MIKAH 7 - BUKUIT NE TILIL

Koromanatet ak ng’emisiet ne mi emet

¹ Bwa ane! Amu a u yo kagiyum logoekab kemei, a u turonik che bo sabibuk: mami logoek che irurugotin che kimuchi keam; machei sobondanyu tongoaniatab mogoiywet.

² Kigobet chi ne iywei Jehovah eng’ ng’ony, ama mi agot agenge ne bo iman eng’ bik: saptoi tugul kotumdoi korotik; riichei chi age tugul mestet agobo ng’etab kamet.

³ Igiilegei eng’ eunekwak koyai kit ne ya; somsei bounindet, ak machei kiruogindet kit ne kigoigoisie; ak mwaei chito ne o maget ne ya ne bo sobondanyi: chobei ichek ko u noto.

⁴ Ne mie eng’ ichek ko u katableliat: ne litit mising’ eng’ ichek ko ya kosiir ng’otwetab katok: kagoit betutab ribiguk, betut ne kiityinin biret; egu anyun kaiimenywa bo ge.

⁵ Amomang’u choruet, amotiiege kandoindet: rib kurgetab kuting’ung’ eng’ inendet ne ruei eng’ tegeng’ung’.

⁶ Amu iteweri werit kwanda, borie chepto kamet, borie osotiotab werit korgennyi ne bo yugoi; bunikab chito bikyik.

Komang’u Israel Jehovah

⁷ Ago amang’u ane Jehovah; ageni Kamuktaindetab yetunennyu: kasa Kamuktaindennyu,

⁸ amebaibaitunena, ee bunyondennyu: ye kabut, ang’eete kogeny; ye atebe mesundeito, koegu Jehovah lapkeiyennyu.

⁹ Amuitoi eng’ neregekab Jehovah, amu kiayachi tengekto; agoi kong’alal agobo ng’olyondennyu, ak koyaiywa kiruoget: tun imutwa among’ ole mi lapkeiyet, ak ageer imandanyi.

¹⁰ Yeityo kogeer anyun bunyondennyu, ak kotuch tewernatet inendet; ne kilenja, Mi ano Jehovah Kamuktaindeng’ung’? Keerei konyekyuk inendet; kitiekyin ng’ony anyun inendet ko u ye kitiechei ng’atatek che mi ortinwek.

¹¹ Betut ne kiteechei irimoiguk! Kiistoi kolooit ng’atutiet eng’ betunoto.

¹² Bwanjinin ichek eng’ betunoto, kobunu Asuria ak nganasokab Misri, ak koboch Misri agoi Ainet, ak koboch nyanjet agoi nyanjet, ak koboch tulwet agoi tulwet.

¹³ Nganda u noto koegu emet karatia amu ichek che menyei oloto, amu logoekab boisionikwak.

¹⁴ Iyage biguk eng’ kiroktang’ung’, akwetab boroteng’ung’, che meng’isiei ichegei, eng’ osnet ne mi kwenutab Karmel: ingoagetyo eng’ Basan ak Gilead, ko u betusiek che bo keny.

¹⁵ Aborjini inendet tuguk che kikwong’e ko u eng’ betusiek che kiimong’u eng’ emetab Misri.

¹⁶ Keerei bororiosiek ak kolilanso amu kimnatenywa tugul: kere eunekwak kutuswekwak, ak kotimogis itikwak.

¹⁷ Melei ng’ung’unyek ko u erenet; mong’u kobotanionu eng’ komoswekwak che ung’egei ko u tuguk che ichuutegei ng’ony: bwanei eng’ kaiyweisiet ole mi Jehovah Kamuktaindennyo, ak koiyweis amu inye.

Rirenosiekab Jehovah che magiroge

¹⁸ Ng’o Kamuktaindet ne u inye, ne nyochin kaat bik amu tengekto, ak kosiirtoe bistoetab bik che king’et che bo borotennyi? Magonori neregekyik agoi, amu baibaitune rirenet.

¹⁹ Tun weeksei kogeny ak korirenech; tun tiekyin ng’ony tengekwogikyok: ak iwirji tengekwogikwak tugul rirosiekab nyanjet.

²⁰ Iyachini Jakobo imanit, ak iyachi Abraham rirenet, che kigeyosiechi kwanisiekyok eng’ betusiek che bo keny.