerei inendet konda age tugul, koboto ichek che kiga toor inendet; ak koteiyo bororiosiek tugul che bo ng’ony amu inendet. Ee, u noto, Amen.

⁸ Ane ko a Alpha ak ko a Omega, mwaei Kiptaiyat Jehovah, ne mi ago kimi ago tun nyonei, Kamuktaindet.

Kong’ang’jingei Kristo Johana

⁹ A Johana, tupcheng’wong’ ak ko a ne kiyamdoi tugul nyalilda ak bounatet ak muitaet eng’ Jesu, kiami emet ne kiikwen beek ne kiguure Patmo, agobo ng’olyotab Jehovah ak baornatetab Jesu.

¹⁰ Kiami eng’ Tamirmiriet eng’ betutab Kiptaiyat, ak kiagas kutit ne o eng’ batennyu, ko u ne bo iriaget

¹¹ kole, Sirji bukuit tuguk che igeere, ak iyokyi kanisosiek tisab; iyokyi Epeso, ak Smurna, ak Pergamo, ak Tuatera, ak Sarde, ak Piladelpia, ak Laodikia.

¹² Ak kiawelelge ale ageer kutinato king’alalwa. Ak kingo kaawelelge ageer kelyek tisab che bo taisiek che bo tahabu;

¹³ ak eng’ kwenutab kelyechoto bo taisiek, ageer chito ne kergei ak weritab chi, kolaachi ngoriet ne itei kelyek, ak koratategei birenetab tahabu eng’ teget.

¹⁴ Ak ki leel metinnyi ak ki leelach sumeekyik ko u kororik che leelachen, ko u teluchi; ak ki u konyekyik liblibenetab mat;

¹⁵ ak ki u kelyekyik sugunwet ne sitat mising’, ko u ne kigitilil eng’ mat; ak ki u tugennyi cheetab beek che chang’.

¹⁶ Ak kitinyei kecheik tisab eng’ eunnyi ne bo tai: ak kimong’une kutinnyi rotwetab chok ne ng’atiben komoswek tuwai: ak ki u togennyi asista ne iluu eng’ kimnatennyi.

¹⁷ Ak kingageer inendet, abutyi kelyekyik ko u chito ne kagome. Ak kiigonoora eunnyi ne bo tai, ak kole, Ameiywei; anendet ko a ne bo tai ak ne bo let,

¹⁸ ak ko a ne Sobei; ak kiga amei, ak keero, asobe koigeny ak koigeny, ak atinye yateiywekab meet ak che bo oldab che kigobek.

¹⁹ Sir anyun tuguk che kaigeer, ak tuguk che mitei, ak tuguk che tun biitu eng’ let;

²⁰ ung’otietab kecheik tisab che kegeer eng’ eunnyu ne bo tai, ak kelyek tisab che bo taisiek che bo tahabu. Kecheichoto tisab ko malaikaisiekab kanisosiek tisab: ak kelyechoto tisab bo taisiek ko kanisosiek tisab.