NEEMIA 4 - BUKUIT NE TILIL

Koribegei Neemia agobo bik che kigirinda boisiet

¹ Ago kingogas Sanbalat kole kiteechei irimet, konerech, ak konyit inne, ak kochot Yahudik.

² Ak king’alal eng’ taitab tupchosiekyik ak lugetab Samaria, ak kole, Yaei nee Yahudichu nyalulyotin? Tos igimitigei? Tos igoitoi korosek? Tos igesu eng’ betut agenge? Tos ing’eeti koik komong’une karurugutikab busagariek che kigolalyo?

³ Kimi ak inendet Tobia Amonindet, ak kile, Agot noto teechei, ko ngot kolany lelwot, kobutei irimenywa ne bo koik.

⁴ Kas anyun, ee, Kamuktaindennyo, amu kisasech: ak iweekyi ichek churisienywa kotebe metowekwak, ak igoite ichek keluul koba emet ne kiluuljin:

⁵ amat ketuch tengektanywa, amat kibukto ng’ogistanywa eng’ taing’ung’: amu kigotachin eng’ taitab teegik.

⁶ Kigiteech anyun irimet; ak kigituiyo irimet tugul kot koit kebeberta ne bo koindab tononennyi: amu kitinyei bik mugulelwek che chamei boisiet.

⁷ Ago kingogas Sanbalat, ak Tobia, ak Marabuk, ak Amonik, koboto Asdodik, kole wendi tai teekset ne keteechei irimoikab Jerusalem, che kiga kobutok, ak kole kitiemei ole kiga koundur, konerekso mising’;

⁸ koruoch tugul kibagenge kole kobwa ak kobargei ak Jerusalem, ak kong’eet boriet eng’ yoto.

⁹ Ago kigisa Kamuktaindennyo ak kiginde ribik koripso bet ak kemoi, amu ichek.

¹⁰ Ak kile Juda, Kagogesgei kimnatetab che laei tuguk, ak mitei busagariek che chang’; kot ko mata kimuch keteech irimet.

¹¹ Ak kile bunikyok, Manaei ichek anan kogeer, agoi keit kwenunywa, ak kebar ichek, ak keger boisiet kotonon.

¹² Ak kingobwa Yahudik che kimenyei ole negite ichek, komwawech konyil taman eng’ komoswek tugul, kole, Kanyol oweekyeige.

¹³ Kiande anyun bik komoswek che reektoot, eng’ irimet batai, eng’ ole mami kiy, kiande bik kobee ortinwekwak, kotinyei rotokwak bo chok, ak ng’otwekwak, ak kwangokwak.

¹⁴ Ak kiageer, ak ang’eet, ak alenji bik che toogunotin, ak bounik, ak bik tugul, Amoiywei ichek: obwat Jehovah, ne o ak ko bo kamuiset, ak oyai luget agobo tupchosiekwok, ak werikwok, ak tibikwok, osotikwok ak gorikwok.

¹⁵ Ak kingogas bunikyok kole kigegas kiito, ak kigowal Kamuktaindet kiruogenywa koek buch, keweekyigei anyun tugul irimet, kwo chi tugul boisiennyi.

¹⁶ Ak koboch betunoto ak kwo tai, ko kiyai boisiet kebebertab otwogikyuk, konamei kebeberta age ng’otwek, ak long’onik, koboto kwangok, ak ngoroik che bo karik; ak kitabanu let bounik che bo got komugul ne bo Juda.

¹⁷ Che kiteechei irimet, ak che kilaei tuguk, ko kinamjingei ichegei, koyai chi boisiet eng’ eut age, koname eut age karikyik;

¹⁸ ak eng’ teegik, ko kitinyei chi tugul rotwennyi bo chok ne kiga rat, asi koteeksei. Ak kimi ye negitena ne kuutei iriaget.

¹⁹ Ak kialenji bik che toogunotin, ak bounik koboto bik tugul, O boisiet ak ko baraa, ak kagisirarjine eng’ irimet, keloochine.

²⁰ Oldo tugul ole kogasyi iriaget, oyumjeige eng’ yoto; yaiywech luget Kamuktaindennyo.

²¹ Kigiyai anyun boisiet: ak kinam kebeberta age ne bo bichoto ng’otwek koboch ko kachor asista agoi kotook kecheik.

²² Kialenji bik anyun eng’ betunoto, Ingotebe chi age tugul koboto otwogindennyi Jerusalem orit, asi koek ribikyok che ripsei kemoi, ak komuchi kobois bet.

²³ Kima kiregu ngoroikyok, ane, anan tupchosiekyuk, anan otwogikyuk, anan bik che kiripsei che kiisubwa, kiwa chi age tugul ak karikyik agoi ainet.