NEEMIA 3 - BUKUIT NE TILIL

Chebutik agobo teeksetab irimet

¹ King’eet anyun Eliasib tisiindet ne o, koboto tupchosiekyik tisiik, ak koteech ormarichetab kechirek; kiianyiny, ak konde kurgotikyik; kiianyiny agoi teekset ne koi ne bo Hamea, kot koit teekset ne koi ne bo Hananel.

² Ak che kiteeksei korubei inendet ko ki bikab Jeriko. Ak che kiteeksei korubei ichek ko ki Sakur weritab Imri.

³ Ak kiteech werikab Hasenaa ormarichet ne bo njirenik; ak kiinde tugatugikab kurgotik, ak konde kereiywekyik, ak karikyik che kigiige, ak tameleiywekyik.

⁴ Ak che kiteechei kogeny korubei ichek ko ki Meremot weritab Uria, weritab Hakos. Ak che kiteechei kogeny korubei ichek ko ki Mesulam weritab Berekia, weritab Mesesabel. Ak che kiteechei kogeny korubei ichek ko ki Sadok weritab Baana.

⁵ Ak che kiteechei kogeny korubei ichek ko ki Tekoitik; ago ma chuuljigei bikwak che toogunotin boisietab kiptaiyandenywa.

⁶ Ak kiteech kogeny ormarichet ne bo keny Joiada weritab Pasea ak Mesulam weritab Besodeia, ak kiinde tugatugikab kurgotikyik, ak konde kereiywekyik, ak karikyik che kigiige, ak temeleiywekyik.

⁷ Ak ne kiteechei kogeny korubei ichek ko ki Melatia Gibeonindet, ak Jadon Meronotindet, bikab Gibeon, ak che bo Mispa, bik che bo ng’echeretab laitornatet ne bo bounindet ne mi ainet bitonin.

⁸ Ak ne kiteechei kogeny korubei ichek ko ki Usiel weritab Haraia, kitang’ikab tahabu. Ak ne kiteechei kogeny korubei inendet ko ki Hanania burugindetab tuguk che ng’uu ne anyiny, ak kiigimit Jerusalem agoi irimet ne tebees.

⁹ Ak ne kiteechei kogeny korubei ichek ko ki Repaia weritab Hur, ne bounindetab kebebertab koretab Jerusalem.

¹⁰ Ak ne kiteechei kogeny korubei ichek ko ki Jedaia weritab Harumap, ole tokyingei gonnyi. Ak ne kiteechei korubei inendet ko ki Hatus weritab Hasabneia.

¹¹ Kiteechei kebeberta age Malkija weritab Harim, ak Hasub weritab Pahat-moab, koboto teekset ne koi ne bo mastinwek.

¹² Ak ne kiteechei kogeny korubei inendet ko ki Salum weritab Haloes, bounindetab kebebertab koretab Jerusalem, inendet ak tibikyik.

¹³ Kiteech kogeny Hanun ormarichet ne bo atebwet, koboto bik che kimenyei Sanoa; ak kiteech, ak konde kereiywekyik, ak karikyik che kigiige, ak temeleiywekyik, ak kiteech irimet ne bo kakwautik elfut agenge che bo eut agoi ormarichet ne bo ng’atatek.

¹⁴ Ak kiteech kogeny ormarichet ne bo ng’atatek Malkija weritab Rekab, bounindetab koretab Bet-hakerem; kiteech, ak konde kereiywekyik, ak karikyik che kigiige, ak temeleiywekyik.

¹⁵ Ak kiteech kogeny ormarichetab kondab beek Salum weritab Kolhose, bounindetab koretab Mispa; kiteech, ak kotuch, ak konde kereiywekyik, ak karikyik che kigiige, ak temeleiywekyik, ak kiteech irimet ne bo tamboiyotab Sela ole negite seremutab gab laitoriat, agoi long’eiywot ne kichortoegei kebendi nganasetab Daudi.

¹⁶ Ne kiteechei kogeny korubei inendet ko ki Neemia weritab Asbuk, bounindetab kebebertab koretab Bet-sur, agoi ole tokyingei kererisiekab Daudi, ak agoi tamboiyot ne kigibal, ak agoi gotab bik che nyigonen.

¹⁷ Che kiteechei kogeny korubei inendet ko ki Lawik, Reum, weritab Bani. Ne kiteechei kogeny korubei inendet ko ki Hasabia, bounindetab kebebertab koretab Keila, agobo korennyi.

¹⁸ Ne kiteechei kogeny korubei inendet ko ki tupchosiekwak, Babai weritab Henadad, bounindetab kebebertab koretab Keila.

¹⁹ Ne kiteechei kogeny korubei inendet ko ki Eser weritab Jesua, bounindetab Mispa, kebeberta age ne tokyingei ole kitogostoe agoi keit ole kigonore karikab luget, eng’ ole weegegei irimet.

²⁰ Kiteech kogeny eng’ kagiiletab ge, kebeberta age Baruk weritab Sabai korub inendet, koboch ole weegegei irimet agoi kurgetab gotab Eliasib tisiindet ne o.

²¹ Ak kiteechei kogeny kebeberta age korubei inendet ko ki Meremot weritab Uria weritab Akos, koboch kurgetab gotab Eliasib agoi ole boch gotab Eliasib.

²² Ak che kiteechei kogeny korubei inendet ko ki tisiik, bikab Warenget.

²³ Che kiteechei kogeny korubei inendet ko ki Benjamin ak Hasub ole tokyingei gonywa. Che kiteechei kogeny korubei ichek ko ki Asaria weritab Maaseia weritab Anania ole negite gonnyi.

²⁴ Ne kiteechei kogeny kebeberta age korubei inendet ko ki Binui weritab Henadad, koboch gotab Asaria kot koit ole weegegei irimet, ak agoi luita.

²⁵ Kiteech kogeny Palal weritab Usai ole tokyingei ole weegegei irimet, ak teekset ne koi ne kiichumda eng’ got ne bo barak ne bo gotab laitoriat, ne negite seremutab ribik. Kiteech kogeny korub inendet Pedaia weritab Paros.

²⁶ (Kimenyei Netinik Opel, agoi komosta ole tokyingei ormarichetab beek ole bo kong’asis, ak teekset ne koi ne kiichumda.)

²⁷ Ak che kiteechei kogeny kebeberta age korubei inendet ko ki Tekoitik che tokyingei teekset ne koi ne kiichumda, agoi irimetab Opel.

²⁸ Kiteech kogeny tisiik baragutab ormarichetab mbartanyit, kiteechei age tugul ne tokyingei gonnyi.

²⁹ Che kiteechei kogeny korubei ichek ko ki Sadok weritab Imer kotokyingei gonnyi. Ak ne kiteechei kogeny korubei inendet ko ki Semaia weritab Sekania, ribindetab ormarichet ne bo kong’asis.

³⁰ Ne kiteechei kogeny kebeberta age korubei inendet ko ki Hanania weritab Selemia, ak Hanun werit ne bo lo ne bo Salap. Ne kiteechei kogeny korubei inendet ko ki Mesulam weritab Berekia kotokyingei gonnyi ne bo orit.

³¹ Ne kiteechei kogeny korubei inendet ko ki Malkija ne ki age eng’ kitang’ikab tahabu kot koit gotab Netinik, ak ne bo chemung’arainik, kotokyingei ormarichetab Hamikad, kot koit ole kitogostoe eng’ luita.

³² Ak kiteech kogeny kitang’ikab tahabu ak chemung’arainik kwenutab ole kitogostoe eng’ luita ak ormarichetab kechirek.