MIKAH 2 - BUKUIT NE TILIL

Biret ne biitune keiyandit ak usisiet

¹ Bwa eng’ ichek che chobei tengekto ak kotilei eng’ itogusiekwak ole yaitoi yaitiet! Ye kagoeech koyaei, amu tinyei kimnatet koyai.

² Kasei miat mbarenik, ak koreb; koboto gorik, ak koib: ak kous chito koboto gonnyi, chito koboto tugukyik.

³ Mwaei anyun Jehovah ko u ni kole: Ogeero, achobe yaitiet agobo goi, ne moistoe kaatwekwok anan obendate menotet; amu yaachen betusiechoto.

⁴ Mwaei eng’ betunoto kalewenet agobo inye, ak korir eng’ rirek che ng’wonen, kole, Kageng’emech kigeswech: walei kebebertab bikyuk: istoena kiito kot koit ano! Pchechin ngelelik mbarenikyok.

⁵ Menyoru anyun chito ne wirtoi borowet eng’ barbariat eng’ tuiyetab Jehovah.

⁶ Mwaei ichek kole, Amomaoten. Mamaotenjin ichek chuto: mabetos chotisiosiek.

⁷ Ee gotab Jakobo, tos kimwae kele, Tos rartaat Tamirmirietab Jehovah? Tos boisionikyik chuto? Tos mayachin ng’alekyuk ne mie inendet ne wendote imanda?

⁸ Ago kota koboriena bikyuk ko u bunyot: oreegune ngoriet ne tabanu barak ichek che siirtoi eng’ kalyet, ko u bik che machamei luget.

⁹ Otimdoi kwonyikab bikyuk koba eng’ gorikwak che kororon; orebe torornatennyu lagokwak agoi.

¹⁰ Ong’eetye, ak obe; amu ma olito ole omuung’e: amu muruonindo ne ng’emisiei, ee, ng’emisiet ne ya kot.

¹¹ Ngot komwa lembech chito ne wendoti eng’ usonet ak lembechek, kole, Amaotenun agobo divaik ak maiyek; koegu inendet maotiotab bichu.

Kaweegunetab bikab Israel che ng’etunotin

¹² Ee Jakobo, ayumok iman okwek tugul; ayumi iman che king’et che bo Israel; ayumi ichek ko u kechirekab Bosra: ko u akwetab kechirek eng’ kwenutab ole agete, boldos kot amu chang’indab bik.

¹³ Kagondoe butindet ichek: kagobutis ak koba agoi ormarichet, ak komandae yoto: kagondoe ichek laitoriandenywa, ak komi tainywa Jehovah.