NEEMIA 9 - BUKUIT NE TILIL

Karugutetab ge, ak kong’anyei bik tengekwogik, ak kigimiti arorutiet

¹ Kiiyumgei lagokab Israel eng’ betutab tiptem ak ang’wan ne bo arawanato korugutgei, kolaach kunoik, ak koiilegei ng’ung’unyek.

² Ak kitabanegei iyotetab Israel toek tugul, ak kotononso kong’any tengekwogikwak, ak tengekwogikab kwanisiekwak.

³ Ak kitononso eng’ komostanywa, kosoman bukuitab Ng’atutikab Jehovah Kamuktaindenywa eng’ kebeberta agenge ne bo ang’wan ne bo betut; ak kong’any tengekwogikwak eng’ kebeberta age ne bo ang’wan, ak kolos Jehovah Kamuktaindenywa.

⁴ Yeityo kotononso eng’ long’eiywotab Lawik, Jesua, Bani, Kadmiel, Sebania, Buni, Serebia, Bani, ak Kenani, ak kowaach eng’ kutit ne o, kowaakyi Jehovah Kamuktaindenywa.

⁵ Yeityo komwa Lawik, Jesua, Kadmiel, Bani, Hasabeneia, Serebia, Hodia, Sebania, ak Petaia, kole, Otononie ak olosu Jehovah Kamuktaindeng’wong’ koboch koigeny agoi koigeny. Ingoberurok kaineng’ung’ ne bo torornatet, ne itororot kosiir kaberuret tugul ak kalosunet.

⁶ I Jehovah, inye inyege; kiiyai kipsengwet, kipsengwet ne bo kipsengwetisiek, koboto tugukwak tugul, ak ng’ony ak tuguk tugul che mi oloto, nyanjosiek ak tuguk tugul che mitei, ak iribe tuguchoto tugul; ak kolosun luget tugul ne bo kipsengwet.

⁷ I Jehovah Kamuktaindet, ne kiilewen Abram, ak imutu inendet komong’ eng’ Ur ne bo Kaldeik, ak igochi inendet kainet iguure Abraham;

⁸ ak igeer ile bo iman muguleldanyi eng’ taing’ung’, ak oyomisge ak inendet igochi inendet emetab Kananindet, Hitindet, Amorindet, Perisindet, Jebusindet ak Girgasindet, igochi emonoto iyotennyi ak kaiyai ng’aleguk kosulda; amu i bo iman.

⁹ Ak kiigeer nyalilwogikab kwanisiekyok eng’ Misri, ak kiigas rirekwak eng’ ye negite Nyanjet ne Birir,

¹⁰ ak kiibarte kaborunoik ak kwong’utik eng’ Parao, ak otwogikyik tugul, ak bik tugul che bo emennyi; amu kiingen ile kiinyalil ichek eng’ menotet; ak kiigochige kainet ko u rani.

¹¹ Ak kiipchei nyanjet eng’ tainywa, si kobun ichek kwenutab nyanjet eng’ emet ne yaamat; ak kiitoorji bik che kiisubu ichek rirosiek, ko u ye kiwirjin koita beek che kimen.

¹² Ak kiindochi ichek kogeny bet eng’ toloitab boldet; ak indochi ichek kemoi eng’ toloitab mat, kokweng’ji oret ne kanyol kobun.

¹³ Kiichorjige kogeny tulwetab Sinai, ak ing’alalji ichek imi kipsengwet, ak igochi ichek kiruogutik che lititen ak ng’atutik che bo iman, ak kotigonutik che miach ak kayomisutik,

¹⁴ ak iborji ichek sabatong’ung’ ne tilil, ak ing’atyi ichek ng’atutik ak kotigonutik, ak Ng’atutiet, eng’ eutab Musa otwogindeng’ung’,

¹⁵ ak igochi amitwogik che bunu kipsengwet amu rubenywa, ak imoong’u beek eng’ ruandet agobo ichek, amu meleldanywa, ak ing’at ichek koba konam emet kobunji, emet ne kiga iitochi eung’ung’ igochi.

¹⁶ Ago kiboisie ichek menotet koboto kwanisiekyok, ak kouuiit kaatinywa, ama kas it ng’atutiguk,

¹⁷ ak koesio kogas it, amata kobwat kwong’utiguk che kiiyai eng’ kwenunywa, ago kiiuuiit kaatinywa, ak eng’ ngelelnatenywa ko kilewen kiptaiyat komut ichek koweekyigei otwoknatenywa: ago i Kamuktaindet ne i chobot inyochi kaat, i bo mieindo ak ko nyiitat rirenet, ne ma sib konerechi, ak itinye chang’indab rirenet, ama imete ichek.

¹⁸ Ee, ye kingo kagoyachigei moita ne kitanyi, ak komwa kole, Ni ko Kamuktaindeng’ung’ ne kiimutun imong’u eng’ Misri, ak kiyai tagisiosiek che eechen;

¹⁹ agos ma imete ichek eng’ ong’atet amu rirenosieguk che chang’: ma istoegei baragunywa bet toloitab boldet si kondochi ichek eng’ oret; ama istoegei ichek toloito ne bo mat kemoi, si koborji ichek lapkeiyet, ak oret ne kanyol kobun.

