NEEMIA 6 - BUKUIT NE TILIL

Kotiemei Sanbalat kogirinda teekset

¹ Ak kingemwachi anyun Sanbalat ak Tobia, ak Gesem Marabuindet, ak bunikyok tugul, kelenji, kiateech irimet, ak ma komi ole butot; (ago eng’ betunoto ko kitom ande kereiywek che bo ormarichok;)

² koyokwa Sanbalat ak Gesem kolenja, Nyo, ketuiyechi nganaset age eng’ nganasok che mi warengetab Ono. Ago kiibwati kele koyaiywa ne ya.

³ Ak kiayokyi bik ichek koba kolenji, Ayae boisiet ne o, ko noto anyun mamuchi achorge: kalya si kotonon boisiet, ko kachoruge anyo ole omi?

⁴ Ak kiiyokwa ko u noto konyil ang’wan; ak awolji ichek ko u noto kogeny.

⁵ Yeityo koyokwa Sanbalat ko u noto ne bo mut otwogindennyi, koibu eng’ eunnyi baruet ne yatat;

⁶ ne kigisir kele, Mwaat eng’ bororiosiek, ak komwaei Gasmu ko u noto, kole, Obwati, inye ak Yahudik, ongelel; amu noto ne konok oteech irimet: ak iegu laitoriandenywa, ko u eng’ ng’alechuto.

⁷ Ak kiilewen kogeny maotik si kobiit komwaita ng’alek agobo inye eng’ Jerusalem, kole, Mi laitoriat Juda: ak kimwachin anyun laitoriat ko u ng’alechuto. Nyo anyun kiruoch tugul.

⁸ Yeityo ayoktochi chito kwo kolenji, Ma kiyaei tuguk che u che kemwa, ago ibwati choto inyege eng’ muguleldang’ung’.

⁹ Amu kita machei bichoto tugul komuech, kole, Kigochi eunekwak konyalulso eng’ boisiet, si mayaak. Ago igimit anyun eunekyuk.

¹⁰ Ak kiawe gotab Semaia weritab Delaia, weritab Meetabel, ne ki ratat, ak kile, Ongetuiyechi gotab Kamuktaindet, eng’ hekalut orit, ak ongeger kurgotikab hekalut: amu bwanei ichek kobarin, ee, bwanei kemoi kobarin.

¹¹ Ak kiale, Tos nyolu komwei chi ne u ane? Ak mi ng’o ne u ane, ne machei kwo hekalut kosor sobondanyi? Mawendi orit.

¹² Ak kianai, ak ogeero, ma iyok inendet Kamuktaindet: ago kiyai maoinatoni kole kogirindaa: ak kiga kosir Tobia ak Sanbalat inendet si kogochi melekto.

¹³ Kigisir inendet anyun si konyor melekto amu ng’olyondoni kole si aiyweis, ak ayai ko u noto, ayai tengekto, si kosich ng’alek che yaach che mwaitoi, si kotaama.

¹⁴ Ibwat, ee Kamuktaindennyu, Tobia ak Sanbalat ko u boisionichuchuak, ak ibwat kogeny Noadia chebioset ne ki maotiot, ak maotik tugul, choto che kita imua.

¹⁵ Kigiges anyun irimet eng’ betutab tiptem ak mut ne bo arawetab Elul, kiek betusiek konom ak aeng’.

¹⁶ Ak kingogas bunikyok tugul, koiyweis bororiosiek tugul che kigayiemech, ak kosasgei: amu kinai kole boisioni ko kiyaei Kamuktaindennyo.

¹⁷ Kiiyokto kogeny eng’ betusiechoto bik che toogunotin che bo Juda, baronok che chang’ koba oldab Tobia, ak kinyor agichek baronokab Tobia.

¹⁸ Amu kimi che chang’ eng’ Juda che kiga koyosiechi inendet, amu ki sandetab Sekania weritab Ara; ak kiga kotun werinnyi Jeohanan cheptab Mesulam weritab Berekia.

¹⁹ King’alal kogeny agobo boisionikyik che miach eng’ tainnyu, ak kiipchi ng’alekyuk inendet. Kiiyok Tobia baronok kole komua.