MATAYO 7 - BUKUIT NE TILIL

Kiruoget ne kiruokyine bik alak

¹ Amoruoch, si magiruokwok.

² Amu kiruoget ne oruochi, ko tun kiruogunenok noto: ak eng’ kerutiet ne ogere, ko tun kigerunenok noto.

³ Ak kalya si igeer betbetiat ne mi kondab ne otupche, ago ma ibwat bambaniat ne mi kondang’ung’ inyendet?

⁴ Anan imwachindoi ano ne otupche ilenjini, Inganemun betbetiat eng’ kondang’ung’; ak keero, mi kondang’ung’ inyendet bambaniat?

⁵ Ee, chombilindoni, icheru korok bambaniat eng’ kondang’ung’; si igeer anyun komie inemu betbetiat eng’ kondab ne otupche.

⁶ Amogochi sesenik kit ne itabanat, anan owirji torok sonoek che tinyei kamanutiet ne o, si matiech eng’ kelyekwak, ak koweeigei kogererak.

Kagiiletab ge ne bo seat

⁷ Osom, si kegonok; ocheng’, si onyoru; ogongony, si keyatwok:

⁸ amu age tugul ne somei, kigonin; ak ne cheng’ei, konyoru; ak inendet ne igongonyi, keyatyin.

⁹ Anan mi ng’o eng’ okwek, ne ngo som werinnyi makatiat, kogochi koita;

¹⁰ anan ngo som njiriot, ko tos igochi erenet?

¹¹ Ngot ongen okwek anyun, che o yaach, ogochi lagokwok kagochinoik che miach, ko tos siirei mising’ ne tia Kwandang’wong’ ne mi kipsengwet, tos maigochin che somei inendet tuguk che miach?

Ng’olyot ne o mising’

¹² Noto anyun tuguk tugul che omache koyaiywok bik, ko kanyol oyachi agichek ko u noto: amu chuto Ng’atutik ak maotik.

Ortinwek aeng’

¹³ Obun okwek kurget ne mariich: amu kurget ne baraa, ak oret ne tebees, noto ne wendi ng’emisiet, ak chang’ che bunei noto kot koit oloto.

¹⁴ Amu marich kurget, ak ko bichii oret, ne wendi sobondo, ak ng’ering’ che nyoru.

Che bo iman ak che ma bo iman

¹⁵ Oribege maotik che bo lembech, che bwanjinok eng’ ngoroik che bo kechirek, ago suik che amei bich.

¹⁶ Onae ichek logoekwak. Tos iyumi bik sabibuk eng’ katok, anan logoekab mogoonik eng’ katablelinik?

¹⁷ U noto ketit age tugul ne mie, yiei logoek che miach; ago ketit ne ya koyiei logoek che yaach.

¹⁸ Maimuchi ketit ne mie koi logoek che yaach, amaimuchi ketit ne ya koi logoek che miach.

¹⁹ Ketit age tugul ne mayiei logoek che miach keebei, ak kewirji ma.

²⁰ Noto anyun onae ichek logoekwak.

Ng’alek ak boisionik

²¹ Maitei age tugul bounatetab kipsengwet ne lenjina, Kiptaiyandani, Kiptaiyandani; ago inendet ne yaei magetab Baba ne mi kipsengwet.

²² Lenjina che chang’ betunoto, Kiptaiyat, Kiptaiyat, kima kiyai maonatet eng’ kaineng’ung’, ak kigion oik eng’ kaineng’ung’, ak kigiyai eng’ kaineng’ung’ boisionik che chang’ che bo kimnatet?

²³ Ak amwachi anyun ichek eng’ yoto kotook, alenji, Mangenok koboch agoi: oistoenage okwek che oyae yaitio.

Lumeiywek konyil aeng’

²⁴ Noto anyun age tugul ne kasei ng’alechuchuk, ak koyai, kiyanie chito ne ng’om, ne kiteech gonnyi ruandet barak:

²⁵ ak kirobon, ak kibwa mogochek, ak kius usonaik, ak korieb goyoto; ama iluul: amu kigiteech ruandet barak.

²⁶ Ak age tugul ne kasei ng’alechuchuk, ama yaei, kiyanie chito ne berber, ne kiteech gonnyi ng’aniek:

²⁷ ak kirobon, ak kibwa mogochek, ak kius usonaik, ak korieb goyoto; ak kiluul: ak kieet lulennyi.

²⁸ Ak ye kingoges Jesu ng’alechu, kokwong’io tuiyosiek amu konetisiennyi:

²⁹ amu kiinet ko u ne tinyei kimnatet, ama u sirikwak.