MIKAH 6 - BUKUIT NE TILIL

Ng’alek che kiting’e Jehovah bikyik

¹ Ogas anyun okwek kit ne mwaei Jehovah: Ng’eet oborie eng’ taitab tulonok, ak ingogas tulonok che mengechen kuting’ung’.

² Ogas, ee okwek tulonok, ng’alek che ting’enok Jehovah, ak okwek lumeiywek che kimen che bo ng’ony: amu ting’e Jehovah bikyik ng’alek, ak machei kong’alal ak Israel.

³ Kiayaiywok nee, ee okwek bikyuk? Ak kiaiimenak nee? Obaorianwa.

⁴ Amu kiamutun itogosu imong’u eng’ emetab Misri, ak kiatiachin imong’une gotab otwognatet; ak kiayokte Musa, Aron, ak Miriam kondoun.

⁵ Ee bikyuk, obwat ne kisom Balak laitoriatab Moab, ak kit ne kiwolji Balaam weritab Beor inendet; obwat koboch Sitim agoi Gilgal, si kobiit onai boisionikab iman che bo Jehovah.

Kayanet ne bo imam

⁶ Anyonundoi ano taitab Jehovah, ak ang’uruge eng’ taitab Kamuktaindet ne toror? Tos anyo tainnyi aibu kagochinoik che kibeelei koboto moek che masiirei kenyit agenge?

⁷ Tos baibaitune Jehovah mengichik elfusiek, anan ainosiek elfusiek taman che bo mwanik? Tos agoite taitanyu agobo bistoennyu, agoite iyotetab bortanyu agobo tengektab sobondanyu?

⁸ Ee inye chi, kagoborun inendet kit ne mie; ak nee ne magenen Jehovah, kobate iyai imanda, ak icham rirenet, ak iwendote eng’ kaming’inetab ge koboto Kamuktaindeng’ung’?

Kaberberisiet eng’ tuguk che kigamanisie, ak biret ne biitune noto

⁹ Kuurei kutitab Jehovah nganaset, ak koiywei ne ng’om kaineng’ung’: ogas kirokto, koboto inendet ne king’atei.

¹⁰ Tos ta komi konoraik che bo yaitiet eng’ gotab kiptengekyot, ak kerutiet ne ichuchugat ne kiwechei?

¹¹ Tos atililitu ngatinye tuguk che kirogendoisie che bo yaitiet, koboto lolet ne mi ratilisiekab ng’alset?

¹² Amu nyiitat koromnatet magorekyik, ak kogomwa lembechek bik che menyei oloto, ak kong’alsei ng’elyebwekwak.

¹³ Koabirin anyun aginye eng’ ng’otobet ne o, koayain iegu banan amu tengekwogiguk.

¹⁴ Iamisiei, amebiyonyi; ak kotebenen kalilaneng’ung’: ak iuu, ago mesoru ne imuti; ak abare rotwetab chok inendet ne imuti.

¹⁵ Igolsei, amegese; itue emitik, ago meilege mwanik; itue sabibuk, ago mee divaik.

¹⁶ Amu kiorib ng’atutikab Omri, ak boisionik tugul che bo gotab Ahab, ak obendate kiruogutikwak: si kobiit ayain iegu banan, ak ayai bik che menyei oloto koek che kirenyei; ak oib chotisietab bikyuk.