MATAYO 9 - BUKUIT NE TILIL

Kisoobi chito ne meat borto

¹ Kilany anyun moingetab beek, ak kolanda, koit nganasennyi.

² Ak ogeero, kigimutyi inendet chito ne miani, ne meat borto, korue itogut: ak ye kigeer Jesu kayanenywa, kolenji ne meat borto, Weri, nyiganitu; kagenyoun kaat tengekwogiguk.

³ Ak ogeero, kimwa alak che bo sirik eng’ mugulelwekwak kole, Mwaei chichi ng’alek che yaachen agobo Jehovah.

⁴ Kole Jesu, Kalya si obwat yaitiet eng’ mugulelwekwok? Amu kiingen kabwatutikwak.

⁵ Amu, nee ne nyamnyum, ngemwa kele, Kagenyoun kaat tengekwogiguk; anan ngemwa kele, Ng’eet, ak iwendote?

⁶ Ago si onai ole tinyei kimnatet Weritab chi eng’ ng’ony konyochi kaat bik tengekwogik (kolenji anyun ne meat borto), Ng’eet, ib itogung’ung’ ak iwe gong’ung’.

⁷ King’eet anyun, ak kwo gonnyi.

⁸ Ago ye kingogeer tuiyosiek, koiywei, ak kolos Jehovah, ne igochin chi kimnatet ne u noto.

Kuurset ne kiguurei Matayo

⁹ Ak kingosiirto Jesu eng’ oloto, kogeer chito, ne kiguure Matayo, kotebe ole kitaage aisurut: ak kilenji, Isubwa. Kong’eet anyun, ak kosub.

¹⁰ Ye kiamisiei Jesu eng’ go, ogeero, kobwa taagik che chang’ che bo aisurut ak kiptengeginik, ak kotebi koboto Jesu ak alamalyennyi.

¹¹ Ak ye kingogeer Parisaik, kolenji alamalyennyi, Amu nee si koamisiei Konetindeng’wong’ ak taagik che bo aisurut ak kiptengeginik?

¹² Ago kingogas, kolenji, Mamachei che chamegei chepkerichot, ago che miandos.

¹³ Ago oba okwek, si onetge ole teptoi ng’olyondoni, Amache rirenetab ge, mamache tiseiywo: amu kima anyo aguur che bo imanda, ago kiptengeginik.

Karugutetab ge

¹⁴ Kibwanji anyun alamalyetab Johana ak kolenji, Amu nee si kirugutige achek ak Parisaik konyil che chang’, ago mairugutegei alamalyeng’ung’?

¹⁵ Ak kilenji Jesu, Imuchi ichek che kogiguurji katunisiet koarogenso, kota komi ak sandet? Ago bwanei betusiek, che tun kiistoe sandet ichek, ak korugutgei anyun.

¹⁶ Ak maindoi chi akwot ne leel ngoriet ne os; amu kereri akwot ne leel ngoriet ne os, ak koyait kosiir ole kagerer.

¹⁷ Amaindoi bik divaik che leelach lolotinwek che osen: amu kereri lolotinwek, ak kotumdagei divaik, ak kobek lolotinwek: ago kindoi divaik lolotinwek che leelach, ak kotebi tuwai.

Cheptab Jairu, ak kobogoriot ne kimandae korotik

¹⁸ Kingota komwachin ichek ng’alechu, ogeero, kinyo bounindo, ak kong’urukyi inendet, ak kole, Kagome cheptanyu ngunito: ago nyo igonoor inendet eung’ung’, si kosob.

¹⁹ Ak king’eet Jesu, kosub inendet, ak kiisub alamalyennyi agichek.

²⁰ Ogeero, kobogoriot, ne kimandae korotik eng’ kenyisiek taman ak aeng’, kiisubu Jesu eng’ let, ak kotwa tabandab ngoriennyi:

²¹ amu kimwa eng’ muguleldanyi, kole, Ngot atwa kityo ngoriennyi, asobe.

²² Ago kiwelelgei Jesu kogeer inendet, ak kole, Chebi, nyiganitu; kagosoobin kayaneng’ung’. Ak kisob kobogoriot koboch sainato.

²³ Ak kingoit Jesu gotab bounindet, ak kogeer bik che kuutei ndurerusiek, ak bik che sololendos,

²⁴ kolenji, Oistege: amu ma me chepto, ago inuuchi. Ak kirorechi inendet kochot.

²⁵ Ago kingo kageon tuiyet koba sang’, kwo go, ak konam eutab cheboto; ak kong’eet inendet.

²⁶ Ak kiyesto ng’olyondonoto eng’ emonoto komugul.

Kipkoratinik aeng’

²⁷ Ak kingosiirto Jesu kwo eng’ oloto, kosub inendet kipkoratinik aeng’, kowaagoti kolen, Rireneige, ee weritab Daudi.

²⁸ Ak kingo kakwa go, kobwanji inendet kipkoratinichoto: ak kolenji Jesu, Oyani ole amuchi ayai nito? Kolenji, Wei, Kiptaiyandani.

²⁹ Kotwa anyun konyekwak, ak kole, Ingoyaak eng’ okwek ko u kayaneng’wong’.

³⁰ Ak kiyatogis konyekwak. Ak king’at Jesu mising’, kolenji, Orib amongonai chi.

³¹ Ago kiba, ak koiyestaat ng’olyot agobo inendet eng’ emonoto komugul.

Chito ne namat kut, ne tinyei oindet

³² Ak ye kita kobendi, ogeero, kigimutyi inendet chi ne namat kut ne kitinyei oindet.

³³ Ak kingo kageon oindet, kotwek ne namat kut: ak kikwong’io tuiyosiek, kole, Kitom kegeerei ne u ni eng’ Israel.

³⁴ Ago kimwa Parisaik, kole, Onei oik eng’ ne o ne bo oik.

Riregei Kristo bik

³⁵ Ak kiwendote Jesu nganasok tugul, che eechen ak che mengechen, konetisioti eng’ sunagogisiekwak, ak koamdaati logoiywek che miach che bo bounatet, ak kosobooti che miandos eng’ koroito age tugul, ak eng’ nyalulnatet age tugul.

³⁶ Ago ye kingogeer tuiyosiek, koriregei ichek, amu ki nyerotin ak koiyestootin, ko u kechirek che matinyei mestowot.

³⁷ Kilenji anyun alamalyennyi, O kesisiet iman, ago ng’ering’ kiboitinik.

³⁸ Noto anyun osa Kiptaiyat ne bo kesisiet, si kobiit koyokyi kiboitinik kesisiennyi.