NEEMIA 2 - BUKUIT NE TILIL

Kowendi Neemia Jerusalem koga kochamji Artaserses, ak kosegeoti irimoik

¹ Ak eng’ arawetab Nisan, eng’ kenyitab tiptem ne bo laitoriat Artaserses, anemu divaik che kimi tainnyi, ak agochi laitoriat. Kitom aarogeni anyun eng’ tainnyi.

² Ak kilenja laitoriat, Amu nee si koarogen togeng’ung’, ago memiani? Ma bo nito kit age, ago bo arogenetab muguleldo. Aarogen anyun mising’.

³ Ak alenji laitoriat, Ingosob laitoriat agoi: kalya si ma arogen togennyu, ye kigoek karatia nganaset, oldab kererisiekab kwanisiekyuk, ak kigolalyo ormarichokyik?

⁴ Komwawa anyun laitoriat kolenja, Nee ne isome? Kiasa anyun Kamuktaindetab kipsengwet.

⁵ Ak kialenji laitoriat, Ngo cham laitoriat, ak ngo kagonyor otwogindeng’ung’ chamet eng’ taing’ung’, iyokta anyun awa Juda, agoi nganasetab kererisiekab kwanisiekyuk, si kobiit ateech.

⁶ Ak kilenja laitoriat, (kimi osotiondennyi ak inendet,) Bo betusiek ata bandang’ung’? Ak iweeksei au? Kicham anyun laitoriat koyokta; ak kiamwachi betusiek che awendi.

⁷ Kiamwachi kogeny laitoriat, alenji, Ngo cham laitoriat, ingegona baronok che bo bounik che mi ainet bitonin, si kochamwa asiirto agoi ait Juda;

⁸ ak baruet ne kisirjin Asap ribindetab osnetab laitoriat, si kogona ketik ayae baoinikab kurgotik che bo irimet ne kinamgei ak got, ak che bo irimetab nganaset, ak che bo got ne awendi. Ak kigona laitoriat ko u noto, ko u eut ne mie ne bo Kamuktaindennyu ne kimi kobota.

⁹ Kiait anyun oldab bounik che kimi ainet bitonin, ak agochi ichek baronokab laitoriat. Kiiyokto laitoriat kiptainikab luget kobota, ak bik che lanyei mbartanyisiek.

¹⁰ Ak kingogas Sanbalat Horonindet, ak Tobia otwogindet ne Amonindet, kogochi ichek ng’wanindo ne o, amu kanyo chito si kobiit kocheng’ji lagokab Israel sobet ne mie.

¹¹ Kiait anyun Jerusalem, ak kiatebe yoto betusiek somok.

¹² Ak kiang’eet kemoi, ane ak bik che ng’ering che kimi kobota; amamwachi chi age tugul kit ne kiinde Kamuktaindennyu muguleldanyu ayachi Jerusalem: kima komi tiony age tugul kobota, kobate ne kialanye.

¹³ Ak kiamande kemoi eng’ ormarichet ne bo atebwet, ne tokyingei kondab beek ne bo maswetit, agoi ormarichet ne bo ng’atatek, ak kiatoben irimoikab Jerusalem, che kiga kobutok, ak kiga kolalyo ormarichokyik.

¹⁴ Kiawe anyun ormarichetab kondab beek agoi tamboiyotab laitoriat: ago kima biit ole bunei tiondo ne kialanye.

¹⁵ Kiatogoste anyun kemoi abun tabandab kererut, atoben irimet; ak aweege, anyo abun ormarichet ne bo atebwet, ak aweege.

¹⁶ Ak kima nai bounik ole kigawe, anan kit ne kiayai: ak kitom amwachi Yahudik, anan ko tisiik, anan ko bik che toogunotin, anan ko bounik, anan ko che kiboisiei.

¹⁷ Yeityo alenji, Ogeere nyalili kimi, ko u ye kigoek karatia Jerusalem, ak kigolalyo ormarichyokyik: obwa keteech kogeny irimetab Jerusalem, si mata keegu che kichurei.

¹⁸ Ak kiamwachi ichek agobo eut ne mie ne bo Kamuktaindennyu ne kimi kobota; ak kiamwachi kogeny ng’alekab laitoriat che kiga komwawa. Ak kile, Ongeng’eetye keteekse. Kiigimitgei anyun agobo boisiet ne mie.

¹⁹ Ago kingogas Sanbalat Horonindet, ak Tobia otwogindet ne Amonindet, ak Gesem Marabuindet, kororechech kochotech, ak kosasech kole, Nee kit ne oyae? Ongeleljini laitoriat?

²⁰ Kiawolji anyun ichek alenji, Iberurech Kamuktaindetab kipsengwet; noto anyun king’eetosi achek otwogikyik ak keteech: ago okwek, ko motinye kebeberta, amotinye kiy ne oyaache, anan kabwatet, eng’ Jerusalem.