²⁰ Kiigochi kogeny ichek Tamirmirieng’ung’ ne mie konet, ama iete ichek koam mana chotoguget, ak inage beek amu meleldanywa.

²¹ Ee, kiibai ichek eng’ ong’atet kenyisiek artam, kima rarta kiy eng’ ichek; ma osegitu ngoroikwak, ama ibwanso kelyekwak.

²² Kiigochi kogeny ichek bounatosiek ak bororiosiek che kiipchechi ichek kobee kebeberwekwak: kinam anyun emetab Sihon kobunji, ak emetab laitoriatab Hesbon, ak emetab Og laitoriatab Basan.

²³ Kiites kogeny lagokwak kotenit kecheikab kipsengwet, ak imutu ichek kobwa emonoto kiilenji kwanisiekwak koba konam kobunji.

²⁴ Kiba anyun lagochato ak konam emet kobunji, ak iterter eng’ tainywa bikab emonoto, choto ko ki Kananik, ak inde ichek eunekwak, koboto laitorinikwak, ak bikab emet, si koyachi ichek ko u ye machei.

²⁵ Ak kinam nganasok che ng’ototin, ak emet ne akwai, ak konam gorik che nyiitotin tuguk tugul che miachen kobunji, ak keringonik che kigibal, mbarenikab sabibuk, ak mbarenikab emitik, ak ketik ng’isiat che bo logoek: kiam anyun ak kibiyong’so, ak kinerio, ak kiigasgei eng’ mieindang’ung’ ne o.

²⁶ Ago ma kas it, ak kongeleljin, ak kiwirta Ng’atutiguk kotuktochi batai, ak kobar maotiguk che kibaorianji ichek, kole koweech ichek kobwanjin, ak koyai tagisiosiek che eechen.

²⁷ Noto anyun, kiinde ichek eunekab bunikwak, che kiim ichek: ak eng’ betusiekab nyalildanywa, ye kingorirjin, igas eng’ kipsengwet; ak ko u eng’ rirenosieguk che chang’, ko kiigochi ichek sorunik che kisor ichek eng’ eunekab bunikwak.

²⁸ Ago kingo kagomuuny, koyai yaitiet kogeny eng’ taing’ung’; ibagakyi anyun eunekab bunikwak, si kobiit koboi ichek: ago ye kingoweek, ak korirjin, igas eng’ kipsengwet; ak kiisoru ichek konyil che chang’ ko u rirenosieguk,

²⁹ ak ibaorianji ichek itigon, ile imutyi kogeny Ng’atutieng’ung’: ago kiboisie menotet, ama kas it ng’atutiguk, ago kiyai tengekto kongelelji kiruogutiguk (che ngot koyai chito kosobe choto), ak kilit olin, ak kouuiit kaatinywa, ama cham kogas.

³⁰ Ago kiimuitochi ichek eng’ kenyisiek che chang’, ak kiibaorianji ichek eng’ Tamirmirieng’ung’ eng’ maotiguk: ago ma cham kogas: kiinde anyun ichek eunekab bikab emotinwek.

³¹ Ago eng’ rirenosieguk che chang’ ko ma igesu ichek, anan imete, amu i Kamuktaindet ne bo mieindo, ak ko nyiitat rirenet.

³² Ara anyun Kamuktaindennyo, ne o, ne bo kamuktaet, ak ko Kamuktaindet ne bo kamuiset, ne ribei arorutiet ak rirenetab ge, amat igeer ile kiy ne ming’in, ng’wanindo tugul ne kaityech, ak laitorinikyok, ak bounikyok, ak tisiikyok, ak maotikyok, ak kwanisiekyok, ak biguk tugul koboch eng’ betusiekab laitorinikab Asuria agoi rani.

³³ Ago i bo iman eng’ tuguk tugul che kigobwanjech; amu kiiyai ne bo iman, ago kigeyai ne ya:

³⁴ ama rib Ng’atutieng’ung’ laitorinikyok, koboto bounikyok, tisiikyok, anan kwanisiekyok, ama kas it ng’atutiguk ak baornatosieguk, che kiibaorian agobo ichek.

³⁵ Amu ma otin eng’ bounatenywa, ak eng’ mieindang’ung’ ne o ne kiigochi, ak eng’ emet ne baraa ak ko akwai ne kiigochi eng’ tainywa, ama meto boisionikwak che yaachen.

³⁶ Keero, ki otwogik rani, ak eng’ emet ne kiigochi kwanisiekyok koam logoekyik ak mieindanyi, keero, ki otwogik eng’ emonito.

³⁷ Ak rurei emonito mising’ korurjin laitorinik che kiinde koboiywech amu tengekwogikyok: tinyei kogeny kimnatet koboi borwekyok, koboto tukyok, ko u ye machei, ak kimi bichiindo ne o.

³⁸ Agot eng’ choto tugul ko kagiyai arorutiet ne kim, ak kesir: ak kong’och bounikyok, ak Lawikyok, ak tisiikyok.