NEEMIA 8 - BUKUIT NE TILIL

Kosomani Esra ng’atutik

¹ Ak kiiyumgei bik tugul ko u chichak eng’ komosta ne baraa ne kimi taitab ormarichetab beek; ak kilenji bichoto Esra sirindet koib bukuitab Ng’atutikab Musa, che kiga kong’atyi Jehovah Israel.

² Kiib anyun Esra tisiindet Ng’atutik kobwa taitab tuiyet, murenik ak kwonyik, koboto bik tugul che kiimuchi kogas ak koguiyo, eng’ betut ne bo tai ne bo arawetab tisab.

³ Ak kisoman Ng’atutichoto eng’ taitab komosta ne baraa ne kimitei taitab ormarichetab beek, koboch karon agoi bet kwen, eng’ taitab murenik ak kwonyik, koboto che kiimuchi koguiyo; ak kiepchi it anyun bik tugul bukuitab Ng’atutik.

⁴ Ak kitonon Esra sirindet eng’ komosta ne kigiteege ketik kotororit, ne kiga kiyachi boisionoto; ak kitonondos eng’ ye negite inendet eng’ komostab eunnyi ne bo tai, Matitia, Sema, Anaia, Uria, Hilkia, ak Maaseia, ak kitonondos eng’ komostab eunnyi ne bo katam, Pedaia, Misael, Malkija, Hasum, Hasbadana, Sekaria, ak Mesulam.

⁵ Ak king’any Esra bukuinoto eng’ taitab bik tugul; (amu kimi ye toror kosiir bik;) ak kingong’any bukuinoto kotononso bik tugul.

⁶ Ak kiilos Esra Jehovah, Kamuktaindet ne o; ak kiwol bik tugul kole, Amen, Amen, konamjin barak eunekwak: ak kiing’urukso, kot kotiing’e togochikwak ng’ony kolos Jehovah.

⁷ Ak kiigochi Jesua, Bani, Serebia, Jamin, Akub, Sabetai, Hodia, Maaseia, Kelita, Asaria, Josabad, Hanan, Pelaia, ak Lawik, bik koguiyo Ng’atutik: ak kitononso bik eng’ komostanywa.

⁸ Ak kisoman kogasak komie eng’ bukuit, ng’atutikab Kamuktaindet; ak kiiarorji, si koguiyo somanonato.

⁹ Ak kilenji bik tugul Neemia, ne ki Tirsata, ak Esra tisiindet ak ko sirindet, koboto Lawik che kiineti bik, Tilil betuni eng’ Jehovah Kamuktaindeng’wong’; amoteeye, anan oririe. Amu kiga ririo bik tugul, ye kingogas ng’alekab Ng’atutik.

¹⁰ Yeityo kolenji ichek, Oba, oam che akwaen, ak oee che anyiny, ak oyokyi kebeberwek inendet ne ma kichopchi kiy; amu tilil betuni eng’ Kiptaiyandennyo; amoarogense, amu kimnateng’wong’ boiboiyetab Jehovah.

¹¹ Kogaigai anyun Lawik bik tugul, kolenji, Osisye, amu tilil betuni; amoarogense.

¹² Ak kiba bik tugul koamis, ak koee, ak koyokto kebeberwek, ak koboiboitu mising’ amu kiga koguiyo ng’alek che kiga kimwachi ichek.

Igortab Keriosiek

¹³ Ak eng’ betut ne bo aeng’, koyumgei kandoikab gorikab kwanisiekab bik tugul, tisiik ak Lawik, koyumjigei Esra sirindet, si kobiit koepchi it ng’alekab Ng’atutik.

¹⁴ Ak kinyor kole kigisir eng’ Ng’atutik, ko u ye kiga ng’at Jehovah eng’ Musa, kole, kanyol komeny lagokab Israel keriosiek eng’ igorta ne bo arawetab tisab;

¹⁵ ak kole kobarta ak komwaita eng’ nganasokwak tugul, ak eng’ Jerusalem, kole, Oba tulwet, ak oibu temenikab emitik, ak che bo temenikab emitikab timin, ak temenikab ketit ne kiguure myrtle, ak sosik, ak temenikab ketik che nyigisen, si keteege keriosiek, ko u ye sirat.

¹⁶ Koba anyun bik, koib tuguchoto, ak koteekyinegei keriosiek, kiteech chi age tugul baragutab gonnyi, ak eng’ seremusiekwak, ak eng’ seremusiekab gotab Kamuktaindet, ak eng’ komosta ne baraa eng’ ormarichetab beek, ak eng’ komosta ne baraa eng’ ormarichetab Epraim.

¹⁷ Ak kiteekyigei keriosiek tuiyet tugul ne bo bik che kiweeksei che kiga kiluul, ak komeny keriosiechoto: amu kitom koyai lagokab Israel ko u noto koboch betusiekab Jesua weritab Nun. Ak kibiit boiboiyet ne o.

¹⁸ Kisoman kogeny betut age tugul bukuit ne bo Ng’atutikab Kamuktaindet, koboch betut ne bo tai agoi betut ne bo let. Ak kiyai igorta betusiek tisab; ak eng’ betutab sisiit koyai tuiyetab kaming’inetab ge, ko u ye kiging’at.