NEEMIA 12 - BUKUIT NE TILIL

Tisiik ak Lawik

¹ Chu anyun ko tisiik ak Lawik che kitogosta koboto Serubabel weritab Sealtiel, ak Jesua: Seraia, Jeremia, Esra;

² Amaria, Maluk, Hatus;

³ Sekania, Reum, Meremot;

⁴ Ido, Ginetoi, Abija;

⁵ Mijamin, Maadia, Bilga;

⁶ Semaia, Joiarib, Jedaia;

⁷ Salu, Amok, Hilkia, Jedaia. Chuto ko ki che eechen eng’ tisiik ak che bo tupchosiekwak eng’ betusiekab Jesua.

⁸ Lawik kogeny ko ki Jesua, Binui, Kadmiel, Serebia, Juda, ak Matania, ne kibou kagoitoetab kongoi, inendet koboto tupchosiekyik.

⁹ Kitokyindos ak icheget eng’ ripsosiekwak tupchosiekwak Bakbukia, ak Uno,

¹⁰ ak kisich Jesua Joiakim, ak kosich Joiakim Eliasib, kosich Eliasib Joiada,

¹¹ kosich Joiada Jonatan, kosich Jonatan Jadua.

¹² Ak kimi eng’ betusiekab Joiakim tisiik kandoikab gorikab kwanisiek: ne bo Seraia ko Meraia; ne bo Jeremia ko Hanania;

¹³ ne bo Esra ko Mesulam; ne bo Amaria ko Jeohanan;

¹⁴ ne bo Maluki ko Jonatan; ne bo Sepania ko Josep;

¹⁵ ne bo Harim ko Adna; ne bo Meraiot ko Helkai;

¹⁶ ne bo Ido ko Sekaria; ne bo Gineton ko Mesulam;

¹⁷ ne bo Abija ko Sikri; ne bo Miniamin, ne bo Moadia ko Piltai;

¹⁸ ne bo Bilga ko Samua; ne bo Semaia ko Jeonatan;

¹⁹ ne bo Joiarib ko Matenai; ne bo Jedaia ko Usi;

²⁰ ne bo Salai ko Kalai; ne bo Amok ko Eber;

²¹ ne bo Hilkai ko Hasabia, ne bo Jedaia ko Netanel.

²² Kigisir Lawik eng’ betusiekab Eliasib, Joiada, Johanan, ak Jadua koek kandoikab gorikab kwanisiek: ak kigisir tisiik agichek eng’ laitornatet Darius Persianindet.

²³ Kigisirji bukuitab ateptab betusiek, werikab Lawik, kandoikab gorikab kwanisiek, agoi betusiekab Johanan weritab Eliasib.

²⁴ Ak che eechen che bo Lawik ko ki Hasabia, Serebia, ak Jesua weritab Kadmiel, koboto tupchosiekwak che kitokyindos ak icheget, si kolos ak komwaei kongoi, kowaljingei, ko u ng’atutietab Daudi chitab Kamuktaindet.

²⁵ Ak ribikab kurgotik Matania, Bakbukia, Obadia, Mesulam, Talmon, Akub, che kiripsei eng’ chogenikab ormarichok.

²⁶ Kimi chuto eng’ betusiekab Joiakim weritab Jesua, weritab Josadak, ak eng’ betusiekab Neemia bounindet, ak eng’ betusiekab Esra tisiindet ak ko sirindet.

Kitabani irimoikab Jerusalem

²⁷ Ak kicheng’ ichek Lawik eng’ komoswekwak tugul, eng’ betut ne kigitabane irimetab Jerusalem, si komut ichek kobwa Jerusalem, si koyai katabanisiet eng’ boiboiyet, koboto mwaetab kongoi, eng’ tiendo, ak eng’ sanisiekab sugunonik che kibirei, kibugandinik, ak eng’ ketubosiek.

²⁸ Ak kiiyumgei werikab tienik, kobunu warenget ne kiyiem Jerusalem, ak nganasokab Netopatik;

²⁹ ak kibun kogeny Bet-gilgal, ak mbarenikab Geba ak Asmabet: amu kiga koteekyigei tienik nganasok koyiem Jerusalem.

