NEEMIA 5 - BUKUIT NE TILIL

Tuguk che kiyai Neemia si kosr bik eng’ rubet

¹ Kibiit rirek che ng’wonen eng’ bik ak eng’ osotikwak agobo tupchosiekwak Yahudik.

² Amu kimi che kimwa kole, Ki chang’ achek koboto werikyok ak tibikyok: ongecheng’jige bek, si kobiit keam ak kesopche.

³ Kimi alak kogeny che kimwa kole, Kigoitoi mbarenikyok, ak mbarenikyok che bo sabibuk, ak gorikyok si kotononwech, si kiyan kegonech bek, amu rubet.

⁴ Kimi alak kogeny che kimwa kole, Kogiarorte mbarenikyok, ak mbarenikyok che bo sabibuk kotononwech kebesene fedaisiek si kobiit kigoite aisurut ne bo laitoriat.

⁵ Ago kergei anyun borwekyok ak che bo tupchosiekyok, lagokyok ko kergei ak lagokwak: ak ogeero, kimutu werikyok ak tibikyok kobwa ratisiet si koek otwogik, ak kagimutu tibikyok alak kobwa ratisiet: ama kitinye kimnatet keesie kioto; amu tinyei bik alak mbarenikyok ak mbarenikyok che bo sabibuk.

⁶ Ak kianerech mising’ kingagas rirekwak ak ng’alechuto.

⁷ Kiabwat anyun anege, ak kigitiiye ak bik che toogunotin ak bounik, ak alenji ichek, Omache keljinet ne siirei ne nyolu, ne mage chi age tugul tupchennyi. Ak kiayai tuiyet ne o kegirindae ichek.

⁸ Ak kialenji ichek, Ko u kit ne te kamugennyo, ko kogitiach tupchosiekyok Yahudik, che kiga kialdochi bororiosiek; ak tos oaldoi tupchosiekwok si tun oaldawech ichek? Kosisyo anyun, ama sich kiy ne wolu.

⁹ Kiamwa kogeny ale, Kit ne oyae ko ma mie: tos manyoljinok obendate kaiyweisietab Kamuktaindennyo, amu chotisietab bororiosiek bunikyok?

¹⁰ Ak kigibesendochi ichek ko u noto, ane ak tupchosiekyuk, fedaisiek ak bek si kesich keljinet. Asomok ale, kemete boisioneb keljinet.

¹¹ Asomok oweekyi ichek rani mbarenikwak, mbarenikwak che bo emitik, ak gorikwak, ak oweekyi kogeny kebeberta agenge eng’ bogol ne bo fedaisiek, ak ne bo bek, ak divaik, ak mwanik, che kiomage ichek.

¹² Komwa anyun kole, Kiweekyini ichek, ama kemage kiy ichek; kiyae anyun ko u noto, ko u ye kemwa. Kiaguur anyun tisiik, ang’at koyosio, kole koyai ko u kayomisutioni.

¹³ Kialeglekte kogeny ngoriennyu ale, Ingoleglekta ko u noto Kamuktaindet chi age tugul komong’ eng’ gonnyi ak eng’ boisiennyi, ne ma yai kayomisutioni; ingeleglekta ko u noto, kot ko ma kotinyei kiy. Ak kimwa bik tugul che bo tuiyet kole, Amen, ak kolos Jehovah. Ak kiyai bik ko u kayomisutioni.

¹⁴ Kogeny koboch betut ne kigindea aek bounindenywa eng’ emetab Juda, kong’eete kenyitab tiptem agoi kenyitab sosom ak aeng’ ne bo laitoriat Artaserses, kiek choto kenyisiek taman ak aeng’, kima kiam ak tupchosiekyuk amitwogikab bounindet.

¹⁵ Ago kiigochi milet bik bounik che bo tai che kiindounena, ak kiibe ichek makatinik ak divaik, ko ma boto sekelisiek artam che bo feda; ee, kiboi agot otwogikwak bik: ago kima ayai anyun ko u noto, amu kaiyweisiet ne aiywei Kamuktaindet.

¹⁶ Ee, kiawe tai kogeny eng’ boisietab irimoni, ama kial koret age tugul: ak kiiyumjigei yuto otwogikyuk tugul si kobois.

¹⁷ Kiamisie kogeny mesennyu Yahudik ak bounik, murenik bogol ak konom, ko ma boto ichek che kibwa ole kigimi, che kimong’u eng’ bororiosiek che kiyiemech.

¹⁸ Che kiga kichob agobo betut agenge ko ki eito agenge ak kechirek lo che kigilewen; ak kigichobwa ngogaik, ak kigichob divaik alak tugul konyil agenge eng’ betusiek taman: agot eng’ chuto tugul ko ma amach amitwogikab bounindet, amu ki o otwoknatet eng’ bichu.

¹⁹ Ibwata, ee Kamuktaindennyu, eng’ tuguk che miach, amu tugul che kiayachi bichu.