NAHUM 2 - BUKUIT NE TILIL

Kabutetab Ninebe ak ng’emisiennyi ne kigesune

¹ Kagonyo taing’ung’ inendet ne tuisiei: rib irimet, rib oret, kermenege kimnatet, tes kimnateng’ung’ koeet mising’.

² Amu ibu Jehovah kogeny telunatetab Jakobo, ko u telunatetab Israel: amu kigoluul ichek luulenik, ak kong’em temenikab ketikwak che bo sabibuk.

³ Kigesal long’onikab bikyik che kimen kobiriritu, ilaachi bikyik che nyigonen ngoroik che biriren: ilyeldos karikab luget ko u karik eng’ betutab chobennyi bo ge, ak kebarbar ng’otwek mising’.

⁴ Kirgirendos karisiekab luget eng’ ortinwek, rusotegei eng’ ortinwek che baroen: u toogunenywa kegenganik, ruaei ko u kalyelyosiek.

⁵ Ibwati inendet bikyik che bo teegisto: ichaboitoi kobendi, choktoi kobendi irimet, ak kechob kit ne tektoegei.

⁶ Yatotin kurgotikab ainosiek ak kochoot gotab laitoriat.

⁷ Kageng’any Husab, kagimut kolooit, ak rirtos tibikyik eng’ kutit ne u ne bo cheptugenik, korabachi tegetikwak.

⁸ Ago kigoigei Ninebe tamboiyot koboch keny: ago mweei; len, Otononie, otononie, ago mami ne kusegong’.

⁹ Oib barunenikab feda, oib barunenikab tahabu: amu maigesugei tuguk che konorotin, torornatetab tuguk tugul che kororon.

¹⁰ Mami kiy, mi buch, kigoek karatia: chootei muguleldo, ak biregei kutung’oik, ak komi ng’wanindo suenutik tugul, walaksei togochikab ichek tugul.

¹¹ Mi ano kebenetab ng’etunyik che neranik, ole wendote kirgitab ng’etuny ak ne kotoy, koboto aruetab ng’etundo, ama mi chi ne imui?

¹² Kitonaton ng’etundo che yamei arekyik, ak kibarji ng’etunyikyik che kotoen, ak konyiit kebenonikyik tiong’ik che kagobar, ak konyiit kebenonikyik banyek che kagotonaton.

¹³ Keero, aborienen, mwaei Jehovah ne bo lugosiek, ak abeel karisiekyik che bo luget eng’ iyeto, ak kobar rotwetab chok ng’etunyiguk che neranik: ak agesu eng’ ng’ony tiong’iguk che ibare, ama kegasei kogeny kutitab biguk che kiyoktoi.