MIKAH 4 - BUKUIT NE TILIL

Mi kalyet emet, ak tuiyechin bik Jerusalem kosaei

¹ Ago kigimiti eng’ betusiek che bo let tulwetab gotab Jehovah eng’ tulonok barak, ak kitorori kosiir tulonok che mengechen; ak kotendenji bororiosiek.

² Ak bendi bororiosiek che chang’ ak komwa kole, Obwa, ketogoste tulwetab Jehovah, ak kebe gotab Kamuktaindetab Jakobo; si konetech ortinwekyik, ak kebendate ortinwekyik: amu mong’une ng’atutik Sion, ak komong’une ng’olyotab Jehovah Jerusalem.

³ Ak koruoksechin bororiosiek che chang’, ak koger kong’ bororiosiek che kimen che mi ole loo; ak kotany rotokwak bo chok koek mogomboik che bo tuga, ak kotany ng’otwekwak koek chepkesok: si ma kobaregei bororiosiek, ama konetegei luget kogeny.

⁴ Ago tebe chi tugul kelutab ketinnyi ne bo sabibuk, ak mogoiywennyi; ama mi chi ne imui: amu kagomwa Jehovah ne bo lugosiek ng’olyondonito.

⁵ Amu wendoti bororiet age tugul eng’ bororiosiek tugul eng’ kainetab cheptalelinnyi, ak kibendote achek kainetab Jehovah Kamuktaindennyo koigeny ak koigeny.

Kaiinutikab Sion ak katerterennyi

⁶ Mwaei Jehovah kole, Ayumunoti eng’ betunoto inendet ne ing’wali koboto inendet ne kigeon, ak inendet ne kianyalil;

⁷ ak ayai inendet ne ing’wali koek ne ng’etunot, ak ayai inendet ne kigetimda kolooit koek bororiet ne kim: ak koboi Jehovah ichek eng’ tulwetab Sion koboch yoto agoi koigeny.

⁸ Nyonjinin ng’olyondonito, ee inye, teekset ne koi ne bo akwetab kechirek, tulwetab cheptab Sion; ee, nyonei bounateng’ung’ ni ki bo tai, bounatetab cheptab Jerusalem.

⁹ Amu nee anyun si iwaach? Tos metinye laitoriat, tos kigobet ching’ung’ ne bo kapkiruok, kot konamin ng’woninwek che u che bo kwondo ne machei kosigis?

¹⁰ Ingonamin ng’wanindo, ak igimu, ee cheptab Sion, ko u kwondo ne machei kosigis: amu imandoi anyun nguno eng’ nganaset, ak imeny mbar, ak iwe agoi Babulon; kisorun eng’ oloto; itiachin Jehovah eng’ oloto eng’ eutab buniguk.

¹¹ Kagoyumjingei anyun bororiosiek che chang’ che len, Ingong’wanit, ak ongetang’ang’ji Sion.

¹² Ago manaei kabwatutikab Jehovah, ama iguitos kiruogennyi: amu kigoyum ichek ko u ye kiyumjin ratutikab bek ruanyut ne kiborse.

¹³ Ng’eet ak ibor, ee cheptab Sion: amu ayae kuineng’ung’ koek karnet, ak ayae sioguk koek sugunwet: ak itonaton bororiosiek che chang’: ak itabanji Jehovah kelunoikwak, ak itabanji tugukwak Kiptaiyat ne bo ng’ony komugul.