MATAYO 8 - BUKUIT NE TILIL

Kisoobi chito ne amei magondosik

¹ Ak ye kingochorgei eng’ tulwet, kosub inendet tuiyosiek che eechen.

² Ak ogeero, kinyonji chi ne kiamei mogondosik ak kogutung’ji kole, Kiptaiyandani, ngicham, imuchi itilila.

³ Ak kiito eunnyi, ak kotwa inendet, kole, Kaacham; tililitu. Ak kitililit chichoto eng’ sainato eng’ mogondosik.

⁴ Ak kimwachi Jesu kolenji, Ripge si memwachi chi; ago ui, iborjige tisiindet, ak igoite kagochinet ne king’at Musa, si koek baornatet eng’ ichek.

Kisoobi atwogindetab askarik

⁵ Ak ye kingo kagomong’ji Kapernaum, konyonji kiptaiyatab bogol kogaigai,

⁶ kole, Kiptaiyandani, miani otwogindennyu eng’ ga, kasat mising’, meat borto.

⁷ Ak kilenji, Si anyo asoob inendet.

⁸ Ak kiwolji kiptaiyandanato bo bogol kole, Kiptaiyandani, manyoljina inyo gonnyu: ago mwa ng’olyot kityo, si kosob otwogindennyu.

⁹ Amu a chi agane ne kiboiywa, ak atinye askarik che abou: ak ngamwachi ni, alenji, Ui, kwo; ak ngamwachi age, alenji, Nyo, konyo; ak ngamwachi otwogindennyu, alenji, Yai ni, koyai.

¹⁰ Ak ye kingogas Jesu, kokwong’, ak kolenji ichek che kiisubi, Amwawok, iman, ale, Tom anyoru kayanet ne te ni agot eng’ Israel.

¹¹ Ak amwawok ale, bwanei che chang’ eng’ kong’asis ak cherongo, kobwa kotebi ak Abraham, ak Isak, ak Jakobo, eng’ bounatetab kipsengwet:

¹² ago kitoorjin werik che bo bounatet mesundeito ne bo sang’: ole mi rirek ak nyeetab kelek.

¹³ Kilenji anyun Jesu kiptaiyandanato, Ui oldang’ung’, ingeyaun ko u ye kaiyan. Ak kisob eng’ sainato otwogindennyi.

Kisoobi asotiotab Simon koboto bik alak

¹⁴ Ak ye kingo kakwo Jesu gotab Petero, kogeer kametab osotiotab Petero koruei koamei eset.

¹⁵ Ak kitwa eunnyi, ak kobagakta eset inendet; ak king’eet koboisiechi.

¹⁶ Ak ye kimachei koimen, komutyi ichek che chang’ che tinyei oik: ak koon tamirmirik eng’ ng’olyot, ak kosoob tugul che kimiandos:

¹⁷ si kobiit kosulda ne kiga mwa maotiot Isaia, kole, Kinam inendet nyalulnatennyo ak koib mianwekyok.

Tiemisiosiek che kitieme bik che maxhei kosub Jesu

¹⁸ Ak kingogeer Jesu tuiyosiek che eechen koga yiem inendet, kong’at kolanda bitonin.

¹⁹ Ak kinyo sirindet age, ak kolenji, Konetindoni, asubin eng’ ui tugul ole iwendi.

²⁰ Ak kilenji Jesu, Tinyei lelwek keringonik, ak tinyei taritik che bo barak kesonok; ago matinyei Weritab chi ole indoi metinnyi.

²¹ Ak kimwachi age ne bo alamalyet kolenji, Kiptaiyandani, chamwa korok awa atub baba.

²² Ago kilenji Jesu, Isubwa, bagakte che begu kotub chechuak che begu.

Kamung’doetab nyanjet

²³ Ak kingo kagolany moingetab beek, kosub inendet alamalyennyi.

²⁴ Ak ogeero, king’eet usonet ne o eng’ nyanjet, kot komaluuch mildaetab ge ne bo beek moinget: ago kiinuuchi inendet.

²⁵ Kibwa anyun kong’eet inendet, kolenji, Soruech, Kiptaiyandani; kagibegu.

²⁶ Ak kilenji, Kalya si oiywei, okwek che otinye kayanet ne ming’in? King’eet anyun koger kong’ usonaik ak nyanjet; ak kiimung’do anyun mising’ nyanjet.

²⁷ Ago kikwong’io bik, kole, Chi nee chichi, amu kase it inendet agot usonaik ak nyanjet?

Bik che tinyei oik che kimenyei emetab Gadarenes

²⁸ Ak ye kingo kagoit bitonin emetab Gadarenes, kotuiyo ak inendet bik aeng’ che kitinyei oik, kobunu oldab kererisiek; ki koromen mising’, kot ko kima komuchi chi kosiir oranato.

²⁹ Ak ogeero, kiwaach, kole, Kiting’ege nee ak inye, Weritab Jehovah? Kenyo yu inyalilech kotom koit betut?

³⁰ Ak kiagete ole kima ko negite ichek akwet ne bo torok che chang’.

³¹ Ak kisom inendet oik, kole, Ngionech kemande, iyoktech kechut akwet ne bo torok.

³² Ak kilenji ichek, Oba. Ak kimanda koba kochut torok: ak ogeero, kiruai mising’ akwet komugul kochortaegei chemng’esut koba nyanjet, ak kobekyi beek.

³³ Ak kimwei che kiiyagi torochoto koba nganaset, ak komwaita kiy age tugul, ak kit ne kiga keyachi che kitinyei oik.

³⁴ Ak ogeero, kimong’ sang’ nganaset komugul kotuiyo ak Jesu: ak kingogeer inendet, kosom kwo eng’ tabanwekwak.