NAHUM 1 - BUKUIT NE TILIL

Yaaktaetab mugetut ne bo neregekab Jehovah

¹ Lautietab Ninebe. Bukuitab ng’ang’utietab Nahum Elkosindet.

² Jehovah ko Kamuktaindet ne bo ng’etkonda ak koyaaktoi mugetut; yaaktoi Jehovah mugetut, ak ko neregat; yaakyin Jehovah mugetut bunikyik, ak kogonorjin bunikyik neregek.

³ Ma sib konerechi Jehovah, tinyei kamuget ne o, ama bagaktoi kiptengekyot age tugul: tinyei Jehovah orennyi eng’ kipchujuriet ak eng’ usonet ne o, ak bolik ko temburiekab kelyekyik.

⁴ Kere kong’ nyanjet, ak koyaami, ak kotenyi ainosiek tugul: nyaluli Basan, ak Karmel, ak kores taptetab Lebanon.

⁵ Botandos tulonok eng’ tainnyi, ak kochootyo tulonok che mengechen; sutoksei ng’ony eng’ tainnyi, ee, ng’ony, ak tugul che menyei oloto.

⁶ Ng’o ne imuchi kotonon eng’ taitab neregekyik? Ak ng’o ne imuchi komuita eng’ koromnatetab neregekyik? Kirong’u neregekyik che ng’wonen ko u mat, ak tonatoni inendet ruandosiek.

⁷ Mie Jehovah, irimet eng’ betutab nyalilda; ak kongen icheget che imang’u inendet.

⁸ Ago igesu komosato eng’ maranet ne o, ak koon bunikyik koba mesundeito.

⁹ Ochobe nee ogirindoe Jehovah? Inendet ne iwong’u: ma kobiitu nyalilda ne bo aeng’.

¹⁰ Nganda u ichek katok che king’walgei, ak ko u che bogitos eng’ eeisenywa, kibeelei kogesgei ko u mobek che yaamnyotin.

Kabutetab Ninebe

¹¹ Kamong’unenen age, ne chobei yaitiet kolen kogirindae Jehovah, ne iruochi yaitiet.

¹² Mwaei Jehovah ko u ni kole: Agot nganda kimen mising’, ak ko chang’, kebarei ui tugul, ak kobet. Agot nganda kianyalilin, ko ma anyalilin kogeny.

¹³ Ak airi choginnyi eng’ kaating’ung’, ak ang’eeti ratutiguk.

¹⁴ Ak kigogon Jehovah ng’atutiet agobo inye, kole, ma keminei kogeny kaineng’ung’: aistoi kanamonik che kigiwai ak che kigitany komong’ eng’ gotab cheptalelisieguk; abale kerering’ung’; amu i sogoran.

¹⁵ Ogeero, mi tulonok kelyekab inendet ne ibu logoiywek che miach, ne mwaitoi kalyet! Rib igorweguk, ee Juda, yai kaarortaosieguk kosulda: amu ma kosiirei kogeny kiptengekyot ole imi: kibarei inendet.