NEEMIA 1 - BUKUIT NE TILIL

Kogasei Neemia ng’alek che yaach che bunu Jerusalem, ak saet ne kisa

¹ Ng’alekab Neemia weritab Hakalia. Ak eng’ arawetab Kisleb, eng’ kenyitab tiptem, ye kiami Susan eng’ gab laitoriat,

² konyo Hanani, age eng’ tupchosiekyuk, inendet ak bik alak che kibunu Juda; ak kiateebe ichek agobo Yahudik che kiga kochililso, che king’et eng’ che kiga keluul, ak agobo Jerusalem.

³ Ak kimwawa kole, Tinyei nyalilda ne o, ak churisiet eng’ emonoto, bik che king’et eng’ che kiga keluul: ak kigobutok agine irimetab Jerusalem, ak kigebeel ormarichokyik.

⁴ Ak kingagas ng’alechuto, ateb ng’ony arir, ak aarogen eng’ betusiek alak; ak kiarugutge asa eng’ taitab Kamuktaindetab kipsengwet,

⁵ ak ale, Asain, ee Jehovah, Kamuktaindetab kipsengwet, Kamuktaindet ne o ne bo kamuiset, ne ribei arorutiet ak rirenet eng’ icheget che chamei inendet, ak koribei ng’atutikyik:

⁶ ingoeb it itiguk, ak koyatogis konyeguk, si kobiit igas saetab otwogindeng’ung’, ne asain eng’ saini, bet ak kemoi, agobo lagokab Israel otwogiguk, ye ang’anye tengekwogikab lagokab Israel, che kigeyaun: ee, kiayai tengekto koboto gotab kwandanyu.

⁷ Kigeyaun ne ya mising’, ama kirib ng’atutik, anan kayomisutik, anan kiruogutik, che kiing’at otwogindeng’ung’ Musa.

⁸ Asain ale, ibwat ng’olyot ne kiing’at otwogindeng’ung’ Musa, ilenji, Ngot obistoe, aiyestook obe oldab bororiosiek:

⁹ ago ngot oweekyage, ak orib ng’atutikyuk ak oyai, ko agot ngo kigiyestochok tabandab kipsengwet, ayumi kobwa eng’ oloto, ak amutu kobwa ole kialewen ande kainennyu kotebe.

¹⁰ Ara anyun chuto ko otwogiguk ak ko biguk, che kiitiach eng’ kamuktaeng’ung’ ne o, ak eng’ eung’ung’ ne kim.

¹¹ Asain, ee Kiptaiyat, ale, ingoepchi it iting’ung’ saetab otwogindeng’ung’, ak saetab otwogiguk, che boiboi koiywei kaineng’ung’: ak asain ale, igochi otwogindeng’ung’ kobor eng’ betuni, ak igochi inendet rirenet eng’ taitab chichi. (Ki ne ipchin laitoriat kikombet.)