³⁰ Ak kiianyinygei tisiik ak Lawik; ak kiianyiny bik, ak ormarichok, ak irimet.

³¹ Yeityo amutu bounikab Juda kobwa irimet barak, ak alewen kweanaik aeng’ che eechen che mwaei kongoi ak koba kotenden; kiwa kweanet agenge komostab eutab tai kobun irimet kotokyigei ormarichetab ng’atatek:

³² ak kiisub ichek Hosaia, ak kebebertab bounikab Juda,

³³ ak Asaria, Esra ak Mesulam,

³⁴ Juda, Benjamin, Semaia, ak Jeremia,

³⁵ ak alak eng’ werikab tisiik kotinyei iriagok, choto ko Sekaria weritab Jonatan, weritab Semaia, weritab Matania, weritab Mikaia, weritab Sakur, weritab Asap;

³⁶ ak tupchosiekyik, Semaia, Asarel, Milalai, Gilalai, Maai, Netanel, ak Juda, Hanani, kotinyei kibugandinik che bo Daudi chitab Kamuktaindet; ak kiindoe ichek Esra sirindet:

³⁷ ak kitogostae ye negite ormarichetab kondametut, ak koba banda ne litit, kobun long’eiywotab nganasetab Daudi, eng’ ye kitogostoe eng’ irimet, kosiir gotab Daudi, kot koit ormarichetab beek eng’ komostab kong’asis.

³⁸ Ak kiwa kweanet age ne bo bichoto che kimwaei kongoi, kotorokta ichek, ak kiasub ichek, koboto kebeberta ne bo bik, eng’ irimet barak, kobun teekset ne koi barak ne bo mastinwek che eechen agoi irimet ne tebees;

³⁹ ak kobun baragutab ormarichetab Epraim, ak ormarichet ne os, ak ormarichetab njirenik, ak teekset ne koi ne bo Hananel, ak teekset ne koi ne bo Hamea, agoi ormarichetab kechirek: ak kitononso ichek eng’ ormarichetab ribik.

⁴⁰ Kitononso anyun kweanaichoto tuwai che bo icheget che kimwaei kongoi eng’ gotab Kamuktaindet, kigimi tugul, koboto kebeberta ne bo bounik:

⁴¹ ak tisiik, Eliakim, Maaseia, Miniamin, Mikaia, Elioenai, Sekaria, ak Hanania, che kitinyei iriagok;

⁴² ak Maaseia, Semaia, Eleasar, Usi, Jeohanan, Malkija, Elam, ak Eser. Ak kitieni tienik eng’ kutit ne o, koboto Jesraia kandoindenywa.

⁴³ Ak kiigoito betunoto tiseiywek che eechen, ak koboiboitu; amu kiigochi Kamuktaindet ichek koboiboitu eng’ boiboiyet ne o; ak kiboiboitu agichek kwonyik ak lagok: kot kegasune boiboiyetab Jerusalem ole loo.

⁴⁴ Ak kigilewen eng’ betunoto bik korib gorik che bo orit ole kigonore tuguk, kagochinoik che kinamjin barak, ak tongoanik, ak kebeberwekab taman, kiyumji gorjoto, kobee mbarenik che bo nganasok, kebeberwek che kiging’at eng’ ng’atutiet kobunji tisiik ak Lawik: amu kibaibait Juda agobo tisiik ak Lawik che kiboisiei.

⁴⁵ Ak kitononji ripsetab Kamuktaindenywa, ak ripsetab kaanyinyet, ak kiyai anyun ko u noto tienik ak ribik, ko u ng’atutietab Daudi ak ne bo Solomon werinnyi.

⁴⁶ Amu kimi chito ne o ne bo tienik eng’ betusiekab Daudi ak Asap ne bo keny, ak tienwogikab kalosunet ak kagoitoetab kongoi ne kigochin Kamuktaindet.

⁴⁷ Ak kiigoito Israel tugul kebeberwekab tienik ak che bo ribikab kurgotik, eng’ betusiekab Serubabel, ak eng’ betusiekab Neemia, ko u che yamei betut age tugul: ak kiitabanji ichek Lawik, ak kiitabanji Lawik werikab Aron.