NEEMIA 10 - BUKUIT NE TILIL

Bik che king’och arorutiet, kaboto ng’alek tugul che bo arorutiet

¹ Chu anyun che king’och: Neemia Tirsata, weritab Hakalia, ak Sedekia;

² Seraia, Asaria, Jeremia;

³ Pasur, Amaria, Malkija;

⁴ Hatus, Sebania, Maluk;

⁵ Harim, Meremot, Obadia;

⁶ Daniel, Gineton, Baruk;

⁷ Mesulam, Abija, Mijamin;

⁸ Maasia, Bilgai, Semaia: ki tisiik chuto.

⁹ Lawik ko ki: Jesua, weritab Asania, Binui ne bo werikab Henadad, Kadmiel;

¹⁰ ak tupchosiekwak, Sebania, Hodia, Kelita, Pelaia, Hanan;

¹¹ Mika, Rehob, Hasabia;

¹² Sakur, Serebia, Sebania;

¹³ Hodia, Bani, Beninu.

¹⁴ Che eechen che bo bik ko ki: Paros, Pahat-moab, Elam, Satu, Bani;

¹⁵ Buni, Asgad, Bebai;

¹⁶ Adonija, Bigbai, Adin;

¹⁷ Ater, Hesekia, Asur;

¹⁸ Hodia, Asum, Besai;

¹⁹ Arib, Anatot, Nobai;

²⁰ Magpias, Mesulam, Hesir;

²¹ Mesesabel, Sadok, Jadua;

²² Pelatia, Anan, Anaia;

²³ Hosea, Hanania, Hasub;

²⁴ Haloes, Pila, Sobek;

²⁵ Reum, Hasabna, Maaseia;

²⁶ ak Ahia, Hanan, Anan;

²⁷ Maluk, Harim, Baana.

²⁸ Ak bik tugul, tisiik, Lawik, ribikab kurgotik, tienik, Netinik, ak tugul che kiga kotabanegei bikab emotinwek, kotabanjigei Ng’atutikab Kamuktaindet, koboto osotikwak, werikwak ak tibikwak, chi tugul ne kitinyei naet ak kaguiyet;

²⁹ kinamegei ak tupchosiekwak, bikwak che toogunotin, ak kiiyosio eng’ chubisiet ak koyosiet, kole kobendate Ng’atutikab Kamuktaindet, che kigigon eng’ Musa otwogindetab Kamuktaindet, ak korib ak koyai kayomisutik tugul che bo Jehovah Kiptaiyandennyo, koboto kiruogutikyik ak kotigonutikyik;

³⁰ ak kole, magigochini tibikyok bikab emet, anan kotun werikyok tibikwak:

³¹ ak ngot koib bikab emet, tuguk che kialdoi anan ko amitwogik eng’ betutab sabato kole koalda, ko magiale eng’ betutab sabato, anan ko eng’ betut ne itabanat: kemete kenyitab tisab, ak kemete yaaksetab besendo age tugul.

³² Kigiyachige anyun ng’atutik, kele kigoite eng’ kenyit age tugul kebeberta agenge eng’ somok ne bo sekel kobunji otisietab gotab Kamuktaindennyo;

³³ ak che bo makatinikab kabartaet, ak che bo kagochinet ne bo kotugul ne bo busiek, ak kagochinet ne bo kotugul ne kibeelei, ak che bo sabatosiek, ak che bo ye kaleel arawet, ak che bo igorwek che kiging’at, ak che bo tuguk che itabanotin, ak che bo kagochinoikab tengekto, si keyachine Israel kagaigaet, ak che bo boisiet tugul ne bo gotab Kamuktaindennyo.

³⁴ Ak kigiser barbarek, koboto tisiik ak Lawik, ak bik, agobo kagochinetab kwenik, si kobiit keib kobwa gotab Kamuktaindennyo, ko u gorikab kwanisiekyok, eng’ betusiek che kiging’at, eng’ kenyit age tugul, si kebeel eng’ kaptisisietab Jehovah Kamuktaindennyo, ko u ye sirat eng’ Ng’atutik;

³⁵ ak keib tongoanikab mbarenikyok, ak tongoanikab logoek tugul che bo ketik alak tugul, eng’ kenyit age tugul, kobwa gotab Jehovah:

³⁶ ak kimutu kogeny taiywek che bo werikyok, ak che twotei tukyok, ko u ye sirat eng’ Ng’atutik, ak che twotei akwotisiekyok ak akwotisiekab kechirekyok, keget kobwa gotab Kamuktaindennyo, kobwa ole mi tisiik che boisiei eng’ gotab Kamuktaindennyo;

³⁷ ak keibu makatinik che tuonen che bo tongoanik, ak kagochinoikyok che kinamjin barak, ak logoekab ketik alak tugul, ak divaik, ak mwanik, kobwa ole mi tisiik, agoi gorik che bo orit che bo gotab Kamuktaindennyo; ak keipchi Lawik kebeberwekab taman che bo tugukab mbarenikyok; amu iyumi Lawik kebeberwekab taman che bo kabatisiennyo eng’ nganasok tugul.

³⁸ Ak mitei tisiindet weritab Aron koboto Lawik, ye iyumi Lawik kebeberwekab taman: ak koib Lawik kebebertab taman ne bo kebeberwekab taman kobwa gotab Kamuktaindennyo agoi gorik che bo orit, got ne kigonore tuguk.

³⁹ Amu ibu lagokab Israel ak lagokab Lawi kagochinet ne kinamjin barak ne bo bek, ak ne bo divaik, ak ne bo mwanik, kobwa gorik che bo orit, ole mi tuguk che bo ole tilil, ak tisiik che boisiei, ak ribikab kurgotik, ak tienik: ak magibagaktoi gotab Kamuktaindennyo.