MATAYO 6 - BUKUIT NE TILIL

Kagochinoik che kigoitoi eng’ ung’ot

¹ Oripge si moyai imandang’wong’ eng’ taitab bik, si kogeerok ichek; ngoyai ko u noto ko monyoru melekto eng’ Kwandang’wong’ ne mi kipsengwet.

² Noto anyun, ye igoite kagochinoiguk che bo rirenetab ge, ko mat iguut igondit eng’ taing’ung’, ko u ye yaei chombilik eng’ sunagogisiek ak ortinwek, si kobiit konyor kalosunet eng’ bik. Amwawok, iman, ale, Kagonyor ichek melektanywa.

³ Ago ye igoite kagochinoik, ko mat konai eung’ung’ ne bo katam ne yaei eung’ung’ ne bo tai;

⁴ si kobiit kobunji ung’ot kagochinoiguk; ak kogonin melekto Kwandang’ung’ ne keerei eng’ ung’ot.

Saet ne kisaei eng’ ung’ot

⁵ Ak ye osae, ko moige chombilik; amu chamei ichek kosaei kotonondos eng’ sunagogisiek ak besiebor si kobiit kogeer bik ichek. Amwawok, iman, ale, Kagonyor ichek melektanywa.

⁶ Ago inye, ye imache isa, iwe gong’ung’ orit, ak ye kaiger kurgeng’ung’, isa Kwandang’ung’ ne mi eng’ ung’ot, ak kogonin melekto Kwandang’ung’ ne keerei eng’ ung’ot.

⁷ Ak ye osae, ko mat kotes ng’alekab buch, ko u ye yaei Bororiosiek; amu len kigasyin ichek amu chang’indab ng’alekwak.

⁸ Noto anyun amoige ichek; amu ingen Kwandang’wong’ tuguk che obononi, kotom osom.

Saet ne kiinet kiptaiyat Jesu alamalyet

⁹ Noto anyun osa ko u ni: Kwandanyo ne mi kipsengwet, Ingotililit kaineng’ung’.

¹⁰ Ingonyo bounateng’ung’. Ingoyaak eng’ ng’ony mageng’ung’, ko u ye kiyaei eng’ kipsengwet.

¹¹ Konech rani amitwogikyok che bo ra.

¹² Ak inyoiywech kaat lelutikyok, ko u ye kinyochini kaat che lelwech.

¹³ Amemutech ole mi yomset, ago soruech eng’ ne ya. [Amu neng’ung’ bounatet, ak kamuktaet, ak torornatet, agoi koigeny. Amen.]

¹⁴ Amu ngonyochini kaat bik kachiliilutikwak, konyoiywok kaat agine Kwandang’wong’ ne bo kipsengwet.

¹⁵ Ago ngo monyochini kaat bik kachiliilutikwak, ko manyoiywok kaat agine Kwandang’wong’ kachiliilutikwok.

Karugutetab ge

¹⁶ Kogeny ye orugutge, ko moige chombilik, eng’ togochik che bo arogenet; amu walei togochikwak, si kogeer bik kole, koirugutgei. Amwawok, iman, ale, Kagonyor ichek melektanywa.

¹⁷ Ago ye irugutge inye, iil meting’ung’ ak iun togeng’ung’:

¹⁸ si mageer bik kole irugutige, ago keerei Kwandang’ung’ ne mi eng’ ung’ot; ak kogonin melekto Kwandang’ung’ ne keerei eng’ ung’ot.

¹⁹ Amogonorjige konoraik eng’ ng’ony, ole amei kiptorotinik ak karuotitoet, ak ole butei chorik ak kochor;

²⁰ ago ogonorjige konoraik eng’ kipsengwet, ole maamei kiptorotinik anan karuotitoet, ak ole mabutei chorik ak kochor;

²¹ amu ole mi konorueng’ung’, komitei oloto muguleldang’ung’ agine.

Lapkeiyet ak mesundeito

²² Taitab borto konda; noto anyun, ngo mie kondang’ung’, ko nyiitat bortang’ung’ komugul lapkeiyet.

²³ Ago ngo ya kondang’ung’, ko nyiitat bortang’ung’ komugul mesundeito. Noto anyun, ngot koek mesundeito lapkeiyet ne mi oring’ung’, ko o mesundeoto ne tia anyun!

²⁴ Mami chi ne imuchi koot kiptainik aeng’; amu wechei age, ak kocham age: anan konamgei ak age, ak kosas age. Momuchi oot Jehovah ak magornatosiek.

Krerwekab met, ak kamang’unet ne kimang’u Jehovah

²⁵ Amwawok anyun ale, Mogerer met agobo sobeng’wong’ eng’ che oame, anan che oee: anan agobo borwekwok, che olaachi. Tos masiirei sobondo amitwogik, ak masiirei borto ngoroik?

²⁶ Ogeer taritik che bo barak: magolsei, ama kesisiei, ama iyumjin choge: ak kobaei ichek Kwandang’wong’ ne bo kipsengwet. Tos ma o koigoi okwek mising’ osiir ichek?

²⁷ Ak imuchi ng’o ne kereri met eng’ okwek kotesyi koindanyi kakwautiet agenge ne bo eut?

²⁸ Ak amu nee anyun si ogerer met agobo ngoroik? Obwat taptok che bo kewet, ole bititoi; maboisiei, anan koletis:

²⁹ ago amwawok ale, agot Solomon eng’ talbistanyi tugul ko kima kolumegei ko u age eng’ chu.

³⁰ Ago ngolaakyin Jehovah ko u noto suswek che bo kewet, che mi rani, ak mutai kewirji ma, ko tos, mayaiywok ko u noto kosiir, okwek che otinye kayanet ne ming’in?

³¹ Noto anyun amogerer met, ole, Kiame nee? Anan, Kiee nee? Anan, Kilaachi nee?

³² Amu cheng’ei tuguchu tugul Bororiosiek; amu ingen Kwandang’wong’ ne bo kipsengwet kole, obononi tuguchu tugul.

³³ Ago ocheng’ korok bounatennyi, ak imandanyi; si keteswok tuguchu tugul.

³⁴ Noto anyun amogerer met agobo mutai: amu kerere met mutaut agobo ge. Yamei betut yaitiennyi.