MIKAH 1 - BUKUIT NE TILIL

Maoinatosiek agobo Israel ak Juda

¹ Ng’olyotab Jehovah ne kinyonji Mika Morastindet eng’ betusiekab Jotam, Ahas, ak Hesekia, laitorinikab Juda, ne kigeer agobo Samaria ak Jerusalem.

² Ogas okwek bororiosiek, okwek tugul, oepchi it, ee ng’ony, ak tugul che mi oloto: ak ingoek Kiptaiyat Jehovah baoriat eng’ okwek, Kiptaiyat ne mi hekalunnyi ne tilil.

³ Amu, ogeero, mong’u Jehovah eng’ oldanyi, ak kochorgei, ak kotiech komoswek che tororen che bo ng’ony.

⁴ Ak kochootyo tulonok eng’ kelyekyik, ak kobetogis atebwosiek, ko u ye chotei temeniet ko kauchi mat, ko u beek che kirandoi eng’ ole keigei.

⁵ Biitu chuto amu bistoetab Jakobo, ak amu tengekwogikab gotab Israel. Nee bistoetab Jakobo? Tos ma Samaria? Ak nee komoswek che tororen che bo Juda? Tos ma Jerusalem?

⁶ Ayae anyun Samaria koek karurugutietab emet, ak koigei ole kiminjin sabibuk: ak atumde koikyik koba atebwet, ak ang’any lumeiywekyik.

⁷ Ak kebir ketuatui kanamonikyik tugul che kigiwai, ak kebeel melekwekyik tugul, ak ang’em kanamonikyik tugul: amu kiiyumune choto melektab kugoinatet, ak koweekyigei melektab kugoinatet.

Rirek amu kabutetab Israel

⁸ Ateei ak awaache amu nito, awendi ko kagireegunena ngoroik ak ami ach ngor: ateei ko u lelwek, ak arire ko u tiong’ikab songolik.

⁹ Amu ma inyaoksei ng’otobosiekyik: amu kagonyo kot koit Juda; itei ormarichetab bikyuk, agoi Jerusalem.

¹⁰ Amat imwaite ng’olyondonito eng’ Gat, amat irir agot kitigin: kiamildaege temburiek eng’ Bet-le-Apra.

¹¹ Osiirte, ee okwek bik che omenye Sapir, osiirte omi ach ngor ak kalilanet: tomo komong’ chito ne menyei Saanan; rebenok kateiyetab Bet-esel kinnyi ne tonone.

¹² Amu igeni mising’ chito ne menyei Marot kole konyor mieindo: amu kachorjigei yaitiet ormarichetab Jerusalem kobunu Jehovah.

¹³ Ratyi karitab luget mbartanyit ne chepcheb, ee inye chito ne imenye Lakis: ki taunindetab tengekto inendet ne bo cheptab Sion; amu kiginyorjin bistaosiekab Israel.

¹⁴ Igochini anyun Moreset-gat kagochinetab saisere: egu gorikab Aksib kit ne bo ng’alset eng’ laitorinikab Israel.

¹⁵ Ta amutun chito ne nyonei konamin ibunji, ee inye ne imenye Maresa: itei torornatetab Israel Adulam.

¹⁶ Ingochurin met, ak icheru meting’ung’ agobo lagok che iboiboin: tes bostang’ung’ si koigei ne bo chepsengwet; amu kageluul ichek eng’ ole imi.