MIKAH 5 - BUKUIT NE TILIL

¹ Iyumge anyun, obee kweanaikab luget, ee cheptab kweanaikab luget; kogoyiemech: kwere kirokto matandab kiruogindetab Israel.

Bounindet ne tun bunu Betlehem

² Ago inye, Bet-lehem Eprata, ne i ming’in eng’ kwenutab elfusiek che bo Juda, mong’unenen age ne nyonjina ne tun egu bounindetab Israel; ne kicham komong’u koboch keny, koboch koigeny.

³ Igoitoi anyun inendet ichek kot koit betut ne sigisiei inendet ne tinyei ng’wanindo: tun weekyingei anyun che king’et che bo tupchosiekyik, lagokab Israel.

⁴ Ak kotonon kobai akwennyi eng’ kimnatetab Jehovah, eng’ telunatetab kainetab Jehovah Kamuktaindennyi: ak kotebi; amu eetu koboch nguno agoi tabanwekab ng’ony.

⁵ Egu chichito kalyennyo ye tun kait Asuriaindet emennyo, ak ye tun katiech gorikyok che bo laitoriat, ko tun king’eeti anyun mestowek tisab ak bik sisiit che eechen kobargei ak inendet.

⁶ Ak kong’em emetab Asuria eng’ rotwetab chok, ak kong’em emetab Nimrod eng’ ole kibunei kebendi oloto; ak kosoruech inendet eng’ Asuriaindet ye tun kait emennyo, ye tun kanyo kotiech orit eng’ kiwotennyo.

⁷ Ak kotebe bik che king’et che bo Jakobo kwenutab bororiosiek che chang’ ko u rewot ne bunu Jehovah, ko u ropta ne inesyin suswek; ne maigeni chi, anan kogany werikab bik.

⁸ Ak kotebe bik che king’et che bo Jakobo kwenutab bororiosiek, kwenutab bororiosiek che chang’, ko u ye mi ng’etundo kwenutab tiong’ik che bo osnet, ko u ng’etundo ne neran eng’ kwenutab akwotisiekab kechirek: ne ye bunei kwen kotiegoti ak kotonatoni, ama mi chi ne soru.

⁹ Ingitoror eung’ung’ eng’ baragutab buniguk, ak ingeisto buniguk tugul.

Katililet ne itilili Jehovah Israel

¹⁰ Mwaei Jehovah kole, Tun abare eng’ betunoto mbartanyisieguk eng’ kwenung’ung’, ak ang’em karisieguk che bo luget:

¹¹ ak abar nganasokab emeng’ung’, ak abut irimoiguk tugul:

¹² ak aiste bonisosiek eng’ eung’ung’; ama inyoru kogeny kipsogeinik:

¹³ ak aiste eng’ kwenung’ung’ kanamoniguk che kigiwai ak tolochiguk; ak ma ilosu kogeny boisionikab euneguk.

¹⁴ Ak atutu Aserik eng’ kwenung’ung’; ak ang’em nganasoguk.

¹⁵ Ak ayaaktochi mugetut eng’ neregek ak eng’ neregek che ng’wonen, bororiosiek che kima kas it.