NEEMIA 11 - BUKUIT NE TILIL

Bik che kimenyei Jerusalem

¹ Ak kimeny Jerusalem bounikab bik: ak kiser kogeny barbarek bik che king’et, kole komut kebeberta agenge eng’ taman ne bo bik, komeny Jerusalem, nganaset ne tilil, ak kebeberwek sogol eng’ taman ne bo bik, komeny nganasok alak.

² Ak kiiberur bik murenik tugul che kiigoitogei eng’ chamnyet komeny Jerusalem.

³ Chu ko bik che eechen che bo emotinwek che kimeny Jerusalem: ago kimeny chi tugul komostanyi eng’ nganasokab Juda eng’ nganasokwak, choto ko ki Israel, tisiik, ak Lawik, ak Netinik, ak lagokab otwogikab Solomon.

⁴ Ak kimeny Jerusalem alak eng’ lagokab Juda, ak eng’ lagokab Benjamin. Che bo lagokab Juda ko ki Ataia weritab Usia, weritab Sekaria, weritab Amaria, weritab Sepatia, weritab Maalalel, ne bo lagokab Peres;

⁵ ak Maaseia weritab Baruk, weritab Kolhose, weritab Hasaia, weritab Adaia, weritab Joiarib, weritab Sekaria, weritab Silonindet.

⁶ Kiek werik tugul che bo Peres che kimenyei Jerusalem bogol ang’wan ak tamanwogik lo ak sisiit, murenik che nyigonen.

⁷ Ak chu werikab Benjamin: Salu weritab Mesulam, weritab Joed, weritab Pedaia, weritab Kolaia, weritab Maaseia, weritab Itiel, weritab Jesaia.

⁸ Ak kirubei inendet Gabia, Salai, bik bogol sogol ak tiptem ak sisiit.

⁹ Ak ki bounindenywa Joel weritab Sikri: ak ki ne bo aeng’ ne kibou nganaset Juda weritab Hasenua.

¹⁰ Che bo tisiik ko ki Jedaia weritab Joiarib, Jakin,

¹¹ Seraia weritab Hilkia, weritab Mesulam, weritab Sadok, weritab Meraiot, weritab Aitub, bounindetab gotab Kamuktaindet,

¹² ak tupchosiekwak che kiyai boisietab got, ko ki bik bogol sisiit ak tiptem ak aeng’: ak Adaia weritab Jeroam, weritab Pelalia, weritab Amsi, weritab Sekaria, weritab Pasur, weritab Malkija,

¹³ ak tupchosiekyik, che eechen che bo gorikab kwanisiek, ko ki bik bogol aeng’ ak artam ak aeng’: ak Amashai weritab Asarel, weritab Asai, weritab Mesilemot, weritab Imer,

¹⁴ ak tupchosiekwak, murenik che kimen che nyigonen, ko ki bogol ak tiptem ak sisiit: ak ki bounindenywa Sabdiel, weritab Hagedolim.

¹⁵ Ak che bo Lawik ko ki Semaia weritab Hasub, weritab Asrikam, weritab Hasabia, weritab Buni;

¹⁶ ak Sabetai ak Josabad, che bo che eechen eng’ Lawik, che kibou boisietab sang’ ne bo gotab Kamuktaindet;

¹⁷ ak Matania weritab Mika, weritab Sabdi, weritab Asap, ne ki ne o ne kitau komwaei kongoi eng’ saet, ak Bakbukia, ne bo aeng’ eng’ tupchosiekyik; ak Abda weritab Samua, weritab Galal, weritab Jedutun.

¹⁸ Lawik tugul che kimi nganaset ne tilil ko ki bogol aeng’ ak tamanwogik sisiit ak ang’wan.

¹⁹ Kogeny, ki bogol ak tamanwogik tisab ak aeng’ ribikab kurgotik, choto ko ki Akub, Talmon, ak tupchosiekwak che kiripsei eng’ ormarichok.

²⁰ Ak che king’et che bo Israel, eng’ tisiik, ak Lawik, ko kimi nganasok tugul che bo Juda, chi age tugul eng’ ole mi borotennyi.

²¹ Ago kimeny Netinik Opel: ak kibou Netinik Siha ak Gispa.

²² Ki bounindetab Lawik eng’ Jerusalem Usi weritab Bani, weritab Hasabia, weritab Matania, weritab Mika, ne bo werikab Asap, tienik, che kibou boisiet ne bo gotab Kamuktaindet.

²³ Amu kimi ng’atutiet ne king’atyi ichek laitoriat, ak tuguk che kigichopchi tienik, che yamei betut age tugul.

²⁴ Petaia weritab Mesesabel, ne bo lagokab Sera weritab Juda, ko ki toretindetab laitoriat eng’ ng’alek tugul che bo bik.

²⁵ Ak eng’ nganasok koboto mbarenikwak, ko kimenyei alak eng’ lagokab Juda, Kiriat-arba ak nganasokyik, ak eng’ Dibon ak nganasokyik, ak eng’ Jekabseel ak nganasokyik;

²⁶ ak eng’ Jesua, ak eng’ Molada, ak Bet-pelet;

²⁷ ak eng’ Hasar-sual, ak eng’ Beer-seba ak nganasokyik,

²⁸ ak eng’ Siklag, ak eng’ Mekona ak nganasokyik;

²⁹ ak eng’ En-rimon, ak eng’ Sora, ak eng’ Jarmut;

³⁰ Sanoa ak Adulam, ak nganasokwak, Lakis ak mbarenikyik, Aseka ak nganasokyik. Kimeny anyun koboch Beer-seba agoi atebwetab Hinom.

³¹ Kimeny lagokab Benjamin agichek koboch Geba ak kwo tai, eng’ Mikmas ak Aija, ak eng’ Bet-el ak nganasokyik;

³² eng’ Anatot, Nob, Anania;

³³ Hasor, Rama, Gitaim;

³⁴ Hadid, Seboim, Nebalat;

³⁵ Lod, ak Ono, atebwetab musogik.

³⁶ Ak kiiyomogei ak Benjamin, Lawik alage che bo Juda.