NAHUM 3 - BUKUIT NE TILIL

Bwa agobo ng’emisietab Ninebe

¹ Bwa nganasetab korotik! Nyiitat lembechek ak rebisiet; maigesugei che kibarei.

² Cheetab kipcharitit, ak kirgirenetab karisiek; ak cheetab mbartanyisiek che torombendos, ak cheetab karisiekab luget che torombendos;

³ bik che lanyei mbartanyisiek, kalyeletab rotwetab chok, ak ng’otit ne lilei bich; ak chang’indab che kagebar, karurugutiet ne o ne bo muswek: maigesugei muswek; riichei muswekwak ichek:

⁴ amu chang’indab kugoinatosiek che bo chepkugoniot ne kararan, kwondo ne bou bonisiosiek, ne aldoi bororiosiek eng’ kugoinatosiekyik, ak koaldoi bikab or ne bo chi eng’ bonisiosiekyik.

⁵ Keero, aborienen, mwaei Jehovah ne bo lugosiek, ak ang’anye ngoroiguk kot koit metit; ak aborjin bororiosiek imi ach ngor, ak kaborji bounatosiek tewernateng’ung’.

⁶ Ak awirenen tuguk che samis che kiwechei, ak ayain iyaitu, ak andein iegu kit ne kitang’ang’jin.

⁷ Ak tun mweenen tugul che keerin, ak kole, Kageng’em Ninebe: ng’o ne rirjin? Anyorjini ano che igoigoin?

⁸ Tos i kaigai isiir No-amon, ne kimi kwenutab ainosiek, ne kitinyei beek che kiyiem; ne ki irimennyi nyanjet, ne ki inatunnyi nyanjet?

⁹ Ki kimnatennyi Etiopia ak Misri, ak kima kotinyei ole boch; ki toretiguk Put ak Lubik.

¹⁰ Ago kigimut, kigiluul: kigitonaton kogeny lagokyik eng’ tabanwekab ortinwek tugul; ak kiser barbarek agobo bikyik che konyitotin, ak kerate sirimwek bikyik tugul che eechen.

¹¹ Ibogiti aginye, kiunyin; icheng’e aginye irimet amu bunyot.

¹² Igeitu irimoiguk tugul mogoonik che tinyei logoekwak che tongoanik: ngitumdum kobutyin kutitab amindet.

¹³ Keero, kwonyik biguk che mi kwenung’ung’; kagiyatyi buniguk ormarichokab emeng’ung’: kagobeel mat temeleiyweguk.

¹⁴ Ram beek che bo betusiek che kiyiemenen, igimit irimoiguk: ui ole mi menet, ak itiech ng’atatiat, ak igimit ole kibeele matabaruk.

¹⁵ Igesun mat eng’ oloto; barin rotwetab chok, igesun ko u tinapchet: chang’itu ko u tinapchet, chang’itu ko u chereng’endet.

¹⁶ Kiites chemung’arainiguk kosiir kecheikab kipsengwet: ng’emisioti tinapchet, yeityo kotiriren kwo.

¹⁷ Te chereng’enyinik biguk che kigilaakyi nariet, ak u talamik che chang’ kiptainiguk che bo luget, che menyei ng’otonok eng’ betutab kaititiet, ak komwei ye kachor asista, ama kinai ole kaba.

¹⁸ Inuuktos mestoweguk, ee laitoriatab Asuria: imuunyi biguk che bo teegisto: kiyestochi biguk tulonok, ama mi chi ne iyumi.

¹⁹ Mami kiy ne isoobi moeng’ung’; ng’wan ng’otobeng’ung’: iraprabi eunek agobo inye tugul che kasei ng’alek agobo inye; amu ng’o ne ma ibutyi yaitieng’ung’ kotugul?